NAM NDỌ FO ENEM
Nam ndọ fo enem
Bible ọdọhọ ete: “Owo iba ẹfọn ẹkan owo kiet. . . Koro edieke owo mmọ kiet ọduọde, enye eken ekeme ndimenede nsan̄a esie.” (Ecclesiastes 4:9, 10 ) Ebe ye n̄wan ẹkpenyene nditie nte awat-ubomofụm ye udiana esie. Edieke mmọ ẹdianade kiet, mmọ ẹyesịm ebiet emi mmọ ẹkade, edi edieke mmọ mîdianake kiet, mmọ ẹkeme ndinyene aksiden.
Kûmen mfịna fo udori n̄wan m̀mê ebe fo ke idem. Ẹnyene ime ẹnyụn̄ ẹyọyọ kiet eken.
Yom ọkpọkọm usen kiet ke urua ẹneme mfịna oro mbufo ẹnyenede. Ẹyom usụn̄ ẹbiere mfịna mbufo, utu ke nditie ntịn̄ se owo enye oko mîkanamke ọfọn.
Ẹsisio ini ẹnam n̄kpọ emi mbufo mbiba ẹmade.
Ẹtie kiet ẹtịn̄ nte uwem ekesinemde mbufo. Ẹmekeme ndise ndise ndọ mbufo mîdịghe ẹneme nsio nsio nti n̄kpọ eken oro ẹtide.
“Idịghe kpukpru n̄kpọ ke ebe ye n̄wan ẹsinyịme, edi oro iwọrọke ke mmọ ikemeke ndidiana kiet nnam n̄kpọ. Ebe ye n̄wan ẹkeme ndibiere ndinam n̄kpọ, ẹnyụn̄ ẹdiana kiet ẹnam se ẹkebierede oro.”—David.
KÛKPỌN̄ MME UFAN FO
Kûkpọn̄ mme ufan fo
Utu ke nditetie nyom yak mme ufan fo ẹn̄wan̄wam fi kpukpru ini, yom usụn̄ tiene n̄wam mmọ. Ama an̄wam owo, an̄wam idemfo.
Ka kese mîdịghe kokot mme ufan fo ke fon man ọdiọn̄ọ nte n̄kpọ etiede ye mmọ.
Bụp mme ufan fo se ikan̄wamde mmọ ẹyo ini ukem n̄kpọ emi ọwọrọde fi ọkọwọrọde mmọ.
“Mme ufan fo ẹkeme ndin̄wam fi ọdiọn̄ọ se akpanamde ke ini afanikọn̄ esịmde fi. Mmọ ẹkeme nditi fi se ama ọkọdọdiọn̄ọ. Mme ufan fo ẹma fi, mmọ ẹnyụn̄ ẹdiọn̄ọ ke afo amama mmimọ.”—Nicole.
NEN̄EDE N̄WAM NDITỌ FO
Nen̄ede n̄wam nditọ fo
Bible ọdọhọ ete: “Ẹsọp ndikop ikọ, ẹkûsọp nditịn̄ ikọ.” (James 1:19 ) Ke nsonso oro, ekeme ndinam nditọ fo idimaha ndisio ntịn̄ nte etiede mmọ ke idem. Edi edieke enyenede ime akpan̄ utọn̄, mmọ ẹkeme ndịtịn̄.
Nam esinenem nditọ fo nditịn̄ nte etiede mmọ ke idem nnọ fi. Ndusụk nditọwọn̄ ẹsima nditịn̄ ikọ ke ini ẹsan̄ade ye ete ye eka mmọ ẹwọrọ m̀mê ke ini udia ẹkan ini ẹtiede iso ye iso ye mmọ.
Idịghe kpukpru se ẹtịn̄de ke radio m̀mê TV ke ediyak nditọ fo ẹkop, sia ndusụk ekeme ndinam mmọ ndịk.
Nam nditọ fo ẹdiọn̄ọ nsio nsio n̄kpọ emi afo anamde man n̄kpọ idinam mbufo.
Biere se edinamde edieke nsio nsio afanikọn̄ ẹtịbede, ẹnyụn̄ ẹnanam se ẹkebierede oro ẹse ye nditọ fo.
“Sineme nneme ye nditọ fo nyụn̄ nam mmọ ẹtịn̄ nte etiede mmọ ke idem sia ekeme ndidi enyene se inamde mmọ ndịk, se itịmerede mmọ esịt, m̀mê se iyatde mmọ, edi mmọ imaha ndisio ntịn̄. Nam mmọ ẹdiọn̄ọ ke etie fi ke idem ntre n̄ko, nyụn̄ tịn̄ se in̄wamde fi ọyọ nọ mmọ.”—Bethany.