Ndikan N̄kpọ-ata Nsọn̄ọnda
“Ẹmen obufa owo ẹsịne, emi ẹbotde ẹbiet Abasi ke edinen ido ye edisana ido akpanikọ.”—EPHESUS 4:24.
1. Ntak emi nnyịn inyenede ndisọn̄ọ nda ye Jehovah Abasi?
NDIKAN n̄kpọ-ata nsọn̄ọnda enyene ediwak ikpehe. Ata akpan n̄kpọ edi edikan n̄kpọ-ata eke edinyene nsọn̄ọnda nnọ Jehovah Abasi. Ke akpanikọ, ke ikerede iban̄a enyeemi Jehovah edide ye se enye anamde ọnọ nnyịn, ye ke ntak uyakidem nnyịn nnọ enye, obiomo nnyịn ndisọn̄ọ nda ye enye. Didie ke nnyịn iwụt nsọn̄ọnda nnyịn inọ Jehovah Abasi? Akpan usụn̄ kiet edi ke ndisọn̄ọ nda ye ndinen edumbet Jehovah.
2, 3. Nso ebuana ke nsọn̄ọnda enyene ye edinen ido?
2 Man ikan n̄kpọ-ata oro, ana nnyịn inam mme ikọ oro ẹkụtde ke 1 Peter 1:15, 16: “Kpa nte Andikot mbufo edide Edisana, mbufo nde ẹkabade ẹsana ke ofụri edu uwem mbufo; koro ẹwet ntem ẹte, Mbufo edisana, koro Ami ndide edisana.” Ndisọn̄ọ nda ye Jehovah Abasi eyenam nnyịn ikop uyo esie kpukpru ini, inamde mme ekikere, mme ikọ, ye mme edinam nnyịn ẹdu ke n̄kemuyo ye edisana uduak esie. Enye ọwọrọ ndinyene eti ubieresịt, nte ẹnọde nnyịn ewụhọ ndinam ke 1 Timothy 1:3-5: “Edi mma nnọ uyo emi [nditre ndikpep isio ukpepn̄kpọ m̀mê ndikpan̄ utọn̄ ke mme nsunsu mbụk], man oto do mmọ ẹnyene ima eke otode ke edisana esịt, ye esịt eke mîdiọn̄ọke idiọk ke idem esie, ye ata mbuọtidem.” Edi akpanikọ, ndomo owo nnyịn kiet idịghe mfọnmma, edi nnyịn ikpenyene ndidomo ndinam mme ukeme nnyịn, nte nnyịn ikpanamke?
3 Ndisọn̄ọ nda ye Jehovah eyekpeme nnyịn osio ke ndibiat ndinen edumbet ke ibụk ibụk usụn̄. Ke akpanikọ, nsọn̄ọnda eyekpeme nnyịn osio ke ndidi n̄kpọ kiet ke esịt esịt ndien idi n̄kpọ efen ke enyọn̄ enyọn̄. Nsọn̄ọnda edi se andiwet psalm ekenyenede ke ekikere ke ini enye ọkọkwọde ete: “Teme mi usụn̄ fo O Jehovah; nyesan̄a ke akpanikọ fo: kọt esịt mi abak enyịn̄ fo.” (Psalm 86:11) Nsọn̄ọnda oyom se ẹkenamde an̄wan̄a mfọn mfọn nte ‘nsụkibuot nnọ n̄kpọ oro owo mîkemeke ndinyenyịk owo anam.’
4, 5. Nsọn̄ọnda edinam nnyịn idu ke ukpeme mbak nnyịn idinam nso?
