Ndi Ibak Emi Mme Owo Ẹsinamde Man Ẹkpụhọde N̄kpọ Eyetre?

Mbon emi ẹsinamde ibak sia ẹyomde ẹkpụhọde n̄kpọ ẹma ẹnam ibak ẹma, emekeme ndibụp idemfo: ‘Ndi Abasi ekere aban̄a nnyịn? Ntak emi mme n̄kpọ emi ẹtịbede? Ndi odu ini emi utọ ibaka emi editrede? Ndinam didie ndu uwem ye utọ ndịk emi anamde mi mi?’ Nte Bible ọbọrọde mme mbụme emi eyenem fi.

Esitie Abasi didie ini ẹnamde ibak man ẹkpụhọde n̄kpọ?

Abasi asasua afai ye ibak emi ẹsinamde man ẹkpụhọde n̄kpọ. (Psalm 11:5; Mme N̄ke 6:16, 17) Jesus emi Abasi ọkọdọn̄de edi isọn̄ ama asua ọnọ mme mbet esie ini mmọ ẹkenamde n̄kpọ afai afai. (Matthew 26:50-52) Kpa ye emi ndusụk owo ẹsinamde afai ẹdọhọ ke inam ke enyịn̄ Abasi, Abasi idọn̄ke mmọ utọ n̄kpọ oro. Abasi isikam ikopke akam mmọ.​—Isaiah 1:15.

Abasi ekere aban̄a kpukpru mbon oro ẹbọde ufen, ẹsịnede mbon oro ẹbọde ufen ke ntak ibak emi ẹnamde man ẹkpụhọde n̄kpọ. (Psalm 31:7; 1 Peter 5:7) Bible owụt ke Abasi ayanam n̄kpọ man afai etre.​—Isaiah 60:18.

Se isinamde ẹnam utọ ibak emi

Bible owụt ntak ẹsinamde utọ ibak emi ete: ‘Owo akara owo tutu ọnọ enye unan.’ (Ecclesiastes 8:9) Toto ke eset, mbon emi ẹkarade mme owo ẹsinam ibak man ẹfịk mme owo. Ndien mbon oro ẹfịkde do ẹsinam ibak usiene man ẹnyan̄a idem.​—Ecclesiastes 7:7.

Utọ ibak emi eyetre

Abasi ọn̄wọn̄ọ ndinam ndịk ye afai etre, onyụn̄ ọn̄wọn̄ọ ndinam emem odu ke ofụri ererimbot. (Isaiah 32:18; Micah 4:3, 4) Se se Abasi edinamde mi:

• Enye eyetre se isinamde mme owo ẹnam utọ ibak oro. Abasi oyosobo ukara owo efep, ndien ukara esie ayakara ofụri ererimbot. Jesus Christ edidi Edidem ke ukara Abasi oro. Enye idinamke n̄kpọ ọfọn owo enye emi, ndien ọdiọk enye eken. Enye ayanam afai etre, owo idinyụn̄ ifịkke owo aba. (Psalm 72:2, 14) Ini oro, owo ndomokiet idinamke ibak man ẹkpụhọde n̄kpọ. ‘Ediwak emem ayadat mme owo esịt.’​—Psalm 37:10, 11.

• Enye ayanam mme mfịna emi ẹsisịmde mme owo ke ntak ibak emi ẹsinamde man ẹkpụhọde n̄kpọ etre. Ekpededi mme owo ẹma ẹbọ ufen, ẹda unam, ẹbiomo ndo, esịt onyụn̄ etịmede mmọ ke ntak ibak emi ẹkenamde man ẹkpụhọde n̄kpọ, Abasi ayanam n̄kpọ aban̄a kpukpru oro. (Isaiah 65:17; Ediyarade 21:3, 4) Enye akam ọn̄wọn̄ọ ndinam mbon oro ẹkekpade ẹset ẹdidu ke emem ke isọn̄ emi.​—John 5:28, 29.

Bible etịn̄ eti ntak emi anamde inịm ke Abasi ọyọsọsọp anam n̄kpọ. Edi emekeme ndikere, ‘Ntak emi Abasi mînamke utọ ibak emi etre idahaemi-e?’ Okpoyom ndikụt ibọrọ mbụme oro, se vidio emi, Ntak Emi Abasi Ayakde Mme Owo Ẹbọ Ufen?