Ukpepn̄kpọ 8

Uwem Ubon Oro Enemde Abasi Esịt

Nso idi itie ebe ke ubon? (1)

Didie ke ebe akpanam n̄kpọ ye n̄wan esie? (2)

Mme mbiomo ewe ke ete enyene? (3)

Nso idi udeme an̄wan ke ubon? (4)

Nso ke Abasi oyom oto ete ye eka ye nditọ? (5)

Nso idi ekikere Bible kaban̄a edidianade ntie ye kaban̄a usiondọ? (6, 7)

1. Bible ọdọhọ ke ebe edi ibuot ubon esie. (1 Corinth 11:⁠3) Ana ebe enyene n̄wan kiet kpọt. Mmọ nte odotde ẹkpenyene ndidọ ndọ nte ekemde ye ibet.​—⁠1 Timothy 3:2; Titus 3:⁠1.

2. Ebe ekpenyene ndima n̄wan esie kpasụk nte enye amade idemesie. Enye ekpenyene ndinam n̄kpọ ye n̄wan esie ke usụn̄ oro Jesus anamde n̄kpọ ye mme anditiene enye. (Ephesus 5:​25, 28, 29) Enye ikpenyeneke ndiyịbi n̄wan esie m̀mê ndinam n̄kpọ ye enye ke idiọk usụn̄ ekededi. Utu ke oro, ebe ekpenyene ndiwụt enye ukpono ye uku.​—⁠Colossae 3:19; 1 Peter 3:⁠7.

3. Ete ekpenyene ndinam utom ọkpọsọn̄ man ese aban̄a ubon esie. Ana enye ọnọ n̄wan ye nditọ esie udia, edisịnen̄kpọ, ye itieidụn̄. Ana ete n̄ko ọnọ ubon esie mme n̄kpọ eke spirit oro ẹyomde. (1 Timothy 5:⁠8) Enye ada usụn̄ ke ndin̄wam ubon esie ndikpep n̄kpọ mban̄a Abasi ye mme uduak Esie.​—⁠Deuteronomy 6:​4-9; Ephesus 6:⁠4.

4. N̄wan ekpenyene ndidi eti andin̄wam nnọ ebe esie. (Genesis 2:18) Enye ekpenyene ndin̄wam ebe esie ke nditeme nnyụn̄ n̄kpep nditọ mmọ. (Mme N̄ke 1:⁠8) Jehovah oyom n̄wanndọ ese aban̄a ubon esie ke ima ima usụn̄. (Mme N̄ke 31:​10, 15, 26, 27; Titus 2:​4, 5) Enye ekpenyene ndinyene ntotụn̄ọ ukpono nnọ ebe esie.​—⁠Ephesus 5:​22, 23, 33.

5. Abasi oyom nditọ ẹkop uyo mme ete ye eka mmọ. (Ephesus 6:​1-3) Enye odori enyịn ndikụt mme ete ye eka ẹtemede ẹnyụn̄ ẹnen̄ede nditọ mmọ. Oyom ete ye eka ẹbiat ini ye nditọ mmọ ẹnyụn̄ ẹkpep Bible ye mmọ, ẹsede ẹban̄a mme udọn̄ mmọ ke n̄kan̄ eke spirit ye ke n̄kan̄ eke ntụk. (Deuteronomy 11:​18, 19; Mme N̄ke 22:​6, 15) Mme ete ye eka ikpedehede itụnọ nditọ mmọ ke usụn̄ etiede nsọn̄ido nsọn̄ido m̀mê mfiomo mfiomo.​—⁠Colossae 3:⁠21.

6. Ke ini mme nsan̄andọ ẹnyenede mfịna edidu ọtọkiet ke emem, mmọ ẹkpenyene ndidomo ndida item Bible nsịn ke edinam. Bible akpak nnyịn ete iwụt ima inyụn̄ ifen inọ. (Colossae 3:​12-14) Ikọ Abasi isịnke udọn̄ inọ edidianade ntie nte usụn̄ ndikọk n̄kpri mfịna. Edi n̄wan ekeme ndimek ndikpọn̄ ebe esie edieke (1) ebe ke nsọn̄ibuot esịnde ndin̄wam ubon esie, (2) ebe etiede afai afai akaha tutu nsọn̄idem ye uwem an̄wan ẹdidu ke itiendịk, m̀mê (3) ebeubọk ubiọn̄ọ esie mîyakke n̄wan emi atuak ibuot ọnọ Jehovah.​—⁠1 Corinth 7:​12, 13.

7. Mme nsan̄andọ ẹnyene ndinam akpanikọ nnọ kiet eken. Efịbe edi idiọkn̄kpọ oro owo anamde adian Abasi onyụn̄ anamde adian nsan̄andọ esie. (Mme Hebrew 13:⁠4) Ebuana idan̄ ẹmi ẹwọrọde ẹkpọn̄ ndọ edi n̄kukụre isọn̄ N̄wed Abasi ọnọ usiondọ oro ayakde ẹfiak ẹdọ ndọ. (Matthew 19:​6-9; Rome 7:​2, 3) Jehovah asasua enye ke ini mme owo ẹsiode ndọ ye unana isọn̄ N̄wed Abasi ẹnyụn̄ ẹdọde owo efen.​—⁠Malachi 2:​14-16.

[Mme ndise ke page 16, 17]

Abasi odori enyịn ndikụt mme ete ye eka ẹtemede nditọ mmọ ẹnyụn̄ ẹnen̄ede mmọ

[Ndise ke page 17]

Ima ima ete ọnọ ubon esie n̄kpọ ke n̄kan̄ obụk ye ke n̄kan̄ eke spirit