Ntak Iyomde Ẹnyan̄a Nnyịn

Toto ke eset, esidọn̄ mme owo ndikpodu uwem ke nsinsi, idọn̄ọke inyụn̄ isọn̄ke. Edi idụhe eke ekemede ndidu uwem ke nsinsi. Ikọ Job emi ẹkewetde n̄kpọ nte isua tọsịn ita emi ẹkebede osụk ededi akpanikọ tutu esịm mfịn.

Enen̄ede ọdọn̄ mme owo ke ofụri ererimbot ndidu uwem ke nsinsi. Bible ọdọhọ ke Abasi ama esịn owo nsinsi ini ke esịt. Emi ọwọrọ ke nte Abasi okobotde owo esinam ọdọn̄ nnyịn ndidu uwem ke nsinsi nnyụn̄ nyom ndifiọk se uwem nsinsi ediwọrọde. (Ecclesiastes 3:11) Sia edide ntre, ndi okpowụt ifiọk Abasi ima ndinam ọdọn̄ owo ndidu uwem ke nsinsi ke ini enye ọdiọn̄ọke ke utọ n̄kpọ emi ikemeke nditịbe? Emenen, edieke ọbọrọde ihih. Ikọ Abasi okot n̄kpa “asua” onyụn̄ ọdọhọ ke “ẹyesobo n̄kpa ẹfep.”—1 Corinth 15:26.

Kpukpru nnyịn imọdiọn̄ọ ke n̄kpa edi ata idiọk asua. Idụhe enyene-ibuot owo emi akpamade ndikpa. Ke ini ikụtde n̄kpọ emi ekemede ndinọ nnyịn unan m̀mê ekemede ndida nnyịn ibuot, imesifep, idịbe, mîdịghe ifehe. Ke ini idọn̄ọde, imesinam n̄kpọ man idem ọsọn̄ nnyịn. Imesinam ofụri se ikekeme man ifep mme n̄kpọ oro ẹkemede ndida nnyịn ibuot.

Ndi odu se ikpanamde inịm ke ẹyesobo n̄kpa ẹfep? Ih, odu. Jehovah Abasi emi okobotde kpukpru n̄kpọ, ikobotke nnyịn ididu uwem isua ifan̄ kpọt, ekem ikpa. N̄kpa idịghe uduak Abasi. Enye okoyom mme owo ẹdu uwem ke nsinsi ke isọn̄ emi, ndien enye esinam kpukpru se enye aduakde.—Isaiah 55:11.

Didie ndien ke ẹditre n̄kpa? Toto ke ata eset, mme owo ẹyom usụn̄ nditre n̄kpa edi ikemeke. Ke ẹsụk ẹyoyom usụn̄ tutu esịm emi. Ntaifiọk ẹsion̄o n̄kpinsịn ye ibọk ẹdi emi ẹkemede ndiwot ndusụk udọn̄ọ ke idem owo. Mmọ ẹkpep ediwak n̄kpọ ke idem owo ẹnyụn̄ ẹfiọk nte idem owo etiede. Ke ediwak itie, mme owo ẹdu uwem ẹbịghi akan nte ẹkesidude isua ikie emi ẹkebede. Edi mme owo ẹsụk ẹkpakpa. Onyụn̄ edi nte Bible ọdọhọde ete ke ‘kpukpru owo ke ẹfiak ke ntan.’—Ecclesiastes 3:20.

Ufọn idụhe ndiberi edem ke se mme owo ẹdomode ndinam man ẹsio n̄kpa ẹfep. Jehovah Abasi ananam ndutịm ndinyan̄a nnyịn nsio ke n̄kpa ndien owo emi enye adade anam emi edi Jesus Christ.