Ifiọk Ata Abasi Ada Osịm Uwem

¹ Jesus ọkọdọhọ ke akam oro ọkọbọn̄de ọnọ Ete esie ete: “Nsinsi uwem oro edi ndifiọk Fi, ata Abasi kierakiet.” (John 17:3) Nso utịp emi edide ke ntatubọk ke oro edi ntem! Ebe ke ndikama n̄wed oro Ifiọk Oro Adade Osịm Nsinsi Uwem, nnyịn imekeme ndin̄wam mmọ en̄wen ẹkpep se oyomde mmọ ẹnam man ẹdu uwem ke nsinsi. Nso ke nnyịn ikeme nditịn̄ man idemede udọn̄ mmọ onyụn̄ onụk mmọ ẹyom ndikot n̄wed Ifiọk?

² Afo emekeme ndikama nneme oro owụtde Bible nte eti ebiet oro ndausụn̄ otode, ebe ke ndidọhọ:

◼ “Nnyịn ineme ye mbọhọidụn̄ nnyịn iban̄a ebiet oro ẹkemede ndikụt eti ndausụn̄ ke ndiyọ mme mfịna uwem. Ke ini edem ediwak owo ẹkesibem iso ẹka ẹbịne Bible. Edi idahaemi edu mme owo ẹkpụhọde; ediwak owo ẹnyene eyịghe ẹban̄a Bible, ẹsede enye n̄kukụre nte n̄wed oro mme owo ẹkewetde. Nso idi ekikere fo? [Bet ibọrọ.] Ata eti ntak odu emi anamde ẹkeme ndidọhọ ke Bible enyene ufọn ọnọ eyo nnyịn. [Kot 2 Timothy 3:16, 17.] Mme edumbet Bible ẹnyene n̄kpọ ndinam mfịn ukem nte mmọ ẹkenyenede ke ini Abasi ọkọnọde odudu spirit ete ẹwet Bible.” Kụbọde ka page 16 ke n̄wed Ifiọk, nyụn̄ tịn̄ ibio ibio ban̄a eti ndausụn̄ oro ẹkụtde ke Ukwọrọikọ Jesus oro ke Obot. Kot mme ikọ oro ẹkotde-kot ẹsịn ẹmi ẹkụtde ke ikpehe ekikere 11 m̀mê enyeoro ke ikpehe ekikere 13. Nọ n̄wed oro, nyụn̄ diomi ndifiak n̄ka man ọkọbọrọ mbụme oro, Didie ke nnyịn ikeme ndibọ ufọn ọkpọkpọ nto ifiọk oro odude ke Bible?

³ Sia akam edide ibuotikọ oro edide n̄kpọ udọn̄ ọnọ ediwak owo, eyedi afo akpama ndineme enye ke ndibụp ete:

◼ “Ye kpukpru n̄kpọ-ata ẹmi inyenede ndisobo ke uwem eyomfịn, ndi afo emekere ke akam ekeme ndinọ nnyịn ata un̄wam? [Bet ibọrọ.] Ediwak owo ẹkere ke mmimọ imasan̄a ikpere Abasi ebe ke ndibọn̄ akam nnọ enye ye nte ke ndinam oro ọmọnọ mmimọ odudu esịtidem, emi edide ukem se Bible ọn̄wọn̄ọde. [Kụbọde n̄wed Ifiọk ka page 156, nyụn̄ kot Philippi 4:6, 7.] Kpa ye oro, owo ekeme ndisikere ndusụk ini nte ke owo iyereke akam imọ. Ibuot emi eneme aban̄a ‘Nte Afo Ekemede Ndisan̄a N̄kpere Abasi.’ [Nọ n̄wed ke etịbe oro ẹsinọde.] Ibuot emi n̄ko anam an̄wan̄a nte nnyịn ikemede ndikpan̄ utọn̄ nnọ Abasi, sia edinyene nneme ye enye mîdịghe edem kiet. Nnyịn imekeme nditịn̄ mban̄a oro ini en̄wen mma mfiak ndi.”