4 Ndisọn̄ọ nda ye Jehovah Abasi eyekpeme nnyịn n̄ko osio ke ndinam n̄kpọ ekededi oro edidade esuene ọsọk enyịn̄ ye Obio Ubọn̄ esie. Ke uwụtn̄kpọ, inikiet Christian iba ẹma ẹnyene ọkpọsọn̄ mfịna ye kiet eken tutu mmọ nte mîdotke ẹbiere ndika esopikpe ererimbot. Ebiereikpe ama obụp ete, ‘Ndi mbufo mbiba ẹdi Mme Ntiense Jehovah?’ Etie nte ikan̄wan̄ake enye ntak emi mmọ ẹkedide esop. Nso esuene ke oro ekedi ntem! Nsọn̄ọnda ẹnyenede ẹnọ Jehovah Abasi akpakanam nditọete oro ẹnam item apostle Paul emi: “Ke akpanikọ idiọk-n̄kpọ ama akan mbufo ama, emi mbufo ẹkotde kiet eken ikpe. Nsinam mbufo mîkam ibọhọ utụk ibiom? Nsinam mbufo mîyakke ẹbọ mbufo n̄kpọ ke n̄kanubọk?” (1 Corinth 6:7) Ke akpanikọ, usụn̄uwem nsọn̄ọnda ẹnyenede ẹnọ Jehovah Abasi edi ndikụt ọkpọkpọ ntakurua utu ke ndida esuene nsọk Jehovah ye esop esie.
5 Ndisọn̄ọ nda ye Jehovah Abasi esịne n̄ko editre ndiyak idem nnọ ndịk owo. “Uten̄e owo ọkọk afia onịm: edi ẹda owo eke ọbuọtde idem esie ye Jehovah ẹmenede enye ẹnịm ke enyọn̄.” (Mme N̄ke 29:25) Ntem, nnyịn ikan̄ke mbuọtidem ke ini isobode ukọbọ, edi nnyịn itiene uwụtn̄kpọ oro Mme Ntiense Jehovah ke akani Soviet Union, ke Malawi, ke Ethiopia, ye ke ata ediwak idụt en̄wen ẹnịmde.
6. Nsọn̄ọnda edikpeme nnyịn ọbiọn̄ọ ndidụk nsan̄a ye mmanie?
6 Edieke nnyịn isọn̄ọde ida ye Jehovah Abasi, nnyịn iyefep ndinam ufan ye kpukpru mbon oro ẹdide mme asua esie. Oro edi ntak mbet oro James ekewetde ete: “Mbufo iban n̄ka-owo, nte mbufo ifiọkke ite, edidi ufan ye ererimbot edi edidi usua ye Abasi? Mmọdo owo ekededi eke oyomde ndidi ufan ye ererimbot anam idem usua ye Abasi.” (James 4:4) Oyom nnyịn inyene nsọn̄ọnda oro Edidem David ekenyenede ke ini enye ọkọdọhọde ete: “O Jehovah, nte ndisuaha mmọ eke ẹsuade fi? Nte mmọ eke ẹnenide fi inyụn̄ itekke mi esịt? Mmada ofụri usua nsua mmọ: mmọ ẹtie nte mme asua mi.” (Psalm 139:21, 22) Nnyịn iyomke ndidụk nsan̄a ye mme anamidiọk ekededi oro ẹkoide-koi ẹnam idiọkn̄kpọ, koro nnyịn inyeneke udeme ndomokiet ye mmọ. Nte edisọn̄ọ nda ye Abasi idinamke nnyịn itre ndidụk nsan̄a ye mme utọ asua Jehovah oro ekededi, edide ye owo oro ke idemesie m̀mê ebe ke television?
Ndin̄wana Nnọ Jehovah
7. Nsọn̄ọnda edin̄wam nnyịn inam nso iban̄a Jehovah, ndien didie ke Elihu akanam emi?
7 Nsọn̄ọnda eyenụk nnyịn ndin̄wana nnọ Jehovah Abasi. Nso eti uwụtn̄kpọ kaban̄a oro ke nnyịn inyene ntem ito Elihu! Job 32:2, 3 asian nnyịn ete: “Esịt ayat Elihu . . . enye ayat esịt ye Job, koro enye onịmde idem esie ke edinen akan Abasi. Enye onyụn̄ ayat esịt ye mme ufan esie mbita, koro mmọ mîkwe nte ẹbọrọde, ndien ẹse Job ke idiọk.” Ke Job ibuot 32 osịm 37, Elihu an̄wana ọnọ Jehovah. Ke uwụtn̄kpọ, enye ọkọdọhọ ete: “Bet mi esisịt, ndien nyesian fi; koro ikọ eke aban̄ade Abasi osụk. . . . [Nyenịm] andibot mi ke edinen. . . . Enye idorokede nti owo enyịn esiemọ ifep.”—Job 36:2-7.
