Nditọ Iren Iba Ẹfiakde Ẹdu Uwem

KE AFO akpakpade, ekpetie eka fo didie ke ẹkpenamde afiak odu uwem? Enye akpadara etieti! Edi nte owo oro ama akakpa ekeme ndifiak ndu uwem? Nte akanam otịbe?

Se erenowo emi, ye n̄wan ye ekpri eyeneren oro. Erenowo oro edi prọfet E·liʹjah. N̄wan edi ebeakpa Zarʹe·phath, ndien eyeneren edi eyen esie. Ọfọn, usen kiet eyeneren emi ọdọn̄ọ. Enye ọdọn̄ọ ọdiọk akan tutu enye akpa ke akpatre. Do E·liʹjah ọdọhọ n̄wan oro ete: ‘Nọ mi eyen oro.’

E·liʹjah emen obukpo eyen oro ọdọk ubet enyọn̄ okonịm ke bed. Enye ọbọn̄ akam ete: ‘O Jehovah, nam eyen emi afiak odu uwem.’ Ndien eyen oro ọtọn̄ọ ndin̄wek! Do E·liʹjah emen enye ọsụhọde onyụn̄ ọdọhọ n̄wan oro ete: ‘Sese, eyen fo odu uwem!’ Emi esịn eka esie adara etieti.

Akpan prọfet Jehovah efen ekere E·liʹsha. Enye edi andin̄wam E·liʹjah. Edi ekem Jehovah ada n̄ko E·liʹsha anam mme utịbe n̄kpọ. Usen kiet E·liʹsha aka obio Shuʹnem emi n̄wan kiet ọfọnde ido etieti ye enye. Ekem n̄wan emi aman eyeneren.

Usenubọk kiet, ke eyen emi ama okokpon, enye etiene ete esie oro anamde utom ke in̄wan̄. Ke mbuari, enye ofiori ete: ‘Ibuot abiak mi-o!’ Ke ẹma ẹkeda ẹnyọn̄, enye akpa. Eka esie ọfụhọ didie ntem! Iwiwa, enye akada E·liʹsha edi.

Ke ini E·liʹsha edide enye odụk ubet okodu ye okpo eyen oro. Enye ọbọn̄ akam ọnọ Jehovah, onyụn̄ ana enye ke idem. Ibịghike idem eyen oro ọtọn̄ọ ndifiop, ndien enye asia ikatiaba. Eka esie adat esịt didie ntem ke edikụtde eyen esie ye uwem!

Ata ediwak owo ẹma ẹkpa. Emi anam ubon ye mme ufan mmọ ẹtịm ẹfụhọ. Nnyịn inyeneke odudu ndinam mme akpa n̄kpa eset. Edi Jehovah enyene. Ekem iyekpep nte enye edinamde ediwak million owo ẹfiak ẹdidu uwem.