Mbono District “Ntịn̄nnịm Ikọ Abasi” eke 1999
1 Ke ini nditọ Israel ẹkekperede ndidụk Isọn̄ Un̄wọn̄ọ, Moses ama ekpe mmọ ubọk ete ẹwụt esịtekọm ẹnọ item Abasi. Enye ọkọdọhọ mmọ ete: “Koro enye mîdịghe n̄kpọ mbubru ye mbufo: koro edide uwem mbufo.” (Deut. 32:45-47) Nte nnyịn iwụtke esịtekọm inọ Jehovah nte ke uwem nnyịn edi ata ọsọn̄urua n̄kpọ ọnọ enye tutu enye aka iso ndida nnyịn usụn̄ ebe ke ọsọn̄urua Ikọ esie? Ke ntre nnyịn itie ye ọkpọsọn̄ udọn̄ ibet Mbono District “Ntịn̄nnịm Ikọ Abasi” eke usen ita oro ye se Jehovah enịmde ọnọ nnyịn.
2 Isua emi, ẹtịm mme mbono district nte ọfọnde ke itie 22 ke ofụri Nigeria. Ke ẹsiode Efịk ẹfep, ẹyenịm mbono ke Abua, Edo, Esan, Gokana, Gun, Hausa, Igbo, Ijaw, Ikọmbakara, Isoko, Khana, Tiv, Urhobo, Usem Idiọn̄ọ Mbon America, ye Yoruba.
3 Nte eyịghe mîdụhe afo amananam ndutịm ndidụk kpukpru usen mbono ẹmi koro afo enịmde ete ke Jehovah oyom afo odụk. Nịm ke akpanikọ nte ke enye okụt ukeme owo kiet kiet ye n̄waidem oro mme asan̄autom esie ẹnamde man ẹdụk, ndien enye eti mme utọ n̄waidem oro ye esịtekọm. (Heb. 6:10) Ebede ke ndidụk usen mbono kiet kiet ọtọn̄ọde ke ikwọ ediberede tutu esịm akam ediberi, nnyịn iwụt Jehovah ite ke nnyịn imada se enye etịn̄de ọnọ nnyịn ke ọsọn̄urua n̄kpọ. (Deut. 4:10) Nnyịn n̄ko iwụt esịtekọm iban̄a ọkpọsọn̄ utom emi nditọete nnyịn ẹmi ẹbuanade ke nditịm mbono emi ẹnamde.
4 Ndidiomi man ediwak tọsịn ikọt Abasi ẹboho ke itie mbono kiet kiet oyom mbemiso ntịmidem ye eti ndutịm. Ndidiọn̄ọ nte ke ẹnam mme ndutịm mbono ke ima ima usụn̄ ekpenyene ndinụk nnyịn ndidiana kiet, man “ẹnam kpukpru n̄kpọ ke nde ye ke ido nte eyede.” (1 Cor. 14:40) Ẹnọ mme ntọt ye mme n̄kpọ editi ẹtienede mi man afo ekeme ndisịm itiembono ye ọyọhọ mben̄eidem ndidara udia eke spirit ye ebuana Christian.
Mbemiso Mbono
5 Nte mbon oro afo enịmde ukpepn̄kpọ Bible ye mbon eken oro ẹnyenede udọn̄ ẹyom un̄wam ndinam ọkpọkpọ ntịmidem man ẹdụk mbono oro? Se mmọ ẹkụtde ẹnyụn̄ ẹkopde ke adan̄aemi ẹdude do ekeme ndinụk mmọ ndikabade ndi mme andituak ibuot nnọ Jehovah. (1 Cor. 14:25) Mbiowo ẹkpenyene ndidiọn̄ọ owo ekededi oro oyomde un̄wam kaban̄a ufọkidụn̄ m̀mê n̄kpọisan̄, akpan akpan mbon usọn̄ ẹmi ẹbuanade ke esop, ndinyụn̄ n̄kụt ke ima ima usụn̄ nte ke ẹn̄wam mmọ ẹnyene se mmọ ẹyomde.—Gal. 6:10.
