Ntak Emi Nnyịn Iyomde Mbuọtidem ye Eti Ibuot
Mme Akpan N̄kpọ Ẹtode N̄wed James
MME asan̄autom Jehovah ẹyom ime ke ini ẹdude ke idak idomo. Mmọ n̄ko ẹnyene ndifep edu oro edisụn̄ọde ke unana unyịme Abasi. Ẹsọn̄ọ ẹtịn̄ utọ akpan n̄kpọ ẹmi ke n̄wed James, ndien ndinam n̄kpọ in̄wan̄în̄wan̄ mban̄a mmọ oyom mbuọtidem oro ọsọn̄de idem ye eti ibuot oro otode enyọn̄.
Andiwet n̄wed emi iwụtke idemesie nte kiet ke otu apostle Jesus iba oro ẹkekerede James edi nte ‘enyeemi edide owo Abasi ye Christ.’ Ukem ntre, Jude, eyeneka Jesus ọdọhọ ke imọ idi “owo Jesus Christ, ye eyeneka James.” (James 1:1; Jude 1; Matthew 10:2, 3) Ntem, James eyeneka Jesus nte an̄wan̄ade ekewet n̄wed oro ekerede enyịn̄ esie.—Mark 6:3.
N̄wed emi itịn̄ke n̄kpọ iban̄a nsobo Jerusalem ke 70 C.E., ndien Josephus ewetmbụk eset owụt nte ke ẹma ẹbịghi James ibuot ibio ini ke n̄kpa Festus akwa asan̄autom owo Rome oro ebede ke n̄kpọ nte 62 C.E. Nte an̄wan̄ade, ndien, ekewet n̄wed oro mbemiso 62 C.E. Ẹkewet enye ẹnọ esien Israel eke spirit “duopeba,” sia ẹkenọde enye ẹsọk mmọ oro ‘ẹnyenede mbuọtidem ye Ọbọn̄ nnyịn Jesus Christ.’—James 1:1; 2:1; Galatia 6:16.
James ada uwụtn̄kpọ ẹmi ẹkemede ndin̄wam nnyịn nditi item esie. Ke uwụtn̄kpọ, enye owụt nte ke owo oro eben̄ede Abasi eti ibuot ikpoyokke “koro owo eke oyokde ebiet mbufụt mmọn̄, eke ofụm eberide, emen, otop, ọduọk ko.” (1:5-8) Nnyịn ikpenyene ndikpeme edeme nnyịn koro enye ekeme ndiwọn̄ọde usụn̄uwem nnyịn ukem nte ubọi ọwọn̄ọrede ubom. (3:1, 4) Ndien man iyọ idomo, oyom nnyịn iwụt ime ime ediyọ ukem nte ọtọin̄wan̄ anamde ke ini etiede ebet idọk.—5:7, 8.
Mbuọtidem, Mme Idomo, ye Utom
Akpa, James owụt nte ke nnyịn imekeme ndikop inemesịt nte mme Christian kpa ye mme idomo nnyịn. (1:1-18) Ndusụk idomo ẹmi, utọ nte udọn̄ọ, ẹdi ọsọ n̄kpọ ọnọ kpukpru owo, edi mme Christian ẹbọ ufen n̄ko ke ndidi ifụn Abasi ye Christ. Jehovah eyenọ nnyịn eti ibuot oro iyomde man iyọ edieke nnyịn ikade iso ndiben̄e ye mbuọtidem. Enye akanam idomoke nnyịn ye idiọkn̄kpọ, nnyịn imonyụn̄ ikeme ndiberi edem ke enye ndinọ se ifọnde.
