Ediset ke N̄kpa Jesus Osịm Edisịn Paul ke Ufọk N̄kpọkọbi

Ke ọyọhọ usen n̄kpa esie ita, ẹma ẹnam Jesus eset. Ke usen oro, enye ama owụt mme anditiene enye idem ke nsio nsio ini ition. Jesus ama akaiso ndiwụt mmọ idem ke usen aba efen. Ekem, nte ndusụk mbet esie ẹsede, Jesus ama ọdọk ke heaven. Usen duop ke ukperedem, Abasi ama an̄wan̄a edisana spirit ọduọk mme mbet Jesus ẹkebetde ke Jerusalem.

Ekem, mme asua Abasi ẹnam ẹtop mme apostle ẹdọn̄ ke ufọk n̄kpọkọbi, edi angel kiet anyan̄a mmọ. Ẹma ẹtọn̄ọ mbet oro, Stephen ke itiat ẹwot. Edi nnyịn ikpep nte Jesus emekde kiet ke otu mme andibiọn̄ọ emi ndidi ata akpan isụn̄utom esie, ndien enye akabade edi apostle Paul. Do, isua ita ye ubak ẹbede tọn̄ọ nte Jesus akakpa, Abasi ama ọdọn̄ apostle Peter ọkọkwọrọ ikọ ọnọ Cornelius oro midịghe Jew ye ufọk esie.

N̄kpọ nte isua 13 ẹbede, Paul ọtọn̄ọ akpan isan̄ ukwọrọ ikọ esie. Ke udiana isan̄ esie, Timothy etiene Paul. Nnyịn ikpep nte Paul ye mme nsan̄a isan̄ esie ekenyenede ediwak ini inemesịt ke ndinam n̄kpọ Abasi. Ke akpatre, ẹma ẹsịn Paul ke ufọk n̄kpọkọbi ke Rome. Isua iba ke ukperedem, ẹma ẹsana enye ẹyak, edi ndien ẹma ẹfiak ẹsịn enye ke ufọk n̄kpọkọbi ẹnyụn̄ ẹwot. Mme n̄kpọ ntịbe IKPEHE 7 ẹketịbe ke n̄kpọ nte adan̄a isua 32.