Nam Se Ifọnde Nyụn̄ Buana Se Enyenede ye Mbon Efen
1 Dorcas ‘ọkọyọhọ ye nti edinam ye mme enọ mbọm.’ (Utom 9:36, 39) Edu ntatubọk esie ama anam mbon oro ẹkediọn̄ọde enye ẹma enye onyụn̄ anam Jehovah Abasi nde ama enye. Mme Hebrew 13:16 ọdọhọ ete: “Ẹkûfre edinam eti n̄kpọ ye edibuana n̄kpọ ye mbon efen, koro Abasi enen̄ede enem esịt aban̄a mme utọ uwa oro.” Didie ke ikeme ndinam se ifọnde nnyụn̄ mbuana se inyenede ye mbon efen mfịn?
2 Usụn̄ kiet emi ikemede ndida ufọn nsọk mbon efen edi ndibuana “inyene” nnyịn ye mmọ. (N̄ke 3:9) Okụk oro nnyịn isitịpde man ẹda ẹnam utom ofụri ererimbot anam ẹkeme ndibọp mme Ufọkmbono Obio Ubọn̄, ikpọ Itie Mbono, ye mme ufọkutom n̄kọk itieutom ke ofụri ererimbot. Ntatubọk nnyịn an̄wam ediwak miliọn owo ẹbọ ufọn ẹto mme item ukara Abasi ye ebuana eke spirit oro anamde owo ọkọri.
3 Ndinọ Ndọn̄esịt: Ke ini akwa unọmọ etịbede, ikọt Jehovah ẹsiben̄e idem ‘ndinam se ifọnde’ nnọ nsan̄a mme andinịm ke akpanikọ ọkọrọ ye mbon efen oro mînịmke ke akpanikọ. (Gal. 6:10) Ke ufọkutom unam mmọn̄ibọk ama okotop obomo ke France, ebe ye n̄wan kiet emi ẹkedụn̄de ẹkpere ufọkutom oro ẹkedọhọ ẹte: “Nditọete nnyịn ẹma ẹsọsọp ẹdin̄wam ndinam ufọk nnyịn ye mme ufọk eken ke okụre oro ẹsana. Idem ama akpa mme mbọhọidụn̄ nnyịn ndikụt nte ata ediwak owo ẹdide ẹdin̄wam.” Eyenete an̄wan efen ama adian do ete: “Mbiowo ẹma ẹdin̄wam nnyịn. Mmọ ẹma ẹdinọ nnyịn nsịnudọn̄. Ke nditịm ntịn̄, nnyịn ima iyom nsịnudọn̄ emi ikan mme n̄kpọ obụkidem.”
4 Ke adan̄aemi ediwak usụn̄ ẹdude nnyịn ndinam se ifọnde ye mme mbọhọidụn̄ nnyịn, mfọnn̄kan usụn̄ ndin̄wam mmọ edi ndibuana ọsọn̄urua ifiọk akpanikọ ye mmọ, ndien emi esịne “idotenyịn nsinsi uwem” emi Jehovah ọkọn̄wọn̄ọde. (Titus 1:1, 2) Etop Bible ada ata ndọn̄esịt ọsọk mbon oro ẹfụhọde ẹban̄a idiọkn̄kpọ mmọ ye idiọk idaha ererimbot emi. (Matt. 5:4) Nnyịn ikpakam inam se ifọnde inyụn̄ ibuana se inyenede ye mbon efen ke ini ubọk nnyịn ekemede ndinam ntre.—N̄ke 3:27.