8. Ntak oyomde nnyịn in̄wana inọ Jehovah?
8 Ntak oyomde ẹn̄wana ẹnọ Jehovah? Mfịn, ẹsụn̄i Abasi nnyịn Jehovah ke ata ediwak usụn̄. Ẹdọhọ ke enye idụhe, nte ke enye edi ubak Abasi-Ita-ke-Kiet, nte ke enye esitụhọde mme owo ke nsinsi ke hell oro asakde ikan̄, nte ke enye ke odomo ye esisịt ukeme ndikabade ofụri ererimbot esịt, nte ke enye ikereke iban̄a ubonowo, ye ntre ntre. Nnyịn iwụt nsọn̄ọnda oro nnyịn inyenede ebe ke ndin̄wana nnọ enye nnyụn̄ n̄wụt nte ke Jehovah odu; nte ke enye edi enyene-ọniọn̄, edinen, ata ọkpọsọn̄, ye ima ima Abasi; nte ke enye enyene ini ọnọ kpukpru n̄kpọ; ye nte ke edikem ini esie ama edisịm, enye eyeda utịt ọsọk kpukpru idiọkn̄kpọ onyụn̄ anam ofụri isọn̄ edi paradise. (Ecclesiastes 3:1) Emi oyom ete nnyịn ida kpukpru ifet oro ẹbererede inam n̄kpọ nditie ntiense nnọ enyịn̄ ye Obio Ubọn̄ Jehovah.
Ndisọn̄ọ Nda ye Esop Jehovah
9. Mme owo ẹwụt unana nsọn̄ọnda ẹban̄a mme n̄kpọ ewe?
9 Nnyịn idahaemi imedisịm n̄kpọ aban̄ade edisọn̄ọ nda ye esop Jehovah oro ẹkụtde ke enyịn. Ke akpanikọ, nnyịn inyene ndisọn̄ọ nda ye enye, esịnede “asan̄autom oro anamde akpanikọ, onyụn̄ enyenede ọniọn̄,” emi ebede ke enye ẹbọk esop Christian ke n̄kan̄ eke spirit. (Matthew 24:45-47) Da nte ke n̄kpọ odu ke mme n̄wed Watch Tower oro mîn̄wan̄ake m̀mê oro nnyịn mînyịmeke idahaemi. Nso ke nnyịn idinam? Nte iyeyat esịt inyụn̄ ikpọn̄ esop? Oro edi se ndusụk owo ẹkenamde ke ini Enyọn̄-Ukpeme, ke ediwak isua ẹmi ẹkebede, akabuande obufa ediomi ye Tọsịn Isua. Mbon en̄wen ẹma ẹyat esịt ẹban̄a se Enyọn̄-Ukpeme eketịn̄de ini kiet ke mme n̄kpọ ẹban̄ade edida san̄asan̄a. Ke ekpekedide mbon oro ẹketuakde ukot ẹduọn̄ọ ke mme n̄kpọ ẹmi ẹma ẹsọn̄ọ ẹda ye esop ye nditọete mmọ, mmọ ẹkpekebet Jehovah anam mme n̄kpọ ẹmi ẹn̄wan̄a, emi enye akanamde ke ekemini esie. Ntem, nsọn̄ọnda esịne edibet ke ime tutu asan̄autom emi anamde akpanikọ onyụn̄ enyenede ọniọn̄ emịn̄ n̄kaiso edinam an̄wan̄a.
