Hulda Ama Anam Se Enye Akaduakde Ndinam

Ekpedi ama ekese ekpri isuo emi ekerede Sangir Besar ke Indonesia isua ifan̄ ko ke edem, ekeme ndidi ama okụt nditọete nnyịn iban ita do. Ẹnen̄ede ẹda ukwọrọikọ emi mmọ ẹkwọrọde ẹn̄wam mme owo ẹdiọn̄ọ Bible ẹdiọn̄ọ mmọ. Edi idịghe ikọ ke mmọ ẹkekwọrọ ke esụk oro isua ifan̄ ko ke edem, emi iyomde nditịn̄ mban̄a.

Akpa kan̄a, mmọ ẹma ẹsan̄a ẹdụk inyan̄ ẹkesion̄o ikpọ itiat ẹdibon ke esụk. Ndusụk itiat oro ẹkekponi nte bọl. Ekem mmọ ẹma ẹtie ke ekpri n̄kpọitie ẹkama hammer ẹbom mme itiat oro tutu mmọ ẹken̄e ẹkan nsenunen. Mmọ ẹma ẹtan̄ se mmọ ẹkebomde oro ẹdọn̄ ke ọkpọ, ẹbiom ẹdọk ẹwọrọ ke esụk oro ẹka ebiet emi mmọ ẹdụn̄de. Mmọ ẹma ẹdọn̄ itiat oro ke ikpọ ekpat emi ẹdidọn̄de ke trọk. Ẹsida itiat oro ẹdiọn̄ usụn̄.

Sista Hulda edi kiet ke otu nditọete iban ita oro. Enye ama enyene ini anam utom oro akan mbon eken. Okụk emi enye esin̄wanade ke n̄kpọ itiat oro ke enye ye mbonubon esie ẹsida ẹse ẹban̄a idem kpukpru usen. Edi enyene n̄kpọ en̄wen emi enye okoyomde ndida okụk oro nnam. Enye okoyom tablet man ekeme ndisidụk JW Library^®. Hulda ama ọdiọn̄ọ ke mme vidio ye n̄kpọ en̄wen emi ẹdude ke JW Library^® ẹyen̄wam imọ itetịm ikwọrọ ikọ ọfọn, ẹnyụn̄ ẹnam se imọ ikpepde ke Bible etetịm an̄wan̄a imọ.

Ke ofụri ọfiọn̄ kiet ye ubak, Hulda ama ada hour iba kpukpru usenubọk obom itiat emi awakde ekem se ẹdọn̄de ke ekpri trọk enye ọyọhọ. Utịt utịt, enye ama edinyene okụk se adade edep tablet oro.

Hulda ọdọhọ ete: “Ubiak ye ekaha ke ntak ubiom itiat oro ikedịghe ekpri. Edi n̄kọtọn̄ọ ndikụt nte obufa tablet emi an̄wamde mi nnen̄ede ndiọn̄ọ ndikwọrọ ikọ nnyụn̄ n̄kpep mme owo Ikọ Abasi, ye nte enen̄erede emem mi utom nditịm idem nnọ mbono esop, mma nsọsọp mfre kpukpru oro.” Hulda ọdọhọ n̄ko ke tablet oro ama an̄wam imọ nsonso oro udọn̄ọ COVID-19 ọkọtọn̄ọde, sia ẹkeda Intanet ẹdụk mbono esop ẹnyụn̄ ẹkwọrọ ikọ. Esịt enem Hulda nte enye akanamde se enye akaduakde ndinam, onyụn̄ enem nnyịn n̄ko.