Kpep Eyen Fo ido

DIDIE KE OWO EMI ENYENEDE IDO ESINAM N̄KPỌ?

Owo emi enyenede ido esinam se ẹnọde enye anam onyụn̄ okụt ete ke imokụre utom oro ke ini. Mme owo ẹsima utọ owo emi sia enye edide owo akpanikọ.

Ọkpọkọm eyenọwọn̄ ekpri didie, ẹkeme ndisụk n̄kpep enye ido. N̄wed emi ẹkotde Parenting Without Borders ọdọhọ ke nditọwọn̄ ẹma ẹsịm isua kiet ye ọfiọn̄ ita, ke mmọ ẹsitọn̄ọ ndinam se ete ye eka mmọ ẹdọhọde mmọ ẹnam. Ke ini mmọ ẹsịmde isua kiet ye ọfiọn̄ itiokiet, mmọ ẹsiyom nditiene ete ye eka mmọ nnam se ededi oro mmọ ẹnamde. N̄wed oro ọdọhọ n̄ko ete ke ndusụk itie, ke mme ete ye eka ẹsitọn̄ọ ke ini nditọ mmọ ẹdide isua ition, itiokiet, m̀mê itiaba ẹkpep mmọ ndinam n̄kpri n̄kpri n̄kpọ ke ufọk, ndien ke nditọ oro ẹsifiọk ndinam ediwak n̄kpọ kpa ye oro ẹkpride.

NTAK EMI EKPEKPEPDE EYEN FO IDO?

Ndusụk n̄kparawa ye n̄kaiferi ẹsikpọn̄ ufọk ẹkedụn̄ ikpọn̄, ekem n̄kpọ ọsọn̄ ye mmọ tutu mmọ ẹfiak ẹkedụn̄ ye ete ye eka mmọ. Emi esiwak nditịbe nnọ nditọwọn̄ emi ete ye eka mmọ mîkekpepke mmọ nte ẹkpekamade okụk, nte ẹkpesede ẹban̄a ufọk, ye nte ẹkpedude uwem ke usen ke usen.

Ntem, ọfọn ndikpep nditọ fo mme n̄kpọ emi idahaemi man mmọ ẹkpefiọk se ẹdinamde ẹma ẹkponi. N̄wed emi ẹkotde How to Raise an Adult ọdọhọ ke ifọnke ete ye eka ẹnanam kpukpru n̄kpọ ẹnọ nditọ mmọ tutu mmọ ẹsịm isua efịteta ekem ẹwọrọ ẹkedụn̄ ikpọn̄ isụk ifiọkke ndinam n̄kpọ ndomokiet.

NTE EKPEKPEPDE EYEN FO IDO

Deme utom nọ enye.

SE BIBLE ETỊN̄DE: “Kpukpru orụk utom ẹnyene ufọn.”—Mme N̄ke 14:23.

Esinenem nditọwọn̄ nditiene ete ye eka mmọ nnam utom. Ntre, deme utom oro owo mmọ kiet kiet edisinamde ke ufọk nọ mmọ.

Ndusụk ete ye eka isimaha ndinọ nditọ mmọ utom. Mmọ ẹsidọhọ ke ẹnọnọ nditọ mmimọ ediwak utom ufọkn̄wed, ntre ke idịghe se idiande utom en̄wen inọ mmọ.

Edi nditọwọn̄ emi ẹsinọde utom ẹnam ke ufọk ẹsinam ọfọn ke ufọkn̄wed sia oro esikpep mmọ ndisịn idem nnam utom ekededi oro ẹnọde mmọ nsịm utịt. N̄ko, n̄wed oro Parenting Without Borders ọdọhọ ke edieke nnyịn mîyakke nditọ nnyịn ẹn̄wam nnyịn ke ini mmọ ẹdide n̄kpri, ke mmọ ẹkeme nditọn̄ọ n̄kere ke ufọn idụhe ndin̄wam mme owo. N̄ko, ke mmọ ẹdisiyom mme owo ẹnanam n̄kpọ ẹnọ mmọ kpukpru ini.

Se ẹtịn̄de ke n̄wed emi owụt ke ndisinọ nditọ nnyịn utom ẹnam ke ufọk ayanam mmọ ẹfiọk ndisin̄wam mme owo utu ke ndiyom mme owo ẹnanam n̄kpọ ẹnọ mmọ. Ke ini nditọwọn̄ ẹtienede ẹnam utom ke ufọk, emi esinam mmọ ẹkụt ke mmimọ imetiene inyene ufọn ke ubon.

N̄wam nditọ fo ẹkụt ke imanam ndudue ẹnyụn̄ ẹnen̄ede ndudue mmọ.

SE BIBLE ETỊN̄DE: “Kop item nyụn̄ bọ ntụnọ, man afo ekpenyene ọniọn̄ ke ini iso fo.”—Mme N̄ke 19:20.

Edieke nditọ fo ẹnamde ndudue, kûnam nte inyeneke se itịbede, utu ke oro n̄wam mmọ ẹnen̄ede ndudue mmọ. Ke uwụtn̄kpọ, edieke eyen fo eduede abiat n̄kpọ owo, dọhọ enye ekpe andinyene ubọk mîdịghe edep n̄kpọ owo ọnọ, edieke ekemede.

Edieke an̄wamde nditọ fo ẹkụt ke se mmọ ẹnamde ifọnke, oro eyekpep mmọ mme n̄kpọ emi:

• Mmọ ẹyesitịn̄ akpanikọ ẹnyụn̄ ẹnyịme ndudue mmọ

• Mmọ ididọhọke ke owo en̄wen anam mmimọ inam ndudue

• Mmọ idiyomke n̄kpọ itịn̄ inyan̄a idem ke ini ẹnamde ndudue

• Mmọ ẹyesikpe owo ubọk ke ini ẹduede owo