Ndin̄wam Mbon Efen Ẹnọ Jehovah Ubọn̄
1 Ke ẹtan̄a akpan etop ẹnọ mme owo ke ofụri isọn̄: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enye emi okobotde enyọn̄ ye isọn̄ ye inyan̄ ye idịm mmọn̄.” (Edi. 14:6, 7) Edi akwa ifet nnyịn ndibuana ke editan̄a etop oro. Oyom mme owo ẹfiọk nso ẹban̄a Jehovah man mmọ ẹten̄e enye ẹnyụn̄ ẹtuak ibuot ẹnọ enye?
2 Enyịn̄ Esie: Oyom mme owo ẹkeme ndifiọk ukpụhọde ke ufọt ata Abasi ye ediwak nsunsu abasi oro ẹtuakde ibuot ẹnọ mfịn. (Deut. 4:35; 1 Cor. 8:5, 6) Ke akpanikọ, mme andiwet Bible ẹwet akwa enyịn̄ Jehovah awak ebe utịm ike-7,000. Ke adan̄aemi odotde nnyịn iwụt mbufiọk kaban̄a ini emi ikpadade enyịn̄ Abasi, nnyịn ikpenyeneke ndidịp enyịn̄ emi m̀mê ndikop bụt ndikot enye. Edi uduak Abasi nte ofụri ubonowo ọfiọk enyịn̄ imọ.—Ps. 83:18.
3 Edu Esie: Man ẹnọ Jehovah ubọn̄, oyom mme owo ẹfiọk utọ Abasi emi enye edide. Ana nnyịn inam mmọ ẹfiọk n̄wọrọnda ima, akakan ọniọn̄, mfọnmma unenikpe, ye ata ọkpọsọn̄ odudu esie, ọkọrọ ye mbọm, ima-mfọnido, ye mme utịbe utịbe edu eken. (Ex. 34:6, 7) Ana mmọ n̄ko ẹkpep ndinyene eti mbak Abasi, nditen̄e enye, ẹfiọkde ẹte ke uwem mmimọ ọkọn̄ọ ke ndinyene unyịme Jehovah.—Ps. 89:7.
4 Ndisan̄a N̄kpere Abasi: Man ẹnyene edinyan̄a ke ini ubiereikpe Abasi emi edide, ana mme owo ẹkot enyịn̄ Jehovah ke mbuọtidem. (Rome 10:13, 14; 2 Thess. 1:8) Emi abuana se ikande sụk edifiọk enyịn̄ Abasi ye mme edu esie. Ana nnyịn in̄wam mme owo ẹnyene ọkpọkpọ itie ebuana ye Jehovah, ẹbuọtde idem ye enye ke ofụri esịt mmọ. (N̄ke 3:5, 6) Nte mmọ ẹdade se mmọ ẹkpepde ẹsịn ke edinam, ẹbọn̄de akam ofụri esịt ẹnọ Abasi, ẹnyụn̄ ẹkụtde nte enye an̄wamde mmimọ, mbuọtidem mmọ ọyọkọri, an̄wamde mmọ ndisan̄a n̄kpere Jehovah.—Ps. 34:8.
5 Nnyịn ikpakam itan̄a enyịn̄ Abasi ifịk ifịk inyụn̄ in̄wam mbon efen ẹnyene ọyọhọ mbuọtidem ke enye ẹnyụn̄ ẹten̄e enye. Nnyịn imekeme ndin̄wam ediwak owo efen efen ndifiọk Jehovah nnyụn̄ nnọ enye ubọn̄ nte “Abasi edinyan̄a” mmọ.—Ps. 25:5.