Ọfọn̄ ye Ukamaidem Oro Ẹdotde
1 “Kpukpru irenowo, idem ye n̄kpri nditọiren ẹsịn urụkitọn̄. Kpukpru iban, n̄kpri ye ikpọ, ẹsịne ewụra m̀mê isọn̄ọfọn̄. Owo ikekwe ẹsịnede Jeans m̀mê ọfọn̄idem ndomokiet oro owo mîsịnke urụkitọn̄. Kpukpru owo mi ẹkop idatesịt.” Ntre ke mbụk n̄kpọntịbe kiet ọkọdọhọ. Ewe otu ke enye eketịn̄ aban̄a? Nte ekedi mboho ukaraidem? Edinam mbre mbuba? Kọnsat ikwọ rock? Baba-o! Enye eketịn̄ aban̄a otu nditọete ke akamba mbono district isua oko.
2 Ke obio efen oro ẹkenịmde akamba mbono, ọkọmbụk n̄kpọntịbe kiet ama etịn̄ se itienede mi aban̄a Mme Ntiense: “Kpukpru irenowo ẹsana ẹnyụn̄ ẹsịne kod ye urụkitọn̄. Iban ẹsịne n̄kpọ nte odotde onyụn̄ enyenede uku.” Ndanse efen, emi edide ekpeme ebiet ọkọdọhọ ete: “Mbufo ẹdi mbon emi ẹnyenede nti edu, ẹwụtde ukpono, ẹsanade, ẹnyụn̄ ẹyede. Se n̄kụtde ẹye. Ke ererimbot emi edehede mi, mbufo ẹmedomo ukeme ndisana!” Nso nti ikọ ntiense ke ẹtịn̄ ntem ẹban̄a nnyịn! Nte esịt inemke nnyịn ke emi ẹkemede nditịn̄ nti ikọ ntre mban̄a otu nditọete nnyịn? Nte ededi, kpukpru owo ẹma ẹtịp n̄kpọ ẹsịn ke nti etop emi ebe ke ndinịm eti uwụtn̄kpọ ke ukamaidem.
3 Ẹdiọn̄ọ nnyịn ke ofụri ererimbot nte mbon oro ẹdide ata isio ke ukamaidem. (Mal. 3:18) Ntak-a? Koro nnyịn itienede item N̄wed Abasi oro nte ‘isan̄a ke sụn̄-sụn̄ ido, isịne n̄kpọ eke owụtde bụt ye eti ibuot, koro oro odotde ye mbon emi ẹdọhọde ẹte imenyene uten̄e Abasi.’—1 Tim. 2:9, 10.
4 Nso ke Ọfọn̄ ye Ukamaidem Fo Ẹwụt? Se nnyịn isịnede ye nte nnyịn isịnede ẹtịn̄ ikọ in̄wan̄-in̄wan̄ ẹban̄a nnyịn—se inịmde ke akpanikọ, ido nnyịn, ye uduak nnyịn. Ido usịnen̄kpọ oro nnyịn imekde etịn̄ utọ owo oro nnyịn idide ye se nnyịn isịnde udọn̄ inọ. Nnyịn ikpedehe-de isịn udọn̄ inọ idiọk ekikere ye edu oro ọwọrọde etop ke ererimbot. Se ibehede nnyịn idịghe m̀mê ido usịnen̄kpọ ekededi etie obufa obufa akaha, edi edi m̀mê enye odot ye owo oro ọdọhọde ke idi asan̄autom Abasi. (Rome 12:2) Utu ke ndimek usịnen̄kpọ oro owụtde edu nda-ke-idem m̀mê owụtde oburobụt usụn̄ uwem, nnyịn iyom ndiwụt nte ke nnyịn imenen̄ede ‘inọ Abasi ubọn̄.’—1 Pet. 2:12.
5 Ke ndusụk idaha, obufa owo, owo oro mînyeneke ifiọk, m̀mê owo oro ememde ke n̄kan̄ eke spirit ekeme ndinyịme ọfọn̄ ye ukamaidem ekededi oro ererimbot osiode edi, ye unana edibem iso n̄kere nte enye editụkde Jehovah ye esop esie. Kpukpru nnyịn imekeme ndidụn̄ọde idem nse m̀mê nnyịn imayak ekikere ererimbot akara nnyịn. Nnyịn imekeme ndika mbịne eyenete eren m̀mê n̄wan emi ẹkponode, onyụn̄ ọkọride esịm ọyọhọ idaha ke n̄kan̄ eke spirit ikọdọhọ etịn̄ nte enye esede ọfọn̄ ye ukamaidem nnyịn, ndien ekem inen̄ede ikere iban̄a mme ekikere oro enye ọnọde.
6 Ndusụk owo ẹsisọsọp ẹnyịme nte ke mmimọ ikpenyene ndikpeme nte isịnede n̄kpọ ke ini idụkde mbono. Edi ekem mmọ ẹsụhọde idaha usịnen̄kpọ mmọ ke ini nduọkodudu ke edinam usen ama okokụre. Mụm n̄kokon̄ idaha ido uwem oro odotde ye mme asan̄autom Christian kama. (2 Cor. 6:3, 4) Ke ebiet ekededi oro mme owo ẹkụtde nnyịn, kad mbenọfọn̄ mbono nnyịn ọkọrọ ye ọfọn̄ ye ukamaidem nnyịn ẹnam ẹdiọn̄ọ nnyịn nte Mme Ntiense Jehovah. Ntem usịnen̄kpọ nnyịn ekpenyene ndiye nnyụn̄ ndot kpukpru ini, ẹwụtde nte ke nnyịn ‘idịghe eke ererimbot.’—John 15:19.
7 Ẹyak nnyịn inam kpukpru se ikemede ke Mbono District “Ifịk Ifịk Mme Anditan̄a Obio Ubọn̄” isua emi ndiwụt nte ke nnyịn idi ‘ndisana ikọt Jehovah Abasi nnyịn.’ Eti etop oro idinyenede eyetịp n̄kpọ esịn ke “itoro, ye enyịn̄, ye ubọn̄” Jehovah.—Deut. 26:19.
[Ekebe ke page 6]
Nte Ẹkpenọde Jehovah Ubọn̄:
■ Sịne n̄kpọ ke usụn̄ oro odotde asan̄autom Abasi.
■ Fep mme ido unam n̄kpọ oro ẹwụtde edu ererimbot.
■ Wụt nsụhọdeidem, emi owụtde eti ibuot.