Ndikwọrọ Ikọ Nnyụn̄ N̄kpep Mme Owo N̄kpọ ke Africa
Idụt: 57
Ibatowo: 827,387,930
Mme Ntiense Jehovah: 1,086,653
Ukpepn̄kpọ Bible: 2,027,124
IBATUTOM isua utom oro ekebede mi idịghe sụk ikpîkpu ibat. Enye owụt udomo n̄waidem ye ima oro iren, iban, ye nditọwọn̄ oro ẹten̄ede Abasi ẹnyenede. Ke akpanikọ, ibatutom emi anam ifiọk nte Mme Ntiense Jehovah ẹkewade idem, ẹsịnde ukeme, ẹnyụn̄ ẹdade inyene mmọ ẹsịn ke edikwọrọ eti mbụk. Jehovah Abasi ye Eyen esie, Jesus Christ, ẹda mme utọ n̄waidem emi ke ọsọn̄urua, ọkpọkọm mmọ ẹdi ikpọ m̀mê n̄kpri. (Psalm 50:14; Luke 21:1-4) Ibatutom emi eti nnyịn n̄ko nte ke “ukeme emi Abasi ọnọde” kpọt ke ẹkeme ndida nnam utom unyan̄a uwem emi. (1 Peter 4:11) Ntem, nte mbufo ẹkerede ẹban̄a ibatutom emi ọkọrọ ye mme ifiọkutom oro ẹtienede mi, mbufo ẹkpakam “ẹka iso ẹkop odudu ke Ọbọn̄ ye ke ọkpọsọn̄ ukeme esie.”—Ephesus 6:10.
Côte d’Ivoire Mme andidụn̄ ke obio-in̄wan̄ Bianouan, emi odude ke edem usiahautịn Côte d’Ivoire, ẹnen̄ede ẹnyene udọn̄ ndikpep Bible. Ndusụk mmọ ẹsidemede Mme Ntiense ke idap ke n̄kanika itiokiet usenubọk ẹte ẹkpep mmimọ Bible mbemiso ikade in̄wan̄. Mbon eken ẹsidọhọ ẹkpep mmimọ Bible ke mbubịteyo ke mbono esop ama akasuana. Usen kiet, mma kiet emi mîkemeke ndikot n̄wed ama ọdọhọ Ntiense kiet ọnọ imọ n̄wed Nso ke Bible Enen̄ede Ekpep?, emi Mme Ntiense Jehovah ẹsiode. Enye ọkọdọhọ ke ebe imọ oyokot ọnọ imọ. Ntiense oro ama ọnọ enye n̄wed oro onyụn̄ afiak aka ufọk esie edem usen. Mma oro ye ebe esie ẹma ẹtie ẹbet enye. Ebe esie ikakaha in̄wan̄ usen oro sia mmọ ẹkedade ofụri okoneyo ẹkot n̄wed emi. Enye okoyom ndineme se enye okokotde ke n̄wed oro ye Ntiense emi. Ẹma ẹtọn̄ọ ukpepn̄kpọ Bible ye mmọ.
Benin Republic Akwa ubon kiet emi ẹdụn̄de ke nsannsan ikpehe ke idụt emi ẹma ẹtọn̄ọ ndikpep Bible. Ete mmọ ekedi pastọ ke ufọkabasi oro okodude ke n̄kann̄kụk oro. Ke mmọ ẹma ẹkekpep Bible ke urua iba kpọt, ofụri ubon oro ẹma ẹnyịme ikot oro ẹkenọde mmọ ẹte ẹdidụk mbono district. Ke mbubịteyo Saturday, adiaha ete emi ama ọduọ udọn̄ọ onyụn̄ akpa. Kpa ye n̄kpọ mmọn̄eyet emi, ete emi ama odụk mbono ke Sunday. Enye ọkọdọhọ ke Monday ete, “Satan anam emi man idem emem nnyịn, edi nnyịn idikopke mmemidem.” Enye ama osion̄o ofụri n̄kpoduoho ufọkabasi esie edi: itam, n̄kpahaisịn, edisana aran, esan̄, ye ekụra emi enye ekesisịnede. N̄wan esie emi ekenyenede itie n̄ko ke ufọkabasi oro ama anam ukem oro. Pastọ emi ọkọdọhọ ete: “Imokụre ye ufọkabasi emi mfịn emi.” Ekem enye ama ọfọp kpukpru n̄kpọ oro ke eferife, ukem nte mbụk oro nnyịn isikotde ke Utom 19:19. Ubon oro ke ẹka iso ẹnam n̄kọri.
