Obufa Ndutịm Usen Akpan Mbono

‘Nam Kpukpru N̄kpọ Kaban̄a Gospel’ edi ibuotikọ obufa ndutịm usen akpan mbono editọn̄ọde ke March. (1 Cor. 9:23) Eti mbụk Obio Ubọn̄ edi ata akpan mbụk oro ẹkopde mfịn. Ndutịm emi ayan̄wam nnyịn ikụt n̄wọrọnda ifet oro inyenede ndidi mme andinọ utịbe utịbe mbụk emi. Enye ọyọnọ nnyịn odudu n̄ko ndika iso ntan̄a eti mbụk ye unana edikpa mba.—Utom 5:42.

Ndutịm oro oyowụt nnyịn nte ikpadade ukpep ukara Abasi inam n̄kpọ ọyọhọ ọyọhọ man otodo nnyịn ikeme ndiyọhọ ekese ke utom ukwọrọikọ. Nnyịn iyokop ito ndusụk owo ẹmi ẹma ẹkenam ukpụhọde man ẹtat utom mmọ, esịnede n̄kparawa owo ẹmi ẹnọde ofụri se mmọ ẹnyenede man ẹtat eti mbụk.—Men Philippi 2:22 domo.

Akpan utịn̄ikọ, emi etịn̄ikọ edide esenowo edinọde, ọyọsọn̄ọ owụt ediyom oro oyomde nnyịn ‘idot se ẹkpeyakde gospel ẹsịn nnyịn ke ubọk.’ (1 Thess. 2:4) Ẹyen̄wam nnyịn ikụt ite ke edieke anade imụm ifet edibuana eti mbụk ye mbon en̄wen ikama, nnyịn inyene ndika iso nnam n̄kpọ ekekem ye mme idaha Abasi ye se enye oyomde ke ekikere ye ido uwem nnyịn. Ẹyewụt n̄ko mme edidiọn̄ oro nnyịn ibọde ito ndinam emi.

Kûtaba akpan ndutịm emi. Mbufa mbon ẹmi ẹma ẹkeyak idem ẹnọ ẹmi ẹduakde ndina baptism ke usen akpan mbono emi ẹkpenyene nditọt esenyịn oro etiede ibuot usọp usọp. Nọ kpukpru mbon oro afo esikpepde n̄kpọ ikot ndidụk. Ẹyak nnyịn iyak Jehovah ọsọn̄ọ nnyịn idem ndinam kpukpru n̄kpọ kaban̄a eti mbụk ndien ke ntre inamde akakan utom ima mbemiso Armaggedon.