⁴ Nte afo akpama ndidomo ndida nnennen edisobo ye owo ntọn̄ọ ukpepn̄kpọ? Enyeoro ekemede ndinyene ufọn nnọ fi edi emi:

◼ “Nnyịn isan̄a inọ ukpep Bible mfọn ke ufọk. Nte akanam afo emekpep Bible? [Bet ibọrọ.] Yak n̄wụt fi un̄wam ukpepn̄kpọ oro nnyịn isikamade.” Wụt n̄wed Ifiọk, kụbọde ka page 3 man enyeneufọk ekeme ndikụt se isịnede, nyụn̄ bụp ete, “Nte akanam afo emekere aban̄a se Bible enyenede nditịn̄ mban̄a mme ibuotikọ ẹmi?” Kụbọde ka ibuot oro ẹwụtde udọn̄ ẹkan, nyụn̄ kot n̄kpri ibuotikọ. Nam an̄wan̄a nte ke imọ ikpama ndinam ibio ibio n̄wụt nte nnyịn isinemede ntọt emi ke ukpepn̄kpọ nnyịn. Edide ẹtọn̄ọ ukpepn̄kpọ m̀mê owo itọn̄ọke, nọ n̄wed ke ekọmurua oro ẹsinọde.

⁵ Mfịn akwa udịm owo ke ẹnam n̄kpọ ẹban̄a nnennen ifiọk ata Abasi. (Isa. 2:2-4) Edi ifet nnyịn ndin̄wam adan̄a ediwak owo nte ikekeme ẹkpep n̄kpọ ẹban̄a Jehovah ẹnyụn̄ ẹdi se ẹdade usụn̄ ẹsịm uwem.—1 Tim. 2:4.

N̄wam Mmọ En̄wen Ẹnyene Ifiọk Oro Adade Osịm Uwem

¹ Apostle Paul ama anam an̄wan̄a nte ke ‘Abasi oyom kpukpru orụk owo ẹsịm ifiọk akpanikọ.’ (1 Tim. 2:4) Didie ke nnyịn ikeme ndin̄wam mmọ en̄wen ẹbọ ifiọk oro? Usụn̄ kiet edi ke ndinam mfiakn̄ka ye mme owo ẹmi n̄wed oro Ifiọk Oro Adade Osịm Nsinsi Uwem ekedemede udọn̄. N̄wed emi owụt akpanikọ Bible ke in̄wan̄în̄wan̄, mmemmem, ikọ oro ẹtịmde ẹmek. Ebe ke ndikpep enye, ẹkeme ndida kpukpru orụk owo nsịm uwem. Nso ke nnyịn ikeme nditịn̄ oro edisịnde udọn̄ ọnọ mmọ en̄wen ndikpep enye ye nnyịn?

² Ye mbon oro ẹkewụtde udọn̄ ke Bible nte eti ndausụn̄, afo emekeme ndifiak n̄ka ndikọtọn̄ọ ukpepn̄kpọ, ndusụk ọdọhọde ete:

◼ “Ke ini n̄kedide mi isan̄ oko, nnyịn ima ineme ntak emi nnyịn ikemede ndibuọt idem ke Bible nte eti ebiet oro ndausụn̄ otode. Ke ntak emi ẹwetde enye ke odudu spirit Abasi, Bible n̄ko edi ebiet oro ndọn̄esịt ye idotenyịn emi ẹnyenede nsọn̄ọ ẹtode, kpa nte kiet ke otu mme apostle Christ ọkọdọhọde. [Kot Rome 15:4.] Ke utịt nneme nnyịn isan̄ oko, mma mbụp mbụme nte, Didie ke nnyịn ikeme ndibọ ufọn ọkpọkpọ nto ifiọk oro odude ke Bible?” Kot ikpehe ekikere 18 ke page 11 ke n̄wed Ifiọk. Sio wụt nte ke Mme Ntiense Jehovah ke ẹnịm n̄kpọ nte ukpepn̄kpọ Bible miliọn ition ke ofụri ererimbot, ẹn̄wamde mme owo ke kpukpru ebiet ndibọ ifiọk oro adade osịm nsinsi uwem. Nam ibio ibio wụt nte ẹsinịmde ukpepn̄kpọ, adade akpa ikpehe ekikere ition ke ibuot 1.

