Ntak Emi Ikpodụn̄ọrede Bible?

Ndi ọmọdiọn̄ọ se isịnede ke Bible? Idụhe n̄wed oro akanam ẹsuande awak ntem ke ererimbot. Mme owo oro ẹtode nsio nsio obio ẹnyịme ke etop esie esinọ ndọn̄esịt ye idotenyịn, n̄ko ke item esie esiwụt owo nte ẹkpedude uwem kpukpru usen. Edi ata ediwak owo inen̄ekede idiọn̄ọ se isịnede ke Bible. Edide emesika ufọkabasi m̀mê ukaha, anaedi esinen̄ede ọdọn̄ fi ndifiọk se isịnede ke Bible. Ẹsio ediye uduot ekpri n̄wed emi man an̄wam fi ọfiọk mme akpan n̄kpọ oro ẹdọn̄ọde ke Bible.

ỌYỌFỌN ọfiọk ndusụk akpan n̄kpọ aban̄a Bible mbemiso ọtọn̄ọde ndikot enye. Ẹkot Bible, Edisana N̄wed Abasi, ndien enye ọdọn̄ọ n̄kpri n̄wed 66, m̀mê ikpọdọhọ ke ẹbahade enye ẹsịn ke ikpehe 66, ọtọn̄ọde ke Genesis esịm Ediyarade.

Anie enyene Bible? Ata akpan mbụme edi emi. Edi akpanikọ nte ke n̄kpọ nte irenowo 40 ẹkewet Bible, mmọ ẹkeda n̄kpọ nte ufan̄ isua 1,600 ẹwet enye. Edi mmọ ikọdọhọke ke mmimọ inyene Bible. Kiet ke otu owo emi eketienede ewet Bible ọdọhọ ete: “Abasi ọkọnọ odudu ẹda ẹwet ofụri N̄wed Abasi.” (2 Timothy 3:16) Owo efen ewet ete: “Spirit Jehovah ada mi etịn̄ ikọ, uyo esie onyụn̄ odu mi ke edeme.” (2 Samuel 23:2) Emi owụt ke mme andikewet Bible emi ẹdọhọ ke Jehovah Abasi emi edide Akakan Andikara enyene Bible. Mme andikewet Bible emi ẹwụt ke Abasi oyom nnyịn isan̄a ikpere imọ.

Edi n̄kpọ en̄wen odu oro edinamde se idude ke Bible an̄wan̄a nnyịn. Oro edi, ana ifiọk ke ibuotikọ kiet odu ke ofụri Bible: Abasi edida Obio Ubọn̄ esie eke heaven iwụt ke imọ inyene unen ndikara ubonowo. Ke mme ibuotikọ oro ẹtienede, afo oyokụt ke ibuotikọ emi odu ke ofụri ikpehe Bible, ọtọn̄ọde ke Genesis esịm Ediyarade.

Ye emi ke ekikere, ẹyak ineme se isịnede ke Bible, kpa n̄wed emi ọwọrọde etop akan ke ererimbot.

a Ẹsiwet usenọfiọn̄ ke nsio nsio usụn̄. Nte ẹwetde usenọfiọn̄ ke ediye uduot ekpri n̄wed emi edi, E.N. adade aban̄a “Eyo Nnyịn” ndien M.E.N. ada aban̄a “Mbemiso Eyo Nnyịn.” Oyokụt emi ke utịt page kiet kiet, ke ebiet emi ẹwetde ini emi nsio nsio n̄kpọ ẹketịbede.