Ntak Ẹkeduọkde Ebiet Idụn̄ Mmọ

SE se itịbede ke emi. Ẹsio Adam ye Eve efep ke ediye in̄wan̄ Eden oro. Nte ọmọfiọk ntak?

Mmọ ẹkenam se idiọkde eti eti. Ntre Jehovah ke ọnọ mmọ ufen. Nte ọmọfiọk idiọkn̄kpọ oro Adam ye Eve ẹkenamde?

Mmọ ẹkenam se Abasi ọkọdọhọde mmọ ẹkunam. Abasi ọkọdọhọ ete mmọ ẹkeme ndidia mme eto in̄wan̄ oro. Edi Abasi ọkọdọhọ mmọ ẹkudia eto kiet man mmọ edikpa. Enye okonịm eto oro nte esie. Ndien nnyịn imọfiọk ke ọdiọk ndida n̄kpọ owo efen, nte nnyịn ifiọkke? Edi, nso ikotịbe?

Usen kiet, ke Eve odude ikpọn̄ ke in̄wan̄, urụkikọt ama etịn̄ ikọ ọnọ enye. Kere ban̄a oro! Enye ọkọdọhọ Eve adia mfri eto oro Abasi ọkọdọhọde mmọ ẹkudia. Ke emi, Jehovah ikanamke urụkikọt ekeme nditịn̄ ikọ. Ntre emi ọwọrọ kpọt nte ke owo efen akanam urụkikọt oro etịn̄ ikọ. Anie ekedi oro?

Ikedịghe Adam. Ntre akana edi kiet ke otu mme owo oro Jehovah akanamde ko mbemiso anamde isọn̄. Mme owo oro ẹdi mme angel, n̄ko nnyịn ikemeke ndikụt mmọ. Angel kiet emi ama atan̄ idem akaha. Enye ekekere ndidi andikara nte Abasi. Ndien okoyom mme owo ẹkop uyo esie ẹkan uyo Jehovah. Enye ekedi angel oro akanamde urụkikọt oro ẹtin̄ ikọ.

Angel emi ama ekeme ndibian̄a Eve. Ke ini ọkọdọhọde ete enye eyetie nte Abasi edieke adiade mfri oro, enye ama onịm oro. Ntre enye ama adia, Adam ama adia n̄ko. Adam ye Eve ẹma ẹtụt utọn̄ ye Abasi, ndien oro edi ntak mmọ ẹkeduọkde ediye ufọk in̄wan̄ mmọ.

Edi usen kiet Abasi eyekụt nte ke ẹnam ofụri isọn̄ eye ukem nte in̄wan̄ Eden. Ke ukperedem, nnyịn iyekpep nte afo ekemede ndibuana ke ndinam oro. Edi idahaemi, yak nnyịn ifiọk se iketịbede inọ Adam ye Eve.