Iban Uko Iba

KE NDITỌ Israel ẹdụkde afanikọn̄, mmọ ẹseme ẹnọ Jehovah. Jehovah ọbọrọ mmọ ke ndinọ mbon uko mme adaiso ndin̄wam mmọ. Bible okot mme adaiso emi mme ebiereikpe. Joshua ekedi akpa ebiereikpe, ndien ndusụk mme ebiereikpe ẹtienede enye ẹkedi Othʹni·el, Eʹhud ye Shamʹgar. Edi iba ke otu mbon oro ẹken̄wamde Israel ẹkedi iban ẹkotde Debʹo·rah ye Jaʹel.

Debʹo·rah edi prọfet an̄wan. Jehovah ọnọ enye ntọt aban̄a ini iso, ndien enye asian mme owo se Jehovah ọdọhọde. Debʹo·rah edi n̄ko ebiereikpe. Enye etie ke idak eyop ke obio obot, ndien mme owo edi ẹtiene enye ndibọ un̄wam ke mme mfịna mmọ.

Ke ini emi, Jaʹbin edi edidem Caʹnaan. Enye enyene chariot 900. Udịm ekọn̄ esie otịm ọsọn̄ tutu ẹnyịk ediwak nditọ Israel ẹkabade ifụn Jabin. Etubom ekọn̄ Edidem Jaʹbin edi Sisʹe·ra.

Usen kiet, Debʹo·rah ọdọn̄ ẹkot Baʹrak Ebiereikpe, onyụn̄ ọdọhọ enye: ‘Jehovah ọdọhọ: “Da owo 10,000 ka Obot Taʹbor. Nyeda Sisʹe·ra nsọk fi do. Ndien nyenam fi akan enye ye udịm ekọn̄ esie.”’

Baʹrak asian Debʹo·rah, ete: ‘Nyeka ke afo editienede mi aka.’ Debʹo·rah etiene aka, edi enye ọdọhọ Baʹrak: ‘Afo ududaha ukpono ke erikan, koro Jehovah eyeda Sisʹe·ra esịn n̄wan ke ubọk.’ Ndien emi edi se itịbede.

Baʹrak ọsụhọde ke Obot Taʹbor ndisobo ye udịm ekọn̄ Sisʹe·ra. Iwiwa, Jehovah anam ukwọ odu, ndien ata ediwak mme asua ẹden̄i. Edi Sisʹe·ra ọsụhọde ke chariot esie ndien efehe.

Ibịghike, Sisʹe·ra edi ke tent Jaʹel. Enye okot enye odụk edi, ndien ọnọ enye mmon̄eba. Emi anam enye idap, ndien ibịghike enye otịm ede. Ekem Jaʹel ada ọkpọhọ tent ọkọn̄ esịn idiọk owo emi ke ibuot. Ekem, ke Baʹrak edide, enye owụt enye Sisʹe·ra oro akpade. Ntre afo omokụt, se Debʹo·rah eketịn̄de ama osu.

Ke akpatre, ẹwot Edidem Jaʹbin n̄ko, ndien nditọ Israel ẹfiak ẹnyene emem ke ndusụk ini.