Madagascar Isua oko ke obio-in̄wan̄ emi owo 500 ẹdụn̄de, ọkwọrọikọ kiet ama ọbọ n̄wed Bible Ekpep oto Ntiense kiet ke obio-in̄wan̄ en̄wen. Ke ama eketịn̄ enyịn okot n̄wed emi, ọkwọrọikọ emi ama enịm ke imọ imokụt akpanikọ, ndien enye ama etịn̄ se enye ekekpepde ọnọ mbon ufọkabasi esie. Ikebịghike, enye ye ubon esie ye owo 20 ẹma ẹsịn n̄wed ẹwọrọ ẹkpọn̄ ufọkabasi oro ẹnyụn̄ ẹtọn̄ọ ndinịm mbono esop nte Mme Ntiense Jehovah ẹsinịmde ke kpukpru ebiet. Mme ọkwọrọikọ uyọhọ ini eke Mme Ntiense Jehovah ẹma ẹken̄wam mmọ. Mmọ ẹma ẹnịm ukpepn̄kpọ Bible ye ediwak mbon oro ẹkenyenede udọn̄ ẹnyụn̄ ẹnam ndutịm ndisinịm ndusụk mbono esop kpukpru ini. Ke October, owo ition ẹma ẹkabade ẹdi Mme Ntiense oro mînaha baptism, ndien mme ọkwọrọikọ uyọhọ ini emi ẹmenam ndutịm idahaemi man ẹsinịm An̄wan̄wa Mbono Esop ye Ufọkn̄wed Utom Ukara Abasi. Ibat mbon oro ẹsidụkde mbono esop edi owo 40 ke ẹbaharede ukem ukem, ndien ke ẹnịm se ibede ukpepn̄kpọ Bible 20.
South Africa Hennie ye n̄wan esie ẹkekwọrọ ikọ to ke enyịnusụn̄ sịm enyịnusụn̄. Ke ini mmọ ẹkesan̄ade ẹbe ọkọ oro ẹsịnde ẹkanade ufọk kiet, idat ebua ama esịn ibuot ke odudu ọkọ oro odom Hennie ubọk. Iyịp ama enen̄ede ọwọrọ enye, ntre mmọ ẹma ẹsọsọp ẹka ufọk, ndien n̄wan esie ama ọkwọhọde enye enyịn unan oro onyụn̄ ada ọfọn̄ ubọp unan ọbọp enye. Hennie ama anam ndutịm ndika n̄kokụt abiausọbọ ke ẹma ẹkenyọn̄ ukwọrọikọ ẹdi. Enye ọkọdọhọ n̄wan esie ke imọ iyomke ebua anam imọ itre ndika ukwọrọikọ, ntre mmọ ẹma ẹfiak ẹka efakutom oro ke n̄kpọ nte hour kiet ama ekebe. Mmọ ẹma ẹtọn̄ọ ukwọrọikọ ke ufọk oro adade adiana ufọk idat ebua oro. Ke mmọ ẹma ẹkewaha ufọk ifan̄, ete kiet ama ọdọhọ mmọ ẹdụk ẹdi. Enye ama enen̄ede akpan̄ utọn̄ onyụn̄ oyom mmọ ẹfiak ẹdi. Ẹma ẹtọn̄ọ ndikpep Bible ye enye, ndien ikebịghike enye ama ọtọn̄ọ ndidụk mbono esop kpukpru ini. Ke ini enye ekesịnde n̄wed ọwọrọ ke Ufọkabasi Dutch Reformed, akamba owo ufọkabasi oro ama aka ekese enye onyụn̄ ọdọhọ ke imọ iyanam enye edi adaidaha ufọkabasi oro. Edi enye ama ọsọn̄ọ ada ke ubiere oro enye akanamde ete ke imọ idikaha ufọkabasi oro aba. Enye ke aka iso anam n̄kọri onyụn̄ esịn enyịn̄ ke Ufọkn̄wed Utom Ukara Abasi.