10. Nsọn̄ọnda edikpan nnyịn ndinyene udọn̄ mban̄a nso?
10 Ndisọn̄ọ nda ye esop Jehovah oro ẹkụtde ke enyịn n̄ko ọwọrọ editre ndinyene n̄kpọ ndomokiet ndinam ye mbon nsọn̄ibuot. Mme Christian oro ẹsọn̄ọde nda idinyeneke ọkpọsọn̄ udọn̄ iban̄a se utọ mbon oro ẹnyenede nditịn̄. Edi akpanikọ, mbon oro Jehovah Abasi adade anam n̄kpọ ndinọ utom esie ndausụn̄ ke isọn̄ idịghe mfọnmma. Edi nso ke Ikọ Abasi ọdọhọ nnyịn inam? Ikpọn̄ esop Abasi? Baba. Ima nditọete ekpenyene ndinam nnyịn isọn̄ọ ida ye enye, ndien nnyịn ikpenyene ndikaiso ‘nsọn̄ọ mma kiet eken ke ofụri esịt.’—1 Peter 1:22.
Ndisọn̄ọ Nda ye Mbiowo Oro Ẹsọn̄ọde Ẹda
11. Nsọn̄ọnda edikpeme nnyịn osio ke nso etikwo etikwo ekikere?
11 Ke ini ẹtịn̄de m̀mê ẹnamde n̄kpọ oro ọsọn̄de ndin̄wan̄a nnyịn ke esop, nsọn̄ọnda eyekpan nnyịn ndikụt ndudue nnọ eyenyụn̄ an̄wam nnyịn ndikere nte ke ndusụk edi n̄kpọ aban̄ade mbufiọk. Nte itịmke ifọn ikan ndineme mban̄a nti edu mbiowo oro ẹmekde ye eke ekemmọ mme andinịm ke akpanikọ eken utu ke ndineme mban̄a ndudue mmọ? Ih, oyom nnyịn ikpeme ibiọn̄ọ kpukpru utọ etikwo etikwo ekikere oro, koro enye enyenede ebuana ye unana nsọn̄ọnda! Nsọn̄ọnda eyen̄wam nnyịn n̄ko ndinam item Paul emi nte “ẹkûsụn̄i baba owo kiet.”—Titus 3:1, 2.
12, 13. Nso akpan n̄kpọ-ata ke mbiowo ẹnyene ndisobo?
12 Nsọn̄ọnda onịm san̄asan̄a n̄kpọ-ata ọnọ mbiowo. Kiet ke otu mme n̄kpọ-ata ẹmi ẹdi n̄kpọ aban̄ade ikọ idịbi. Andibuana ke esop ekeme ndiyarade ikọ idịbi ọnọ ebiowo. Ndisọn̄ọ nda ye owo oro eyekpan ebiowo oro ndibiat edumbet aban̄ade ikọ idịbi. Enye eyenam item oro odude ke Mme N̄ke 25:9: “Kûyarade ikọ idịbi owo efen.” Emi ọwọrọ owo nditre ndiyarade nnọ idem n̄wan esie!
13 Mbiowo ẹnyene n̄ko mme idomo efen ẹban̄ade nsọn̄ọnda ndikan. Ndi mmọ ẹyedi mme enem-owo esịt, mîdịghe ndi mmọ ye uko ye ke sụn̄sụn̄ ido ẹyen̄wam mbon oro ẹyomde edinen̄ede, idem ọkpọkọm mmọ ẹdi iman m̀mê mme n̄kpet n̄kpet ufan mmọ? Ndisọn̄ọ nda ye esop Jehovah eyenam nnyịn ẹmi idide mbiowo idomo ndin̄wam owo ekededi emi oyomde un̄wam eke spirit. (Galatia 6:1, 2) Okposụkedi idiwụtde mfọnido, nsọn̄ọnda eyenam nnyịn itie in̄wan̄în̄wan̄ ye ekemmọ ebiowo nnyịn, kpa nte Paul eketịn̄de ikọ ye apostle Peter ke in̄wan̄în̄wan̄ usụn̄. (Galatia 2:11-14) Ke n̄kan̄ eken, oyom mme esenyịn ẹtịm ẹkpeme, mbak edito ke mmọ ndinam n̄kpọ ke usụn̄ oro mîwụtke eti ibuot m̀mê ndiwụt asari m̀mê ke ndusụk usụn̄ efen ẹkamade odudu mmọ ke idiọk usụn̄, ẹnam edi ọkpọsọn̄ n̄kpọ ọnọ mbon oro ẹdude ke idak ukpeme mmọ ndisọn̄ọ nda ye esop Abasi.—Philippi 4:5.
