1 | Se Ban̄a Idemfo

NTAK EDIDE AKPAN N̄KPỌ

Afanikọn̄ ama eṭibe, esifịna mme owo ke nsio nsio usụn̄.

• Ke ini afanikọn̄ esịmde owo, idem esimem enye ndien edieke idem akade iso emem enye ntre, enye ekeme ndidọn̄ọ.

• Ke ini afanikọn̄ etịbede, mme owo ẹsiyọyọhọ ufọkibọk, ndien mme dọkta isikemeke ndisọbọ kpukpru owo idem ọfọn, ibọk n̄ko isinyụn̄ ikemke kpukpru owo.

• Afanikọn̄ ama etịbe, okụk esisat owo ke ekpat, ndien emi isiyakke owo ekeme ndidep nti udia ndia nnyụn̄ ndep ibọk.

Se Anade Ọdiọn̄ọ

• Idiọk udọn̄ọ ye editịmede esịt ẹkeme ndinam okûkere n̄kpọ ọfọn okûnyụn̄ unam mme n̄kpọ emi ẹdinamde idem ọsọn̄ fi. Ndien oro ekeme ndinam udọn̄ọ oro ọdiọk akan nte ekedide.

• Edieke mûsọbọke idem, udọn̄ọ oro eyetetịm ọsọn̄ ubọk onyụn̄ ekeme ndiwot fi.

• Edieke idem ọsọn̄de fi, eyekeme ndibiere se edinamde ke ini afanikọn̄ etịbede.

• Edide emenyene okụk m̀mê unyeneke, emekeme ndisụk nse mban̄a idemfo.

Se Ekemede Ndinam

Owo emi enyenede ifiọk esisọp ada okụt afanikọn̄ onyụn̄ anam se ekekeme man afanikọn̄ oro idisịm enye, ibọhọke usụn̄ ndomokiet idụhe nte enye akpasan̄ade ọdiọn̄ọ. Ukem ntre ke onyụn̄ edi ye ndise mban̄a idem nnyịn. Edieke asanade idem onyụn̄ anamde ebiet emi odụn̄de asana, udûsọpke udọn̄ọ ndien ọkpọdọdọn̄ọ idinen̄ekede isọn̄ ubọk. Enen̄ede ọfọn owo ekpeme man enye idimen udọn̄ọ.

“Nnyịn ndisana idem nnyụn̄ nnam ebiet oro idụn̄de asana anam nnyịn ibiatke okụk ke ufọkibọk inyụn̄ ibiatke okụk idep ibọk.”​—Andreas.a