Tanzania Ke ini ẹkenamde ubịnikọt ndinam utom ke efakutom oro odude nsannsan ke October 2005, Ntiense usụkkiet ke Esop Iringa eke Mme Ntiense Jehovah ẹma ẹka Pawaga emi okoyomde usụn̄ ke n̄kpọ nte kilomita 75. Mmọ ẹma ẹkop ke Ntiense kiet odụn̄ ke ikpehe oro, ndien mmọ ẹma ẹka ẹkeyom enye. Ke ẹma ẹkebụp ediwak owo ebiet emi enye odụn̄de, mmọ ẹma ẹdikụt enye. Ntiense emi ọkọdọhọ ke imodụn̄ do ibe isua 20, n̄ko ke ikekere ke ẹsụk ẹkpakpan utom Mme Ntiense Jehovah ke Tanzania. Enye ama esikwọrọ ikọ ọnọ mbon en̄wen ke ofụri isua oro, ndien enye ọkọdọhọ ke ama odu ndusụk mbon oro ẹkenen̄ede ẹnyene udọn̄ ke etop Bible. Mme Ntiense oro ẹketode Esop Iringa do ẹma ẹnyịme nditie urua iba ke Pawaga n̄kpep n̄kpọ ye mbon oro ẹkenyenede udọn̄ ke Bible. Ke 2006, Ntiense iba emi ẹdide mme ọkwọrọikọ uyọhọ ini ẹma ẹka Pawaga ndikan̄wam mbon oro ẹkenen̄erede ẹyom ndikop etop Bible. Ẹma ẹn̄wam Ntiense emi ke n̄kan̄ eke spirit, ndien Ntiense usụkkiet ẹdu ke ekpri otu emi idahaemi. Kan̄a ke emi, mmọ ẹsitie ke idak eto ẹnịm mbono esop, edi ke ẹnam ndutịm man ẹda n̄kpọ ubọpufọk oro odude ke n̄kann̄kụk oro ẹbọp ekpri itie utuakibuot.
Rwanda Ekpri n̄kaiferi kiet emi ekerede Gentille ama ọwọrọ etop ke ntak emi enye ọkọfiọkde ndisịn bọl. Ẹkesikot enye Manayibitego, emi ọwọrọde “Ata esịn ọ-bọl” ke usem Kinyarwanda. Ndusụk mbon Italy ẹma ẹkụt ukeme esie ẹnyụn̄ ẹnọ enye ukpep efen efen. Ekem mmọ ẹma ẹkot enye edibre mbre ikpa ke Italy. Enye ama okop inemesịt nte ke imọ iyaka Europe, ofụri ererimbot ẹyenyụn̄ ẹdiọn̄ọ imọ nte ebre mbre ikpa. Nte ededi, Gentille ama ọfiọk ke ana ikpọn̄ ubon mmimọ edieke inyịmede ikot emi. Eka esie edi Ntiense, ndien okposụkedi Gentille ekekpepde Bible, akananam enye idaha se enye ekekpepde ke akpan n̄kpọ. Se ikedide akpa ke uwem esie ekedi mbre ikpa. Gentille ama eneme n̄kpọ emi ye eka esie onyụn̄ edifiọk ke ndinyịme ikot emi ayanam imọ isobo mme idomo oro ẹdinamde imọ ibiat mbet Abasi. Enye ama ebiere ndisịn ikot oro nnyụn̄ nnam mme n̄kpọ Obio Ubọn̄ ẹdi akpa ke uwem esie. Enye ama ana baptism ke mbono oro ẹkenịmde ke ndondo emi.