14, 15. Nso mme n̄kpọ ẹkeme ndidomo nsọn̄ọnda mme andibuana ke esop?
14 Mme ikpehe efen ẹdu ke n̄kpọ ẹban̄ade edikan n̄kpọ-ata edisọn̄ọ nda ye esop ye mbiowo esie. Edieke mme idaha oro ẹkamade mfịna ke ndusụk udomo ẹdude ke esop, emi ọnọ nnyịn ifet ndiwụt nsọn̄ọnda nnọ Jehovah ye mbon oro ẹdade ke ibuot esie. (Se Enyọn̄-Ukpeme eke June 15, 1987, page 15-17.) Ke ini ẹsiode owo ẹfep, nsọn̄ọnda oyom ete nnyịn ibere ye mbiowo, idịghe ndikere m̀mê ntak oro ẹkemde ẹma ẹdu ke se ẹkenamde oro.
15 Ndisọn̄ọ nda ye esop n̄ko oyom ete nnyịn idụk kpukpru mbonoesop ition eke urua adan̄a nte mme idaha ye ukeme nnyịn ẹyakde. Nsọn̄ọnda iyomke sụk nnyịn ndidụk mmọ kpukpru ini kpọt edi n̄ko itịm idem inọ mmọ inyụn̄ inọ mme ibọrọ oro ẹbọpde-bọp nte mme ifet ẹyakde.—Mme Hebrew 10:24, 25.
Nsọn̄ọnda ke Ndọ
16, 17. Nso n̄kpọ-ata nsọn̄ọnda ke mme Christian ẹdide mme ọdọ ndọ ẹnyene ndisobo?
16 Anie owo efen ke nnyịn inyene ndiwụt nsọn̄ọnda nnọ? Edieke idọde ndọ, ke ikerede iban̄a mme en̄wọn̄ọ ndọ nnyịn, nnyịn inyene ndikan n̄kpọ-ata edinyene nsọn̄ọnda nnọ nsan̄andọ nnyịn. Ndisọn̄ọ nda ye nsan̄a nnyịn eyekpan nnyịn ndinam ndudue edinem iban m̀mê irenowo efen esịt n̄kan nte inemde n̄wan m̀mê ebe nnyịn esịt. Ndisọn̄ọ nda ye nsan̄a nnyịn oyom n̄ko ete nnyịn ikûyarade mme mmeme m̀mê mme ndudue nsan̄a nnyịn inọ mbon an̄wa. Edi mmemmem n̄kpọ ndiseme eseme nnọ mbon en̄wen akan ndinam utom ọkpọsọn̄ ndinam usụn̄ nneme ye nsan̄andọ nnyịn ana in̄wan̄, emi nnyịn ikpenyenede ndinam ke n̄kemuyo ye Mfọnmma Ibet. (Matthew 7:12) Ke akpanikọ, idaha ndọ onịm ata n̄kpọ-ata ọnọ nsọn̄ọnda Christian nnyịn.