6 Nte ẹmenam ndutịm ufọkidụn̄ mbufo ẹma? Etisịm idahaemi, anaedi ewetn̄wed esop ama ọnọnọ babru Room Request eke san̄asan̄a udọn̄ ekededi ẹmi Kọmiti Utom Esop ama ọkọnọ unyịme aka nnennen adres mbono. Edieke edide ẹma ẹnọ fi ufọkidụn̄ ke idak ndutịm san̄asan̄a un̄wam ndien afo uyomke mmọ aba, mbọk tọt Itieutom Unọ Ufọkidụn̄ n̄kann̄kụk usọp usọp man ẹkeme ndimen mme ubet oro mfiak nnọ owo efen. Ẹkeme ndikụt adres emi ke isọn̄ isọn̄ page 2 ke babru Room Request.
7 Edieke afo oyomde ntọt aban̄a mbono, ewetn̄wed esop ekeme ndinọ fi adres akpan itie mbono, nte ẹkụtde ke edem babru Room Request.
8 Sia ẹnamde Itieutom Akpa Usọbọ ke mbono ndise mban̄a mme mbabuat idaha kpọt, nnyịn isịn udọn̄ inọ fi ndida okwommọ aspirin, ubọp unan, ibọk obufụp, se in̄wamde udia nditaha, ye mme mbiet n̄kpọ ntre ndi mbono edieke okụtde ete ke ekeme ndidi iyoyom mme utọ n̄kpọ oro. Edieke edide afo m̀mê owo ima fo enyene udọn̄ọ oro osụk afịnade, utọ nte mfịna esịt, ikịm an̄wan n̄kụhọ, ndisi, mbọk da mme ibọk oro ẹyomde di mbono man ese aban̄a mme mfịna ẹmi. Oyowụt eti ibuot andibuana ke ubon m̀mê n̄kpet n̄kpet ufan emi ọfiọkde aban̄a idaha odude ndidu ye owo emi, sia enye edidude ke eti idaha ndinọ un̄wam oro ẹyomde.
9 Mme ifet ndinọ ikọ ntiense ido nneme ẹkeme ndidemede nte afo anamde isan̄ aka onyụn̄ ọnyọn̄de mbono. Nte afo eyeben̄e idem ndibuana akpanikọ ye mbon en̄wen? Kpukpru nnyịn, esịnede nditọwọn̄, imekeme ndibuana ke ndinọ mme anamutom itie udep aran uwat, mme ọbọ etịbe usụn̄ ye mme owo eken oro afo osobode ke usụn̄ isan̄, tract. Mme ifet ẹyeberede ndinịm mme magazine, ndiye uduot n̄kpri n̄wed, m̀mê mme n̄wed eken nnọ mbon ẹnyenede udọn̄. Ben̄e idem ndinọ mbon ẹmi ẹkemede ndidi owo idisoboke ke ata ata usụn̄ ukwọrọikọ, ikọ ntiense ido nneme.
Ke Ini Mbono
10 Ke Friday ndutịm editọn̄ọ ke n̄kanika ebede 9 ke minit 20 usenubọk, ndien ke Saturday ye Sunday ke n̄kanika 9 usenubọk. Afo emekeme ndimụm n̄kpọitie nnịm nnọ n̄kpetn̄kpet mbonufọk fo kpọt m̀mê mbon ẹmi ẹsan̄ade kiet ke moto. Ẹyenịm itie oro ọfọnde ẹnọ nditọete iren ye iban oro ẹma ẹkesọn̄. Idịghe mmemmem n̄kpọ ndinịm san̄asan̄a ubet ke itiembono nnọ mbon oro ẹnyenede udọn̄ọ oro n̄kann̄kụk anamde etetịm ọsọn̄ ubọk m̀mê oro ibọk usọbọ ẹfịnade. Usen kiet kiet ke ini ọkpọn̄de itie emi afo etiede, mbọk tịm kụt ete ke kpukpru n̄kpọ fo ekem.
