M̀mọ̀n̄ ke Ẹkeme Ndikụt Ata Inemesịt?

EDIWAK owo ẹkere ẹte ke ẹkeme ndikụt inemesịt ebe ke ndikọ inyene obụkidem mbon. Nso kaban̄a fi? Ke adan̄aemi mme n̄kpọ obụkidem ẹkemede ke akpanikọ nditịp n̄kpọ nsịn ke inemesịt nnyịn, mmọ inamke ẹnyene enye; inem uwem obụkidem inyụn̄ ibọpke mbuọtidem m̀mê ndiyụhọ mme udọn̄ n̄kpọ eke spirit.

Ke Ukwọrọikọ esie oro ke Obot, Jesus Christ ọkọdọhọ ete: “Inemesịt odu ọnọ mbon oro ẹnyenede udọn̄ ke n̄kpọ eke spirit mmọ, sia obio ubọn̄ heaven enyenede mmọ.” (Matthew 5:3, NW) Jesus n̄ko ọkọdọhọ ete: “Ẹtịm ẹkpeme idem mbufo ke kpukpru edisịn esịt ke n̄kpọ owo: koro owo enyene se enyenyene, uwem esie isịneke enye ke ubọk.”—Luke 12:15.

Ediwak owo ẹyom inemesịt ebe ke ndisịn idem ke oburobụt ido idan̄ ye ke “ubọkutom obụkidem” eken. (Galatia 5:19-21) Nte ededi, ndiyak idem nnọ inemesịt obụkidem isidaha ata inemesịt oro ebịghide idi. Ke akpanikọ, mbon oro ẹnamde mme utọ n̄kpọ oro ididaha Obio Ubọn̄ Abasi inyene.—1 Corinth 6:9, 10.

Mbon en̄wen ẹsiwọn̄ọde ẹse idemmọ ke ediyom oro mmọ ẹyomde inemesịt ebe ke ndidomo ndikọri ukpono idem mmọ. Mme itie ubonn̄wed ye mme ufọkurua unyam n̄wed ẹyọhọ ye mme n̄wed ndausụn̄, edi mme utọ n̄wed oro idaha inemesịt oro ebịghide isọk mme owo. Ntre, ndien, m̀mọ̀n̄ ke nnyịn ikeme ndikụt ata inemesịt?

Man inen̄ede ikop inemesịt, ana nnyịn idiọn̄ọ ndammana udọn̄ n̄kpọ spirit nnyịn. Jesus ọkọdọhọ: “Inemesịt odu ọnọ mbon oro ẹnyenede udọn̄ ke n̄kpọ eke spirit mmọ.” Nte ededi, ididorike nnyịn udori edieke nnyịn n̄kukụre idiọn̄ọde iban̄a udọn̄ emi ndien ekem ikpu ndinam n̄kpọ ekededi mban̄a enye. Ke ndinam an̄wan̄a: Nso ikpetịbe inọ efehe itọk anyanusụn̄ oro etrede ndin̄wọn̄ mmọn̄ oro idemesie oyomde ke mbuba itọk oro ama okokụre? Nte enye ke mîbịghike ikposoboke editaba mmọn̄ uwem ye ndiọi utịp eken? Kpasụk ntre, edieke nnyịn itrede ndinam n̄kpọ mban̄a udọn̄ oro inyenede kaban̄a udia eke spirit, nte ini akade nnyịn iyọtọn̄ọ ndiyemede ke n̄kan̄ eke spirit. Emi ayada ekesịm editaba idatesịt ye inemesịt.

Jesus ama ọdiọn̄ọ udọn̄ n̄kpọ spirit esie ọyọhọ ọyọhọ, ekpepde n̄kpọ kpukpru ini onyụn̄ etiede ekere Ikọ Abasi. Enye ama ekeme ndikụbọde nnyụn̄ n̄kot mme ikpehe Edisana N̄wed Abasi ifụre ifụre, ndien enye ama ekpep mbon en̄wen ndinam kpasụk ntre. (Luke 4:16-21; men Ephesus 4:20, 21 domo.) Jesus n̄ko ekemen edinam uduak Ete esie eke heaven odomo ye udia. Ndinam uduak Abasi ama ada ekese inemesịt ọsọk enye.—John 4:34.

Ih, owo ikemeke ndinyene ata inemesịt ebe ke ndikọ mme n̄kpọ obụkidem mbon; inemesịt inyụn̄ itoho ke ndinọ se mmeme ikpọkidem oyomde. Ata inemesịt edi idaha esịt, emi ọkọn̄ọde ke ata mbuọtidem ye eti itie ebuana ẹnyenede ye Jehovah Abasi. Nte odotde, ndien, David andiwet psalm ọkọkwọ ete: “Ọfọfọn ọnọ mbon eke Jehovah edide Abasi mmọ.”—Psalm 144:15b.

[Ndise ke page 23]

Mbuọtidem ye eti itie ebuana enyenede ye Abasi ẹyeda ata inemesịt ọsọk fi