Abasi Ọn̄wọn̄ọ Paradise

EMI edi ndise paradise utọ oro ekemede ndidi Abasi ama owut Isaiah prọfet esie. Isaiah okodu uwem esisịt ini ke Joʹnah ama akakpa.

Paradise ọwọrọ “In̄wan̄” mme “in̄wan̄ esa.” Nte enye eti fi aban̄a n̄kpọ oro ikebemde iso ikụt ke n̄wed emi? Enye otịm ebiet ediye in̄wan̄ oro Jehovah Abasi akanamde ọnọ Adam ye Eve, nte ibietke? Edi nte ofụri isọn̄ eyekabade edi paradise?

Jehovah ama ọdọhọ prọfet esie Isaiah ewet aban̄a obufa paradise emi edide ọnọ ikọt Abasi. Enye ọkọdọhọ: ‘Ekpe ye erọn̄ ẹyedụn̄ ọtọkiet ke emem. Nditọ enan̄ ye nditọ ekpe ẹyedia n̄kpọ ọtọkiet, n̄kpri nditọ ẹyenyụn̄ ẹkpeme mmọ. Idem idiọk urụkikọt idinamke ekpri eyen ebrede mbre ekpere idiọk.’

Ediwak owo ẹyedọhọ, ‘Emi ikemeke nditịbe.’ ‘Kpukpru ini afanikọn̄ ododu ke isọn̄, ndien eyesụk akaiso odu.’ Edi kere: Nso orụk itie idụn̄ ke Abasi ọkọnọ Adam ye Eve?

Abasi okonịm Adam ye Eve ke paradise. N̄kukụre sia mmọ ẹketụtde utọn̄ ye Abasi ke mmọ ẹkeduọk ediye ebietidụn̄ mmọ, ẹsọn̄ ẹnyụn̄ ẹkpa. Abasi ọn̄wọn̄ọ ete iyenọ mbon oro ẹmade imọ ukem mme n̄kpọ oro Adam ye Eve ẹkeduọkde.

Ke obufa paradise edide, baba n̄kpọ idinamke idiọk mme ndibiat n̄kpọ. Mfọnmma emem eyedu. Kpukpru owo ẹyekop nsọn̄idem ẹnyụn̄ ẹdara. Eyedi ukem nte Abasi okoyomde edi ke editọn̄ọ. Edi ke ukperedem, iyekpep nte Abasi edidade emi idi.