AFANIKỌN̄ AWAK AKAHA

4 | Kûduọk Idotenyịn

NTAK EDIDE AKPAN N̄KPỌ

Edieke owo enen̄erede etịmede esịt aban̄a mfịna ererimbot emi, ekeme ndinen̄ede mfịna enye inyụn̄ iyakke enye okop inemesịt. Ediwak mbon emi ẹsobode afanikọn̄ ẹsikere ke eke mmimọ okụre, ke idotenyịn idụhe aba. Mmọ ẹsinam n̄kpọ didie?

Ndusụk mmọ imaha-ma ndikere nte n̄kpọ editiede n̄kpọn̄.
Ndusụk ẹduọ ẹnyịne ke ọkpọsọn̄ ibọk ye ọkpọsọn̄ mmịn man ẹfre uwa.
Ndusụk ẹkere ke n̄kpa ọfọn akan uwem ẹnyụn̄ ẹyom ndiwot idem.

Se Anade Ọdiọn̄ọ

Ndusụk se iwọrọde fi ididịghe ke nsinsi onyụn̄ ekeme ndikụre ke ini mûdorike enyịn.
Ekpededi se iwọrọde fi ikụreke, enyene ndusụk n̄kpọ emi afo ekemede ndinam man aka iso ọyọ.
Bible ọnọ nnyịn ata idotenyịn onyụn̄ etịn̄ se idinamde mfịna ererimbot emi okụre ofụri ofụri.

Se Ekemede Ndinam

Bible ọdọhọ ete: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie. Afanikọn̄ usen ekem ye usen.”—Matthew 6:34.

Kûtịmede esịt uban̄a se iditịbede n̄kpọn̄ tutu ukemeke ndinam n̄kpọ ndomokiet mfịn. Afanikọn̄ usen ekem ye usen.

Afo nditie n̄kere idiọk n̄kpọ emi ekemede nditịbe ekeme ndinam idem enen̄ede emem fi onyụn̄ anam ọduọk idotenyịn.

SE IDIN̄WAMDE FI ỌYỌ—Nam Emi Ise

KÛKERE KE OKWO OKỤRE

Bible ọdọhọ ete: “Kpukpru usen owo ukụt ẹdọdiọk; edi owo inemesịt adia usọrọ kpukpru ini.” (Mme N̄ke 15:15) Edieke atakde ke ndikere nte n̄kpọ ọdiọkde fi, oro idiyakke okụt se akpanamde man ọbọhọ ndusụk mfịna. Edi edieke mûkereke ke okwo okụre, emekeme ndikụt nsio nsio n̄kpọ emi akpanamde man ọkọk ndusụk mfịna fo.

Sio urua ke ini emi esidade okot onyụn̄ okop mbụk n̄kpọntịbe.
Mbemiso odụkde idap, wet n̄kpọ iba m̀mê ita emi Abasi anamde ọnọ fi usen oro.
Wewet se aduakde ndinam ke usen, edi yak edi se edikemede ndinam n̄kụre. Wet ikpọ n̄kpọ emi oyomde ndinam ye nte edinamde mmọ n̄kpri n̄kpri man okụt se anamde usen oro.

DỌHỌ MBON EN̄WEN ẸN̄WAM FI

Bible ọdọhọ ete: “Owo eke adian̄arede etie ikpọn̄ . . . oyofụmi kpukpru ata ọniọn̄.” (Mme N̄ke 18:1) Udûkemeke ndiwọrọ ikpọn̄ ke editụn̄ọ obube, edi edieke owo an̄wamde fi, emekeme ndiwọrọ.

Dọhọ mbonubon fo m̀mê mme ufan fo ẹn̄wam fi.
Afo n̄ko siyom usụn̄ n̄wam mmọ. Ama an̄wam mbon en̄wen, eyefre aban̄a mfịna fo kan̄a.
Edieke osụk etiede fi nte ke okwo okụre, ke n̄kpa fo ọfọn akan uwem, emekeme ndika n̄kokụt dọkta. Ndusụk ini, edieke etiede owo ntem ke idem, emi ekeme ndiwụt ke enye enyene ekpri mfịna ibuot. Ufọkibọk ẹsin̄wam ediwak mbon emi ẹnyenede utọ mfịna emi.a

a Ẹdemede! isimekke usọbọ inọ owo.

Bible Ọnọ Nnyịn Ata Idotenyịn

Owo kiet emi eketienede ewet Psalm ama ọbọn̄ akam ọnọ Abasi ete: “Ikọ fo edi utuenikan̄ ukot mi, ye un̄wana usụn̄ mi.” (Psalm 119:105) Yak ineme nte Bible etiede nte un̄wana:

Edieke ikamade utuenikan̄ isan̄a okoneyo, iyọdiọn̄ọ ebiet emi isịnde ukot. Ukem ntre ke onyụn̄ edi ye Bible. Bible ọdọn̄ọ ediwak nti item emi ẹkemede ndin̄wam nnyịn ibiere se ikpanamde.

Un̄wana ikan̄ esinam ebiet isan̄ade ayama onyụn̄ anam ikeme ndikụt se inade nnyịn ke iso. Ukem ntre, Bible ekeme ndinam ikụt ke n̄kpọ ọyọfọn ke ini iso.

Bible edi N̄wed Abasi. Enye etịn̄ nte uwem ọkọtọn̄ọde onyụn̄ ọnọ nnyịn ata idotenyịn. Bible etịn̄:

Ufen ọkọtọn̄ọ didie?

Nte Ufen Ọkọtọn̄ọde: Bible ọdọhọ ke ‘idiọkn̄kpọ okoto owo kiet odụk ererimbot, n̄kpa onyụn̄ oto ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.’—Rome 5:12.

Ntak emi owo mîkemeke ndinam mfịna nnyịn etre?

Ntak Owo Mîkemeke Ndinam Mfịna Etre: Bible ọdọhọ ke “isịneke ke ubọk owo eke asan̄ade ndinen̄ede ikpatisan̄ esiemmọ.” (Jeremiah 10:23) Se ikụtde ke ererimbot owụt ke emi edi akpanikọ.

Nso ke Abasi edinam man mfịna ererimbot emi etre?

Se Abasi Edinamde: Bible ọdọhọ ke “enye ọyọkwọhọde kpukpru mmọn̄eyet ke enyịn [nnyịn] efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:4.