Se Akpanamde man Nditọ Fo Ẹsikop Item

MFỊNA

Ọdọhọ kpukpru owo ke ufọk ẹsinịme fon mmọ ama amamia usụkkiet, edi adiaha fo ọnọ owo etop ke fon ufọt okoneyo ikaba urua emi. Ọdọhọ akpan fo esinyọn̄ edi ufọk n̄kanika duop, edi okoneyo n̄kpọn̄, enye afiak ọnyọn̄ edi ebe duopekiet.

Nditọ fo ẹkeme ndinam se ọdọhọde mmọ ẹnam. Edi nso inam etie nte ke mmọ ẹdi mbon nsọn̄ibuot? Ekeme ndidi mmọ idịghe mbon nsọn̄ibuot nte afo ekerede.

NTAK EMI ESITỊBEDE

Mmọ idiọn̄ọke se edinamde mmọ. Ndusụk nditọwọn̄ ẹsiyom ndikụt se ete m̀mê eka edinamde. Ntak edi oro mmọ mîsinamke se ẹkedọhọde. Ke uwụtn̄kpọ, edieke ete m̀mê eka ọdọhọde ke eyen oyokụt imọ edieke enye anamde emi m̀mê oko, eyen ekeme ndinam se ẹkekpande man ese se ete m̀mê eka edinamde. Ndi oro ọwọrọ ke enye edi eyen nsọn̄ibuot? Iwọrọke. Ndusụk nditọ ẹsinam n̄kpọ ntem ke ini mmọ ẹdiọn̄ọde ke ete m̀mê eka isinamke se mmọ ẹketịn̄de mîdịghe ke ini mmọ mîdiọn̄ọke se ẹdinamde mmimọ.

Ndisọn̄ ido. Ndusụk ete ye eka ẹsinịm ibet awak akaha. Ke ini eyen mmọ abiatde ibet kiet, mmọ ẹyeyat esịt ẹdian ibet efen. Emi esikam ababiat n̄kpọ. N̄wed kiet ọdọhọ ete: “Nte ibet awakde aka, ntre ke nditọwọn̄ ẹtetịm ẹsọn̄ ibuot. Ndidian ibet efen nnọ nditọ fo ke ini mmọ mînamke kan̄a akpa emi ekenịmde etie nte ndidori nsọsọn̄ bọta ke bred. Bred oro ayasuana sia bọta ọsọn̄ akan enye.” Ntre, edieke mûyomke nditọ fo ẹsọn̄ ibuot, kûsọn̄ ido ye mmọ.

Ọfọn ọnọ nditọ fo ukpep, idịghe ndimia mmọ ufen. Ntre, nso ke akpanam man nditọ fo ẹsikop item?

SE AKPANAMDE

Nam mmọ ẹdiọn̄ọ se edinamde. Ana nditọ fo ẹdiọn̄ọ se oyomde mmọ ẹnam ye se afo edinamde edieke mmọ mînamke se ọdọhọde.—Se Bible etịn̄de: Galatia 6:7.

Nam emi ise: Wewet se oyomde nditọ fo ẹnam. Ekem bụp idemfo ete: ‘Ndi ibet emi nnịmde awak akaha? Ndi enyene ibet emi n̄kpabiatde mfep? Ndi enyene se n̄kpayakde nditọ mi ẹnam idahaemi sia mmọ ẹma ẹketọn̄ọ ndidiọn̄ọ idem?’

Nyene iwụk. Idem ekeme ndikpa nditọ fo edieke akayakde mmọ ẹnam n̄kpọ urua oko, edi amia mmọ ufen ke ndinam kpasụk n̄kpọ oro urua emi.—Se Bible etịn̄de: Matthew 5:37.

Nam emi ise: Edieke eyen fo anamde n̄kpọ, nọ enye ufen emi ekemde ye se enye akanamde. Ke uwụtn̄kpọ, edieke ọkọdọhọde enye esinyọn̄ edi n̄kanika usụkkiet, edi enye ọnyọn̄ edi ke duop, kûtre enye udia, edi kam dọhọ enye esinyọn̄ idahaemi edi ke ebe itiaita.

Kûsọn̄ ido. Kûsọsọn̄ ido, edi yak mmọ ẹnyịghede idem esisịt nte mmọ ẹkponde owo ẹnyụn̄ ẹwụtde ke imọdiọn̄ọ idem.—Se Bible etịn̄de: Philippi 4:5.

Nam emi ise: Tie ye nditọ fo neme ibet emi oyomde mmọ ẹnịm. Emekeme ndikam ndọhọ mmọ ẹtịn̄ se ẹkpenamde owo emi abiatde ibet oro. Nditọwọn̄ ẹsisọp ẹnam ibet oro mmọ ẹketienede ẹnịm.

Kpep eyen fo ido. Ndikpep eyen fo ido ikụreke ke ndinam enye enịm ibet, edi esịne ndinam enye ọdiọn̄ọ se ifọnde ye se idiọkde. (Se ekebe emi, “Kpep Eyen Fo nte Enye Okpodude Uwem.”)—Se Bible etịn̄de: 1 Peter 3:16.

Nam emi ise: Da Bible kpep nditọ fo n̄kpọ. Idụhe n̄wed en̄wen emi ọdọn̄ọde “ntụnọ emi anamde ẹnyene ikike” nte Bible. Bible ekeme n̄ko ndinam “ọkọi enyene mbufiọk, akparawa enyene ifiọk ye ukeme ukere n̄kpọ.”—Mme N̄ke 1:1-4.