17 Man ikan n̄kpọ-ata nsọn̄ọnda emi, idịghe ubiomikpe akwa idiọkn̄kpọ kpọt ke ana nnyịn ifep ndinyene edi ana nnyịn n̄ko ikpeme kpukpru ekikere ye ntụk nnyịn. (Psalm 19:14) Ke uwụtn̄kpọ, edieke abian̄a abian̄a esịt nnyịn ọdiọkde itọn̄ oyom inemesịt ye nduaidem, edi mmemmem n̄kpọ nnyịn ke ibụk ndibe ke edimama nsịm ediyoyom. Ke akpakde ete ẹnam akpanikọ ke ndọ, Edidem Solomon ọnọ mme ebe item ke ndamban̄a usụn̄ ete ‘ẹn̄wọn̄ mmọn̄ ke obube mmọn̄ mmọ kpọt.’ (Mme N̄ke 5:15) Ndien Jesus ọkọdọhọ ete: “Owo ekededi eke esede n̄wan ke enyịn use ama esịn efịbe ye enye ama ke esịt esie.” (Matthew 5:28) Mme ebe ẹmi ẹsịnde idem ke ndise n̄wed m̀mê ndise idan̄ ẹsịn idemmọ ke mfịna edidi se ẹtapde ẹsịn efịbe, ntem ẹtụkde iban mmọ ẹnyụn̄ ẹtrede ndiwụt mmọ nsọn̄ọnda. Ke ukem usụn̄ oro, n̄wanndọ emi esịnde idem ke ndise mme drama oro ẹsiode ke adiana ke adiana emi ẹbụkde mbụk efịbe ekeme ndidi se ẹdomode akabade etre ndinyene nsọn̄ọnda nnọ ebe esie. Ebede ke ndinen̄ede nsọn̄ọ nda ye nsan̄a nnyịn, nte ededi, nnyịn isọn̄ọ mbọbọ ndọ, inyụn̄ in̄wam kiet eken ke ukeme nnyịn ndinem Jehovah Abasi esịt.
Mme Un̄wam ke Ndinyene Nsọn̄ọnda
18. Edinyene ifiọk mban̄a nso edin̄wam nnyịn ndisọn̄ọ nda?
18 Nso idin̄wam nnyịn ndikan n̄kpọ-ata edinyene nsọn̄ọnda ke usụn̄ inan̄ ẹmi: edisọn̄ọ nda ye Jehovah, ndutịm esie, esop, ye nsan̄andọ nnyịn? Un̄wam kiet edi ndifiọk nte ke ndikan n̄kpọ-ata nsọn̄ọnda enyene n̄kpet n̄kpet ebuana ye ediwụt unen itie edikara Jehovah. Ih, ebede ke ndinyene nsọn̄ọnda nnyịn iwụt ite ke nnyịn ida Jehovah nte Andikara Ekondo. Ntem nnyịn iyenyene ukpono inọ idem inyụn̄ inyene idotenyịn nsinsi uwem ke obufa ererimbot Jehovah. Nnyịn imekeme ndin̄wam idem nnyịn ndika iso nnyene nsọn̄ọnda ebe ke ndikere mban̄a nti uwụtn̄kpọ nsọn̄ọnda, ọtọn̄ọde ke Jehovah onyụn̄ osụhọde osịm mbon oro ẹsiakde ke Bible ye ke mme n̄wed Watch Tower nnyịn, esịnede mme mbụk Yearbook.
19. Nso udeme ke mbuọtidem enyene ke nnyịn ndisọn̄ọ nda?
19 Ọkpọsọn̄ mbuọtidem ke Jehovah Abasi ye ndịk mbak idiyat enye esịt ẹyen̄wam nnyịn ndikan n̄kpọ-ata nsọn̄ọnda. Nnyịn inam mbuọtidem nnyịn ye ndịk oro inyenede iban̄a Jehovah ọsọn̄ idem ebe ke ifịk ifịk edikpep Ikọ Abasi ye ke ndibuana ke utom ukwọrọikọ Christian. Emi eyen̄wam nnyịn ndinam n̄kpọ ke n̄kemuyo ye item Paul oro ẹwetde ke Ephesus 4:23, 24: “Ẹnyụn̄ ẹkabade ẹdi obufa ke spirit eke odude ke esịt mbufo, ẹnyụn̄ ẹmen obufa owo ẹsịne, emi ẹbotde ebiet Abasi ke edinen ido ye edisana ido akpanikọ.”
20. Ke akande kpukpru n̄kpọ, ewe edu edin̄wam nnyịn ndisọn̄ọ nda ye Jehovah ye kpukpru mbon eken oro nnyịn inyenede ndiwụt nsọn̄ọnda nnọ?