11 Nte afo ayana baptism ke mbono district emi? Kaban̄a ikpehe edinam usenubọk Saturday, ẹyemụm ikpehe n̄kpọitie kiet ẹnịm ẹnọ mbon baptism, ndien mme adaidaha ẹyeda fi usụn̄ ẹka itie emi. Edieke ekemede, mbọk du do mbemiso ikpehe edinam ọtọn̄ọde. San̄a ye Bible, n̄wedikwọ, ọfọn̄ ukwọhọdeidem fo, ye ọfọn̄ uyeremmọn̄ oro owụtde iso o-bụt. Mbio ọfọn̄ukot emi esịbede-sịbe (mbio ọfọn̄ukot oro ẹsịbede ẹsio ke jeans etrede ke edọn̄ m̀mê ifụhi), ọfọn̄idem oro ẹwetde ufiet, ye mme ọfọn̄ ẹtiede ntre idotke ke utọ ukpono ukpono edinam emi. Mbiowo ẹmi ẹdụn̄ọrede mme mbụme ke n̄wed Utom Nnyịn ye mbon baptism ẹkpenyene ndikụt ẹte ke mme akpan n̄kpọ ẹmi ẹn̄wan̄a owo kiet kiet. Sia baptism edide idiọn̄ọ ọkpọkpọ uyakidem nnọ Jehovah Abasi, idotke mbon ẹyomde ndina baptism ẹmụm ubọk ke adan̄aemi ẹnade baptism.
12 Afo emekeme ndikama mme ukwak usio ndise, ukwak umụm n̄kpọ vidio, ye mme n̄kpọ umụmikọ ke mbono. Nte ededi, inaha nte ẹnịmde m̀mê nte ẹkamade mmọ ẹsịri usụn̄ ẹsan̄ade ẹbe, ẹbiọn̄ọ mbon en̄wen, m̀mê ndiwọn̄ọde ntịn̄enyịn n̄kpọn̄ ndutịm. Ana mmọ ẹda ke idemmọ—oro edi, owo ifakke ke ikan̄ ilektrik m̀mê ke ndutịm ukwak utịn̄ikọ. Idotke owo ndisuan etop mban̄a mbubehe usio ndise esie m̀mê ndisịn eben̄e nyom mbon ẹmi ẹdisiode ndise ke mbono.
13 Ke ntak ini ye edifere owo ke idem, N̄ka emeben̄e nnyịn ndida udia uwemeyo nnyịn ndi mbono kpukpru usen. Ata ediwak nditọete ẹmi ẹtienede ndausụn̄ emi ẹkụt nte ke ẹma ẹkesuana ẹka nduọkodudu uwemeyo, ke mmọ ẹsisụhọde ẹtie ye mme ubon mmọ ẹnyụn̄ ẹdia se mmọ ẹkedade ẹdi ke usen oro. Ediwak ẹdọhọ ẹte ke ifet ndiduọk odudu ke ini nduọkodudu uwemeyo nnyụn̄ mbiat ini efen efen ye nditọete iren ye iban esinen̄ede enem. Emi oyom edida udia nnyịn nto ufọk ndi. Nnyịn imeben̄e kpukpru owo oro ẹdidụkde ite ẹtiene item emi.
14 Nte afo emekeme ndinọ idem unyịme unyịme ndin̄wam ndinam itiembono asana ke ẹma ẹkekụre mme ikpehe edinam ke usen kiet kiet? Mîdịghe nte afo emekeme ndinam utom ke kiet ke otu itieutom eken ke mbono oro? Edieke ekemede ndin̄wam, mbọk di Itieutom Utom Unyịmesịt ke mbono oro. Ẹyedara n̄kpri nditọwọn̄ ndinam utom ke idak ndausụn̄ ete m̀mê eka mmọ m̀mê akamba owo efen oro odotde. Ke akpanikọ, kpukpru owo ẹkeme ndin̄wam ndinam itiembono asana ebe ke ndikụt ẹte ke ẹtan̄ mbio ekededi ẹnyụn̄ ẹduọn̄ọ mmọ nte odotde.