³ Edieke akam ekedide ibuotikọ oro ekenemede ye owo ke akpa, afo emekeme ndidomo usụn̄ edisobo enyeemi ye owo ke ukeme esịnde nditọn̄ọ ukpepn̄kpọ:

◼ “Mmonịm nte ama adara ntọt aban̄ade akam oro ikenemede ke n̄wed oro Ifiọk Oro Adade Osịm Nsinsi Uwem. Mma ndọhọ ke nyefiak ndi nnyụn̄ ndineme ye afo mban̄a nte mbon oro ẹsibọn̄de akam ẹnọ Abasi ẹkemede n̄ko ndikpan̄ utọn̄ nnọ enye. Tịm fiọk se ẹwetde ke page 158. [Kot ikpehe ekikere 18.] Ntem, ebede ke edikpep Bible ọkpọkpọ, nnyịn ke ikpan̄ utọn̄ inọ se Abasi etịn̄de ọnọ nnyịn. Ndinam oro anam nnyịn isan̄a ikpere enye onyụn̄ an̄wam nnyịn ndise mban̄a mme mfịna eke usen ke usen ẹmi isibọn̄de akam iban̄a. Nyekop inemesịt ndikpep Bible ye afo.” Edieke owo oro onyịmede, tọn̄ọ ye akpa ibuot n̄wed Ifiọk.

⁴ Edieke afo akadade nnennen usụn̄ edisobo ye owo ọtọn̄ọ ukpepn̄kpọ ke ebiet emi ẹkebọde n̄wed, afo emekeme ndika iso ke akpa nneme oro ke ndidọhọ ntem:

◼ “Mma nsịn akpan ukeme ndifiak n̄waha sia n̄koyomde nditịn̄ ekese nnọ fi mban̄a ndutịm ukpepn̄kpọ Bible nnyịn ke mfọn. Mma n̄kpọn̄ idem n̄wed emi kiet, Ifiọk Oro Adade Osịm Nsinsi Uwem, nnọ fi emi edide un̄wam ukpepn̄kpọ oro nnyịn ikamade. Tịm fiọk nte enye esịnde udọn̄ ọnọ nnyịn ndikere mban̄a Ikọ Abasi. [Kot ikpehe ekikere 23 ke page 22.] Mbọk edieke afo akpadade n̄wed fo edi, ndusụk nnyịn imekeme ndikaiso n̄kpep ke ebiet emi iketrede isan̄ oko.” Edieke owo mîkọtọn̄ọke ukpepn̄kpọ ke akpa ediwaha, afo emekeme ndidọhọ: “Ndusụk emi edidi eti ifet ọnọ mi ndinam n̄wụt nte nnyịn isikpepde Bible.” Ke ama ekeneme ikpehe ekikere ifan̄, diomi akpan ini ndifiak n̄ka n̄konịm ukpepn̄kpọ en̄wen.

⁵ Ndikama n̄wed Ifiọk uforo uforo eyen̄wam nnyịn ndisuan nnennen ifiọk kaban̄a edidiọn̄ mmọ en̄wen. (N̄ke 15:7) Utọ ifiọk oro eyeda inemesịt ọsọk mbon oro esịt mmọ enende, edinyụn̄ edi okopodudu n̄kpọ nsịnudọn̄ ọnọ mmọ ndidu uwem ke n̄kemuyo ye edinen ido Jehovah, adade okosịm nsinsi uwem ke akpatre.