Se Abasi Edinamde Iban̄a Ndiọi N̄kpọ

Bible etịn̄ ọnọ nnyịn se Jehovah ye Jesus Christ Eyen esie ẹdinamde iban̄a ufen oro Satan anamde mme owo ẹbọ. Enye ọdọhọ ete: “Ẹkenam Eyen Abasi [Jesus] ọwọrọ owụt idem kaban̄a uduak emi, oro edi, man abiat utom Devil.” (1 John 3:8) Abasi oyosobo ererimbot emi idiọkitọn̄, usua, ye ibak ọyọhọde mi. Jesus ọn̄wọn̄ọ ke “ẹmọn̄ ẹsio” Satan “andikara ererimbot emi ẹduọk.” (John 12:31) Sia Satan mîdidụhe aba, ẹyetọn̄ọ edinen obufa ererimbot, ndien uwem eyenem etieti ke isọn̄ emi.—2 Peter 3:13.

Nso ke ẹdinam mbon emi mîmaha ndikpụhọde, edi ẹkade iso ẹnam idiọk? Kop se Abasi ọdọhọde mi: “Ndinen owo ẹyedụn̄ ke isọn̄, mmọ eke mînyeneke nduduọhọ ẹyenyụn̄ ẹsụhọ ke esịt. Edi ẹyesobo mme idiọkowo ẹfep ke isọn̄; ndien amaedi mbon abian̄a, ẹyesọhi mmọ ẹfep ke esịt.” (Mme N̄ke 2:21, 22) Mme idiọkowo ye idiọkido mmọ ẹyebe ẹfep. Ke obufa ererimbot oro, ẹyenam mbon oro ẹkopde item ẹbọhọ ufụn idiọkn̄kpọ emi mmọ ẹkedade ẹmana, ndien mmọ ẹyefọn ẹma nte ini akade.—Rome 6:17, 18; 8:21.

Abasi edinam didie man mme owo ẹkûnam idiọkn̄kpọ ke obufa ererimbot oro? Enye idibọhọ nnyịn ifụre ndimek se iyomde ndinam; idinamke nnyịn itie nte ukwakutom emi anamde sụk se ẹkebotde enye ẹnọ. Edi enye eyekpep mbon emi ẹkopde uyo esie n̄kpọ onyụn̄ an̄wam mmọ ẹkpọn̄ idiọk ekikere ye idiọk edinam.

Nso ke Abasi edinam iban̄a n̄kpọntịbe unana idotenyịn? Enye ọn̄wọn̄ọ ke Obio Ubọn̄ imọ ayakara ofụri isọn̄ ke mîbịghike. Jesus Christ edi Edidem emi Abasi emekde ete akara Obio Ubọn̄ emi, ndien Jesus enyene odudu ndikọk udọn̄ọ. (Matthew 14:14) Jesus enyene odudu n̄ko ndinam mme oto-obot afanikọn̄ ẹkûtịbe. (Mark 4:35-41) Mmọdo, mme owo idibọhọ ufen aba ke ntak “n̄kpọntịbe unana idotenyịn.” (Ecclesiastes 9:11) Ke ini ukara Christ, afanikọn̄ ndomokiet iditịbeke.—Mme N̄ke 1:33.

Nso iditịbe inọ ata ediwak mbon emi ẹkpan̄ade? Esisịt ini mbemiso Jesus anamde Lazarus ufan esie eset, enye ama ọdọhọ ete: “Ami ndi ediset ye uwem.” (John 11:25) Emi owụt ke Jesus enyene odudu ndinam mme owo eset!

Edieke akpamade ndidu uwem ke ererimbot emi n̄kpọ mîdinamke nti owo, kpep Bible man ọfiọk ata Abasi ye uduak esie. Mme Ntiense Jehovah emi ẹdude ke edem mbufo ẹyema ndin̄wam fi. Mbọk yom usụn̄ sobo ye mmọ, mîdịghe wet mme andisio magazine emi.