15 Nnyịn imesibọ nti ndausụn̄ kaban̄a ọfọn̄ ye ukamaidem emi odotde ke mme mbono nnyịn. Ke uwụtn̄kpọ: Nnyịn imenyene ndausụn̄ kaban̄a emi ke mme esịne-esịt Utom Obio Ubọn̄ Nnyịn, imenyene mme uwụtn̄kpọ ye mme ndise ke mme n̄wed nnyịn, ndien ke edide akpan n̄kpọ akan, nnyịn imenyene se Jehovah etịn̄de ke Bible. (Rome 12:2; 1 Tim. 2:9, 10) Mme owo ẹdiọn̄ọ mbon ẹmi nnyịn idide ye ntak emi nnyịn ibohode ke obio mmọ. Ntem, ọfọn̄ ye ukamaidem nnyịn edi okopodudu ikọ ntiense ke idemesie. Ata ediwak ke otu ikọt Jehovah ẹnịm eti uwụtn̄kpọ ke afan̄ emi. Ke ini ke ini, nte ededi, nnyịn imesikụt edu ererimbot nte owụtde idem ke ọfọn̄ ye ukamaidem ndusụk mme owo ẹmi ẹdụkde mbono nnyịn. Ọfọn̄ osion̄ode owo ndido idem owụt esinam ẹyịk m̀mê owo edi owo eke spirit nte enye ọdọhọde. Ukamaidem oro asanade onyụn̄ owụtde iso o-bụt edi ata ediye n̄kpọ. Mme ibuot ufọk, ke ntre, ẹkpenyene nditịm mfiọk se mbonubon mmọ ẹdiomide ndisịne. Emi n̄ko abuana ke ini nnyịn ikpọn̄de itiembono. Ndidian kad idiọn̄ọ nnyịn mbemiso ye ke edinam usen okụrede anam ẹkaiso ẹbuan nnyịn ye Jehovah ye edisana ikọt esie.—Men Mark 8:37 domo.
16 Ẹma ẹnọ enyene-ọniọn̄ Edidem Solomon odudu spirit ndiwet nte ke “ndisịme ido eyịre ke esịt eyenọwọn̄” ye nte ke “eyen eke ẹyakde ẹnọ idem esie, esịn eka esie bụt.” (N̄ke 22:15; 29:15) Ke ini ikpehe edinam osụk akade iso, n̄kpri Ntiense ẹmi owo mîsehe enyịn ẹsitịmede nditọete iren ye iban ẹmi ẹsidomode ndibọ ufọn nto edinam mbono. Ana in̄wan̄în̄wan̄ nte ke mme uyen ẹmi isibọhọ ufọn ito ndutịm eke spirit ẹmi ẹtịmde ẹnọ mmọ. Sia mme ete ye eka ẹdinamde ibat inọ Jehovah kaban̄a mme edu nditọ mmọ, ete m̀mê eka ekeme ndikụt nte ke nditọ imọ isịnke ntịme ndien ke mmọ ke ẹkpan̄ utọn̄ ẹnọ item Jehovah, n̄kukụre edieke nditọ ẹtiede ye mmọ. Mme adaidaha ẹyeka ẹbịne mbon ẹmi ẹwọn̄ọrede ntịn̄enyịn mbon en̄wen ẹyenyụn̄ ẹben̄e mmọ ẹte ẹtre ndinam ntre, ẹtide mmọ ke mfọnido ndikpan̄ utọn̄ nnọ edinam.
