UKPEPN̄KPỌ 4

Nam Itie Bible Emi Oyomde Ndikot Ọdọn̄ Owo Ndikop

Matthew 22:41-45

SE AKPANAMDE: Mbemiso okotde itie N̄wed Abasi, tịn̄ ikọ emi edinamde itien̄wed oro ọdọn̄ owo ndikop.

Diọn̄ọ ntak emi oyomde ndikot itie N̄wed Abasi. Ke ini oyomde ndikot Bible, tịn̄ ikọ emi edinamde mme owo ẹsọp ẹkụt akpan n̄kpọ emi afo oyomde mmọ ẹkpep.

Diọn̄ọ se itie Bible oro etịn̄de aban̄a. Edieke oyomde ndisiak owo emi eketịn̄de ikọ m̀mê owo emi ekewetde se oyomde ndikot, kụt ete ke enyịn̄ owo emi asiakde enen.
Wụt ke Bible edi Ikọ Abasi. Ke ini oyomde ndikot Bible nnọ mbon emi ẹnịmde ke Abasi do, nam mmọ ẹkụt ke Bible edi Ikọ Abasi, ke idụhe n̄wed emi etiede nte Bible.
Nam ọdọn̄ owo ndifiọk se Bible etịn̄de. Bụp mbụme emi ọdiọn̄ọde ke itie Bible emi edikotde ọyọbọrọ, mîdịghe tịn̄ mfịna emi mme owo ẹnyenede, emi ọdiọn̄ọde ke itie Bible oro ekeme ndin̄wam utọ mbon oro.

Kere se mbon emi afo etịn̄de ikọ ọnọ ẹdiọn̄ọde ẹban̄a se afo enemede ye se mmọ ẹdiọn̄ọde ẹban̄a itie Bible oro oyomde ndikot. Idem ke ini oyomde ndikot itie Bible emi mme owo ẹma ẹkememehe, tịn̄ ikọ emi edinamde ọdọn̄ mmọ ndifiak n̄kot itie oro, nyụn̄ kpep mmọ obufa n̄kpọ.