Man ibọ un̄wam Abasi, ana nnyịn ituak ibuot inọ enye ebe ke mme utom oro ẹyararede mbuọtidem nnyịn ẹwụt. (1:19–2:26) Emi oyom ete nnyịn idi “mme anam-ikọ,” ikûdi ikpîkpu mme andikokop. Ana nnyịn ikpeme edeme, ise nditọakpa ye mme ebeakpa enyịn, inyụn̄ inana ndo ke ererimbot. Edieke nnyịn ifọnde imọ owo mfọn inyụn̄ ifụmide mme ubuene, nnyịn iyebiat “ewụhọ Edidem” eke ima. Oyom nnyịn n̄ko iti nte ke ẹda utom ẹwụt mbuọtidem, nte uwụtn̄kpọ Abraham ye Rahab ẹnamde an̄wan̄a. Ke akpanikọ, “edinịm ke akpanikọ [“mbuọtidem,” NW] eke mîsan̄ake ye edinam n̄kpọ [“utom,” NW] onyụn̄ akpa.”
Eti Ibuot Emi Otode Enyọn̄ ye Akam
Mme andikpep ẹyom mbuọtidem ye eti ibuot man ẹnam utom mmọ ẹma. (3:1-18) Mmọ ẹnyene ata ndodobi mbiomo nte mme anditeme. Ukem nte mmọ, ana nnyịn ikpeme edeme—kpa n̄kpọ oro eti ibuot otode enyọn̄ an̄wamde nnyịn ndinam.
Eti ibuot eyen̄wam nnyịn n̄ko ndifiọk nte ke ediyak idem nnọ mme ntụhọ ererimbot eyebiat itie ebuana nnyịn ye Abasi. (4:1–5:12) Edieke nnyịn ikan̄wanade ndisịm ibụk ibụk utịtmbuba mîdịghe ikobiomde nditọete nnyịn ikpe, oyom nnyịn ikabade esịt. Ndien edi akpan n̄kpọ didie ntem ndifep edidi ufan ye ererimbot emi, koro emi edide efịbe eke spirit! Ẹyak nnyịn ikûdedei ifụmi uduak Abasi ebe ke ndutịm inyene obụkidem, nnyịn ikpakam inyụn̄ ikpeme mbak edu unana ime ye edisụk kiet eken uyo.
Owo ekededi oro ọdọn̄ọde ke n̄kan̄ eke spirit ekpenyene ndiyom un̄wam nto mbiowo esop. (5:13-20) Edieke ẹkanamde idiọkn̄kpọ, akam ye ọniọn̄ ọniọn̄ item mmọ ẹyen̄wam anamidiọk emi akabarede esịt ndifiak n̄kop nsọn̄idem eke spirit. Ke akpanikọ, “owo eke akabarede anamidiọk osio ke ndudue usụn̄ esie, eyenyan̄a ukpọn̄ [anamidiọk oro osio] ke n̄kpa [eke spirit ye eke nsinsi].”
[Ekebe ke page 23]
Mme Anam-Ikọ: Nnyịn ikpenyene ndidi “mme anam-ikọ, [idịghe] mme andikokop ikpọn̄îkpọn̄.” (James 1:22-25) Ikpîkpụ andikop “ebiet owo eke esede obot iso esie ke ukụtiso.” Ke ama ekese idem ke esisịt ini ama, enye adaha “onyụn̄ efre orụk owo eke enye edide kpa idahaoro.” Edi “anam-ikọ” etịn̄ enyịn ese mfọnmma, m̀mê ọyọhọ ọyọhọ ibet Abasi, esịnede kpukpru n̄kpọ ẹmi ẹyomde ẹto Christian. Enye ‘ọsọn̄ọ ada ke esịt,’ akaiso nditịm ndụn̄ọde ibet oro ye ekikere ndinam edinen̄ede man otịm emehe ye enye. (Psalm 119:16) Didie ke “andinanam” okpụhọde ọkpọn̄ owo emi otopde enyịn ese ukụtiso onyụn̄ efrede nte etiede? Kamse, andinanam esịn ikọ Jehovah ke edinam onyụn̄ adara mfọn Esie!—Psalm 19:7-11.