NDI ẸKEBOBOT?
N̄kpan̄utue
UTUEKPE esibọp utọ n̄kpan̄utue iba—kiet ke enyọn̄, kiet ke isọn̄. Eke enyọn̄ edi enye emi isikụtde ke ibibene, ke dek ufọk, ye ke ufụmenyọn̄. Enye eken esidu ke isọn̄. Eke enyọn̄ esisọn̄ idem etieti, isinyụn̄ isọpke idian̄ade. Edi eke isọn̄ esisọp adian̄ade awan̄ n̄kpọ ekededi emi asan̄ade do ebe. Utuekpe kiet ananam didie ọbọp utọ n̄kpan̄utue iba emi?
N̄kpan̄utue emi mîsọn̄ke idem
Kere ise: Utuekpe esinam n̄kpan̄utue emi enye adiande ke ibibene, ke dek ufọk, m̀mê ke ufụmenyọn̄ enen̄ede ọsọn̄ idem man ekeme ndimụm n̄kpọ ekededi emi efede ebe. Ntaifiọk ke Ufọkn̄wed Ntaifiọk Akron ke America ẹdikụt ke n̄kpan̄utue emi utuekpe ọbọpde ke isọn̄ edi isio. Enye emi an̄wan̄wan̄a, isinyụn̄ isọn̄ke idiana ke isọn̄. N̄kpọ akpasan̄a do ebe, n̄kpan̄utue emi ayadian̄ade ke isọn̄ awan̄ n̄kpọ oro, iyakke enye enyịghede idem.
N̄kpan̄utue emi mîsọn̄ke idem
Ufọkn̄wed Ntaifiọk Akron ẹdọhọ ke ntaifiọk emi ẹkekụtde n̄kpọ emi ke ẹkere nte ikpadade ifiọk utuekpe emi isio n̄kpọ emi mbiausọbọ ẹkemede ndida mbọp unan ye ọkpọ.
Afo ekere didie? Ndi ekere ke n̄kpọ okoforo utuekpe emi ekemede ndibọp utọ n̄kpan̄utue iba emi? Mîdịghe ndi ẹkebobot enye?