17 Sia nnyịn isidarade mbon an̄wa ke mme mbono nnyịn, owụt eti ibuot ndikpeme idem kaban̄a nditọwọn̄ ye mme ọkpọkpọ inyene. Nditọ nnyịn ẹdi ọsọn̄urua enọ ẹtode Jehovah. Edi nnyịn imọdiọn̄ọ ite ke ererimbot owụt edu Satan eke edida owo nnam udia. Ntem, mbọk fiọk ebiet emi nditọ fo ẹdude kpukpru ini. N̄ko, ukwak usio ndise, ekpatubọk, ye mme ọsọn̄urua n̄kpọ eken ẹkpenyene ndidu ye afo kpukpru ini kûnyụn̄ ukpọn̄ mmọ ke n̄kpọitie. Kụt ete ke ọmọkọbi moto fo, ndien ke emenịm mme inyene fo ke itie udọn̄ mbiomo mîdịghe akama mmọ asan̄a. Emi oyosụhọde idomo owo ndibiat moto fo.
18 Itieutom Unọ Ufọkidụn̄ n̄kann̄kụk eben̄e idem ndin̄wam fi edieke osobode mfịna ye ufọkidụn̄ fo. Mbọk tọt Itieutom Unọ Ufọkidụn̄ ban̄a mfịna ekededi ke adan̄aemi afo osụk odude ke mbono. Nditọete ẹmi ẹyekop inemesịt ndin̄wam fi ọkọk mfịna oro man afo ekeme ndika iso n̄kop inem mbono oro.
19 Edi n̄kpọ nsịnudọn̄ ndikụt nditọete iren ye iban ẹwetde n̄kpọ ke ini mme ikpehe edinam mbono ẹkade iso. Mbio mbio n̄kpọ editi ẹyen̄wam fi owụk ntịn̄enyịn onyụn̄ ada mme akpan n̄kpọ esịn ke ekikere. Ndidụn̄ọde mme n̄kpọ editi ẹmi ke ukperedem ye ubon mîdịghe ye mme ufan fo ẹyenam fi etie ekere mme akpan n̄kpọ mbono oro man okûfre mmọ.
20 Ikọt Jehovah kpukpru ini ẹsitat ubọk nditịp n̄kpọ nsịn kaban̄a mme ufọn ukara Abasi. (Ex. 36:5-7; 2 Chron. 31:10; Rome 15:26, 27) Ẹda mme etịbe unyịmesịt fo ẹse ẹban̄a mme ubiatokụk abuanade edise mban̄a mme ikpọ itie ẹdade ẹnịm mbono. Edieke ọnọde etịbe fo ebe ke babru ubọ okụk ban̄k, mbọk nam enye edi se ẹkpede ẹnọ “Watch Tower.”
21 Nte ẹwetde ke Amos 3:7, Jehovah ọdọhọ ke imọ ‘idinamke baba n̄kpọ kiet, ibọhọke imọ iyarade uduak imọ inọ ikọt imọ mme prophet.’ Nte ‘Andiyarade ndịben̄kpọ,’ Jehovah ama anam ẹwet mme ntịn̄nnịm ikọ oro ẹsude ọyọhọ ọyọhọ ye nnennen nnennen. (Dan. 2:28, 47) Ẹyekụt mme utịbe utịbe un̄wọn̄ọ esie ẹsude. Mbono District “Ntịn̄nnịm Ikọ Abasi” eke 1999 ọyọsọn̄ọ mbuọtidem fo ke mme un̄wọn̄ọ Abasi. Tịm kpan̄ utọn̄ ke se Jehovah etịn̄de ọnọ fi. Da se afo edikụtde onyụn̄ okopde nam n̄kpọ—ke utom ukwọrọikọ, ke esop, ye ke ọkpọkpọ uwem fo. Nnyịn imeben̄e akpakịp edidiọn̄ Jehovah ke kpukpru ndutịm fo ndidụk ofụri usen isek isek udia eke spirit emi!
[Se Ẹwetde ke Ikpọ Abisi ke page 3]
Diomi ndidụk kpukpru usen Friday, Saturday, ye Sunday!