Mbụme Oro Mme Andikot Ẹbụpde

Okụk Ifan̄ ke N̄kpesitịp?

“Abasi amama owo eke ọnọde ke idatesịt.” (2 Corinth 9:7) Ata ediwak owo ke ererimbot ẹsikop ikọ emi. Edi ndusụk mbon oro ẹsikade ufọkabasi ẹkeme ndikere ke akpana inọ se ikande ukeme mmimọ. Ke nditịm ntịn̄, ndusụk ido ukpono ẹsisasiak ibatokụk emi owo ekpetịpde. Ẹsikot emi tithe m̀mê ọyọhọ mbak 10.

Edi ndi Bible ọdọhọ ẹsasiak ibatokụk oro owo ekpetịpde? Ndi emekere m̀mê okụk ifan̄ ke afo ekpesitịp?

Etịbe Oro Ẹkedọhọde Ẹsitịp ye Enọ Imaesịt ke Eyo Bible

Bible etịn̄ in̄wan̄-in̄wan̄ se Abasi okoyomde nditọ Israel ẹsinọ. (Leviticus 27:30-32; Numbers 18:21, 24; Deuteronomy 12:4-7, 11, 17, 18; 14:22-27) N̄kpọ emi ikọsọn̄ke ikan mmọ. Jehovah ọkọdọhọ ke edieke mmọ ẹnịmde ewụhọ imọ, ke iyọnọ mmọ ‘ediwak nti n̄kpọ.’—Deuteronomy 28:1, 2, 11, 12.

Edi ama onyụn̄ odu ini oro nditọ Israel ẹkesinọde se ededi oro mmọ ẹmekde ndinọ. Ke uwụtn̄kpọ, ke ini Edidem David okoyomde ndibọp temple nnọ Jehovah, nditọ Israel ẹma ẹnọ “tọsịn talent gold ition.”a (1 Chronicles 29:7) Men emi domo ye se Jesus okokụtde ke temple. Enye ama okụt “ubuene ebeakpa kiet nte esịnde okudọk okụk iba, emi enyenede ata esisịt ekọmurua” ke n̄kpọ udọn̄ okụk. Okụk ifan̄ ke emi ekedi? Eketie nte ndibahade okụk utom usen ke itie 64. Kpa ye oro, Jesus ọkọdọhọ ke Abasi ama ọbọ etịbe oro.—Luke 21:1-4.

Ndi Bible Asiak Ibat Okụk Oro Mme Christian Ẹkpesitịpde?

Abasi idọhọke mme Christian ẹnịm Ibet oro enye ọkọnọde nditọ Israel. Ntak edi oro enye mîsiakke ibat okụk oro mmọ ẹkpesitịpde. Edi ndinọ enọ ẹsinam mme Christian ẹkop inemesịt. Jesus Christ ke idemesie ọkọdọhọ ete: “Inemesịt okpon ke ndinọnọ akan ke ndibọbọ.”—Utom 20:35.

Mme Ntiense Jehovah ẹsida etịbe imaesịt ẹnam utom ukwọrọikọ mmọ ke ofụri ererimbot. Enye ke ẹsida ẹmịn̄ n̄wed, nte magazine emi osụk okotde mi, ẹnyụn̄ ẹda ẹbọp mme itie utuakibuot mmọ oro ẹkotde Ufọkmbono Obio Ubọn̄. Owo idaha okụk emi ikpe owo okụkọfiọn̄. Ẹsinọ ndusụk mbon oro ẹdade ofụri ini mmọ ẹnam utom ukwọrọikọ, ekpri okụk ekpatọfọn̄ man ẹda ẹkpe usụn̄ ẹka n̄kpọ ẹnyụn̄ ẹda ẹn̄wam idem. Edi idịghe owo mmọ ndomokiet esidọhọ ẹnọ mmimọ okụk emi. Ke nditịm ntịn̄, ata ekese ke otu Mme Ntiense Jehovah isibọhọ ndomo anini ida inam utom ukwọrọikọ. Utu ke oro, mmọ ẹsinam utom idemmọ ẹda ẹn̄wam idem, nte Paul emi ekesinamde ufọkọfọn̄ akanamde.—2 Corinth 11:9; 1 Thessalonica 2:9.

Okụk ifan̄ ke owo ọkpọnọ edieke enye oyomde nditịp n̄kpọ nsịn ke utom oro Mme Ntiense Jehovah ẹnamde? Apostle Paul ekewet ete: “Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.”—2 Corinth 8:12; 9:7.

[Ikọ Idakisọn̄]