20 Ndifiọk mme edu Jehovah an̄wam nnyịn ndisọn̄ọ nda. Ke akande kpukpru, ima unana ibụk oro inyenede inọ Ete nnyịn eke heaven ye esịtekọm oro inyenede iban̄a kpukpru se enye anamde ọnọ nnyịn, ndima enye ke ofụri esịt ye ukpọn̄ ye ekikere ye odudu eyen̄wam nnyịn ndisọn̄ọ nda ye enye. N̄ko-n̄ko, ndinyene ima oro Jesus ọkọdọhọde ke eyenam ẹdiọn̄ọ mme anditiene imọ eyen̄wam nnyịn ndisọn̄ọ nda ye kpukpru mme Christian ke esop ye ke ubon nnyịn. Ke nditịn̄ ke usụn̄ efen, enen̄ede edi owo ndidi ibụk m̀mê nditre ndidi ibụk. Unana nsọn̄ọnda ọwọrọ ndidi ibụk. Nsọn̄ọnda ọwọrọ nditre ndidi ibụk.—Mark 12:30, 31; John 13:34, 35.
21. Didie ke ẹkeme nditịn̄ mban̄a edikan n̄kpọ-ata nsọn̄ọnda ibio ibio?
21 Ke nditịn̄ ibio ibio: Nsọn̄ọnda edi ata n̄kokon̄ edu emi Jehovah Abasi, Jesus Christ, ye kpukpru mme ata asan̄autom Jehovah ẹwụtde. Man inyene eti itie ebuana ye Jehovah Abasi, ana nnyịn ikan n̄kpọ-ata edinyene nsọn̄ọnda nnọ enye ebe ke ndidu uwem ekekem ye ndinen idaha esie, ebe ke nditre ndinyene n̄kpọ ndomokiet ndinam ye mme asua esie, onyụn̄ ebe ke ndin̄wana nnọ Jehovah ke ndinọ ikọ ntiense ke nnennen usụn̄ ye ke ido nneme. Ana nnyịn ikan n̄kpọ-ata edinyene nsọn̄ọnda nnọ esop Jehovah oro ẹkụtde ke enyịn. Ana nnyịn isọn̄ọ ida ye esop nnyịn inyụn̄ inam akpanikọ inọ nsan̄andọ nnyịn. Ebede ke ndikan n̄kpọ-ata nsọn̄ọnda uforo uforo, nnyịn iyetiene ibuana ke ndiwụt unen itie edikara Jehovah, nnyịn iyenyụn̄ ida ke n̄kan̄ esie ke eneni oro. Ke ntre nnyịn iyekụt mfọn esie iyenyụn̄ ibọ enọ nsinsi uwem. Ẹkeme nditịn̄ se apostle Paul eketịn̄de aban̄a uten̄e Abasi ẹban̄a nnyịn ndikan n̄kpọ-ata nsọn̄ọnda. Enye enyene udori ọnọ uwem emi odude idahaemi ye uwem emi edidide.—Psalm 18:25; 1 Timothy 4:8.
Didie ke Afo Ọkpọbọrọ?
◻ Ke mme usụn̄ ewe ke nnyịn ikeme ndikan n̄kpọ-ata edinyene nsọn̄ọnda nnọ Abasi?
◻ Nso ke edisọn̄ọ nda ye esop Jehovah oyom oto nnyịn?
◻ Didie ke mbiowo ẹkeme ndikan n̄kpọ-ata nsọn̄ọnda?
◻ Nso n̄kpọ-ata oro abuanade nsọn̄ọnda ke ana mme Christian ẹdide mme ọdọ ndọ ẹsobo?
◻ Mme edu ewe ẹdin̄wam nnyịn ndikan n̄kpọ-ata nsọn̄ọnda?
[Ndise ke page 17]
Ndisọn̄ọ nda ye mme andibuana ke esop eyekpan mbiowo ndiyarade ikọ idịbi
[Mme ndise ke page 18]
Nsọn̄ọnda emi owo enyenede ọnọ nsan̄andọ ọsọn̄ọ mbọbọ ndọ