UKPEPN̄KPỌ 8

Nọ Uwụtn̄kpọ Emi Ekpepde Owo N̄kpọ

Matthew 13:34, 35

SE AKPANAMDE: Da se mme owo ẹdiọn̄ọde nọ uwụtn̄kpọ emi edikpepde mmọ n̄kpọ.

Da se mme owo ẹdiọn̄ọde nọ uwụtn̄kpọ. Nam nte Jesus akanamde, da n̄kpri n̄kpri n̄kpọ emi mme owo ẹdiọn̄ọde nọ uwụtn̄kpọ emi edikpepde mmọ se mmọ mîkọdiọn̄ọke m̀mê se mmọ mîkekereke-kere. Kûtịn̄ kpukpru se ọdiọn̄ọde aban̄a uwụtn̄kpọ oro tutu uwụtn̄kpọ emi okoyomde ndida n̄kpep owo n̄kpọ editetịmede owo. Tịn̄ n̄kukụre se idinamde se afo ekpepde ọsọp an̄wan̄a owo.

Se se ikade iso ke ererimbot kpukpru usen. Sikot mme n̄wed nnyịn, nyụn̄ kpan̄ utọn̄ ke ini nti mme andikpep Ikọ Abasi ẹkwọrọde ikọ. Wet mme uwụtn̄kpọ emi mmọ ẹnọde nịm, man ini ama ekem, akpada enye ekpep owo n̄kpọ n̄ko.
Kere ban̄a mbon emi etịn̄de ikọ ọnọ. Da mme n̄kpọ emi mme owo ẹmehede nọ uwụtn̄kpọ. Edi mbọk kûnọ uwụtn̄kpọ emi edifịnade owo, m̀mê enye emi edibiakde owo, mîdịghe anam owo bụt.
Kpep mme owo akpan n̄kpọ. Kûnọ uwụtn̄kpọ ke kpukpru n̄kpọ, nọ ke mme ebiet emi oyomde mme owo ẹkpep akpan n̄kpọ. Kûnọ uwụtn̄kpọ ke usụn̄ emi mme owo ẹditide uwụtn̄kpọ oro kpọt, edi ikam itịghi akpan n̄kpọ emi uwụtn̄kpọ oro ekekpepde mmọ.