Eti Usụn̄ N̄kọkibuot

KE INI afo etịn̄de ikọ, mme andikpan̄ utọn̄ nnọ fi ẹnyene ọyọhọ unen ndibụp: “Ntak emi edide akpanikọ? Nso iwụt nte ke akpana ẹnịm se etịn̄ikọ etịn̄de?” Nte andikpep, edi mbiomo fo ndibọrọ mme utọ mbụme ntre m̀mê ndin̄wam mme andikpan̄ utọn̄ nnọ fi ndinyene mme ibọrọ. Edieke se afo etịn̄de enen̄erede edi akpan n̄kpọ ke n̄kọkibuot fo, kụt ete ke imọnọ mme andikpan̄ utọn̄ nnọ fi nti ntak ndinịm se afo etịn̄de. Emi eyetịp esịn ke ndinam ẹnyịme se afo etịn̄de.

Apostle Paul ama esitịn̄ ikọ ye mbukpek. Ke adade mfan̄a oro esịnede ifiọk, eti n̄kọkibuot, ye mbukpek oro otode esịt, enye ama odomo ndinam mbon oro enye eketịn̄de ikọ ọnọ ẹkpụhọde ekikere. Enye ama enịm eti uwụtn̄kpọ ọnọ nnyịn. (Utom 18:4; 19:8) Edi akpanikọ, ndusụk mbon udọnikọ ẹsikama mbukpek ẹbian̄a mme owo. (Matt. 27:20, NW; Utom 14:19, NW; Col. 2:4) Mmọ ẹkeme nditọn̄ọ ye ukwan̄ ekikere, ẹda mme ntọt ẹto mbon idiọkesịt, ẹkọk ibuot enyọn̄ enyọn̄, ẹfụmi mme n̄kpọ oro ẹtuahade ye ekikere mmọ, mîdịghe ẹdemede ntụk utu ke ndikọk ibuot. Nnyịn ikpenyene ndikpeme man ifep kpukpru utọ usụn̄ edinam oro.

Enen̄ede Ọkọn̄ọ ke Ikọ Abasi. Se nnyịn ikpepde inyeneke ndidi ekikere idem nnyịn. Nnyịn idomo ndibuana se nnyịn ikpepde ke Bible ye mbon en̄wen. Ke afan̄ emi, nnyịn imọbọ akamba un̄wam ito mme n̄wed otu asan̄autom emi anamde akpanikọ, onyụn̄ enyenede ọniọn̄. Mme n̄wed emi ẹsịn udọn̄ ẹnọ nnyịn nditịn̄ enyịn ndụn̄ọde N̄wed Abasi. Nte utịp, nnyịn idụri ntịn̄enyịn mme owo iwụt Bible, idịghe ye uduak ediwụt nte ke nnyịn imenen, edi ke ndida nsụhọdeidem nyak mmọ ke idemmọ ẹkụt se enye etịn̄de. Nnyịn imenyịme ye Jesus Christ, emi ọkọdọhọde ke akam ọkọbọn̄de ọnọ Ete esie ete: “Ikọ Fo edi akpanikọ.” (John 17:17) Odudu ndomokiet efen idụhe ke ebede Jehovah Abasi, Andibot enyọn̄ ye isọn̄. Nsọn̄ọ oro n̄kọkibuot nnyịn enyenede ọkọn̄ọ ke mmọ ndito Ikọ esie.

Ndusụk ini afo emekeme ndinyene nneme ye mme owo oro mîmeheke ye Bible m̀mê oro mîdaha enye nte Ikọ Abasi. Afo ekpenyene ndida mbufiọk mbiere ini ye nte akpadade itie Bible edisịn. Edi afo ekpenyene ndidụri ntịn̄enyịn mmọ n̄wụt okopodudu itie ubọ ntọt emi usọp usọp nte ekekeme.

Nte afo ekpenyene ndibiere ke sụk edikot akpan itie N̄wed Abasi ọyọnọ nsọn̄ọ oro owo mîkemeke ndifan̄a? Inen̄ekede idi ntre. Ekeme ndiyom afo odụri ntịn̄enyịn aka udọn̄ikọ ndiwụt nte ke itie N̄wed Abasi oro enen̄ede ọsọn̄ọ se afo etịn̄de. Edieke afo n̄kukụre osiode edumbet ke itie N̄wed Abasi owụt ndien udọn̄ikọ oro inemeke n̄kpọ iban̄a ibuot nneme oro, ekeme ndidi oyoyom mme uyarade efen efen. Ekeme ndiyom afo ada mme itie N̄wed Abasi efen oro ẹnyenede ebuana ye se enemede ndida n̄wụt otuowo fo nte ke se afo etịn̄de enen̄ede ọkọn̄ọ ke N̄wed Abasi.

Fep nditịn̄ ikọ mbe se N̄wed Abasi owụtde. Kot enye ye ntịn̄enyịn. Itien̄wed oro ekeme nditịn̄ n̄kpọ ntatara ntatara mban̄a ibuot nneme oro afo enemede. Edi, man ẹnyịme n̄kọkibuot fo, ana mme andikpan̄ utọn̄ nnọ fi ẹkeme ndikụt nte enye ọsọn̄ọde se afo etịn̄de.

Ndida Mme Uyarade Efen Efen Nsọn̄ọ. Ke ndusụk idaha, ekeme ndifọn ada mme uyarade ẹtode ebiet oro ẹkemede ndiberi edem ke ebede Bible man an̄wam mme owo ndikụt ọniọn̄ oro odude ke N̄wed Abasi.

Ke uwụtn̄kpọ, afo emekeme ndiwụt ekondo oro ẹkụtde ke enyịn nte uyarade ke Andibot odu. Afo emekeme ndidụri ntịn̄enyịn n̄wụt mme oto-obot ibet, utọ nte odudu oro odụride n̄kpọ aka isọn̄, onyụn̄ ọkọk ibuot ete ke mme utọ ibet oro ndidu ẹwụt ẹte ke Ọnọ-Ibet odu. N̄kọkibuot fo eyenen edieke enye odude ke n̄kemuyo ye se idude ke Ikọ Abasi. (Job 38:31-33; Ps. 19:1; 104:24; Rome 1:20) Utọ uyarade oro ọfọn koro enye owụtde ete ke se Bible etịn̄de odu ke n̄kemuyo ye mme n̄kpọ oro ẹkụtde ke enyịn.

Nte afo odomo ndin̄wam owo ọfiọk ke Bible enen̄ede edi Ikọ Abasi? Afo emekeme nditịn̄ se nditọ ukpepn̄kpọ oro ẹdọhọde ke Bible edi Ikọ Abasi ẹtịn̄de, edi nte oro ọnọ nsọn̄ọ? Mme utọ ikọ ntre ẹdinyene ufọn inọ sụk mme owo oro ẹkponode nditọ ukpepn̄kpọ oro. Nte afo emekeme ndida ifiọk ntaifiọk n̄wụt nte ke Bible edi akpanikọ? Edieke afo adade mme ekikere anana-mfọnmma ntaifiọk nte nsọn̄ọ fo, afo edibọp se afo etịn̄de odori ke itiat idakisọn̄ oro mîsọn̄ke idem. Ke n̄kan̄ eken, edieke afo ọtọn̄ọde ye Ikọ Abasi ndien ekem anyan ubọk owụt ndụn̄ọde ifiọk ntaifiọk oro owụtde nte Bible enende, do se afo etịn̄de eyetịm ọkọn̄ọ ke eti itiat idakisọn̄.

Se ededi oro afo odomode ndisio n̄wụt, nọ uyarade oro ekemde. Udomo uyarade oro ẹyomde edikọn̄ọ ke otuowo fo. Ke uwụtn̄kpọ, edieke afo enemede ukperedem ini nte ẹtịn̄de ke 2 Timothy 3:1-5, afo emekeme ndidụri ntịn̄enyịn otuowo fo n̄wụt mbụk n̄kpọntịbe oro ẹtịmde ẹfiọk, oro owụtde nte ke mme owo “ẹnana ima uduot owo.” Uwụtn̄kpọ kiet oro ekeme ndikem ndisọn̄ọ nte ke ikpehe idiọn̄ọ ukperedem ini enye emi ke osu idahaemi.

Ndimen n̄kpọ iba oro ẹnyenede ndusụk mbiet ndomo esiwak ndin̄wam. Edimen ndomo oro ke idemesie inamke n̄kpọ enyene nsọn̄ọ; enyene ndimen se Bible ke idemesie etịn̄de nnọ nsọn̄ọ. Edi edimen ndomo oro ekeme ndin̄wam owo ndikụt ifiọk oro odude ke se etịn̄de. Ke uwụtn̄kpọ, emekeme ndida utọ uwụtn̄kpọ emi nnam n̄kpọ ke ini anamde an̄wan̄a nte ke Obio Ubọn̄ Abasi edi ukara. Afo emekeme ndiwụt nte ke kpa nte edide ye ukara owo, Obio Ubọn̄ Abasi enyene mme andikara, mme andidu ke idak, mme ibet, ndutịm ukpe ikpe, ye ndutịm ubọ ukpep.

Emekeme ndida mme ata ifiọk n̄kpọntịbe n̄wụt ọniọn̄ oro odude ke edida item Bible nsịn ke edinam. Emekeme n̄ko ndida ọkpọkpọ ifiọk n̄kpọntịbe nsọn̄ọ se ẹtịn̄de. Ke uwụtn̄kpọ, ke ini afo owụtde owo ufọn edikot nnyụn̄ n̄kpep Bible, afo emekeme ndiwụt nte emi oforide uwem fo. Man esịn udọn̄ ọnọ nditọete esie, apostle Peter ama etịn̄ n̄kpọ aban̄a edikpụhọde mbiet, emi enye okokụtde. (2 Pet. 1:16-18) Paul n̄ko ama obụk mme ifiọk n̄kpọntịbe esie. (2 Cor. 1:8-10; 12:7-9) Nte ededi, afo ukpenyeneke ndibụk ọkpọkpọ ifiọk n̄kpọntịbe awak akaha man udûdụri ntịn̄enyịn nte mîdotke unọ idemfo.

Sia idaha ke uwem ye ekikere mme owo mîdịghe ukem ukem, ekeme ndidi uyarade oro anamde owo kiet enịm se afo etịn̄de ke akpanikọ idikemeke ndinam owo efen enịm. Ke ntre, kere ban̄a ekikere mme andikpan̄ utọn̄ nnọ fi ke ini ebierede usụn̄ n̄kọkibuot oro afo edidade ye nte afo editịn̄de mmọ. Mme N̄ke 16:23 ọdọhọ ete: “Esịt owo eti ibuot anam inua esie edi ọniọn̄: enye oyonyụn̄ ọbọrọ ke se n̄kpọk-inua esie ekpepde.”