Bible Ekeme Ndin̄wam Ndọ Fo

NDỌ—ye ndusụk owo, ikọ oro etie inem inem. Ye mbon eken, enye ananam esịt ayat mmọ. N̄wan kiet eseme ete: “Esitie mi nte ke mmọwọrọ ndọ. Esitie mi nte ke owo ikereke iban̄a mi nnyụn̄ n̄kop ndobo kpukpru ini.”

Nso inam owo iba emi ini kiet ko ẹken̄wọn̄ọde ndima kiet eken ẹnana ima ntre? Ntak kiet edi unana edifiọk se ndọ abuanade. Ọkọmbụk ibọkusọbọ kiet ọdọhọ ete: “Nnyịn isibọhọ ukpep ekededi mbemiso idọde ndọ.”

Ndụn̄ọde oro Otu Mme Anam Ndụn̄ọde Mban̄a Ndọ eke Ufọkn̄wed Ntaifiọk Rutgers ke New Jersey, U.S.A., ẹkenamde ọsọn̄ọ nte ke ibat ibat owo mfịn ẹnyene utọ ifiọk oro. Mme adausụn̄ ke ndụn̄ọde oro ẹwet ẹte: “Ediwak owo oro ẹkedade ẹnam ndụn̄ọde emi ẹkekọri ẹwọrọ owo ke ufọk emi ete ye eka mîkokopke inem ndọ m̀mê emi ẹkedian̄arede ndọ. Mmọ ẹnen̄ede ẹfiọk nte idiọk ndọ etiede, edi mmọ inen̄ekede ifiọk nte eti ndọ etiede. Ndusụk mmọ ẹkeme n̄kukụre ndidọhọ ke eti ndọ ‘edi isio ye ndọ ete ye eka mmimọ.’”

Ndi mme Christian isinyeneke mfịna ndọ? Baba. Ke akpanikọ, ama oyom ẹnọ ndusụk mme Christian ke akpa isua ikie nnennen item ẹte ‘ẹkûyom nditara’ n̄kpọn̄ nsan̄a ndọ mmọ. (1 Corinth 7:27) Nte an̄wan̄ade, ndọ anana-mfọnmma owo iba ekededi eyenyene mfịna, edi nnyịn imenyene un̄wam. Ebe ye n̄wan ẹkeme ndifori itie ebuana mmọ ebe ke ndida mme edumbet Bible nsịn ke edinam.

Edi akpanikọ, Bible idịghe n̄wed item ndọ. Nte ededi, sia edide Enye emi ọkọtọn̄ọde ndọ ọkọnọ odudu spirit ẹda ẹwet enye, nnyịn imekeme ndidori enyịn ke mme edumbet esie ẹyenyene ufọn. Jehovah Abasi ama ada prọfet Isaiah etịn̄ ete: “Ntem ke Jehovah, andifak fi, kpa Edisana Abasi Israel, ọdọhọ, ete, Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade. Afo akpakam akpan̄ utọn̄ ke mbet mi! ndien emem fo ekpebiet akpa mmọn̄, edinen ido fo ekpebiet mbufụt inyan̄.”—Isaiah 48:17, 18.

Nte ima oro afo akamade nsan̄a fo ini kiet ko ọtọn̄ọ ndibịt? Ndi etie fi nte ke ọmọduọ enyịne ke ndọ unana ima? N̄wan kiet emi ama ọkọdọ ndọ ke isua 26 ọkọdọhọ ete: “Inua ikemeke ndibụk ubiak oro asan̄ade ye orụk ndọ emi. Afo okop ubiak emi kpukpru ini.” Utu ke ndinyịme ndika iso ke idiọk ndọ, ntak mûbiereke ndinam n̄kpọ mban̄a enye? Ibuotikọ oro etienede oyowụt mme ebe ye iban nte mme edumbet Bible ẹkemede ndin̄wam ndọ mmọ ke akpan usụn̄ kiet—oro edi unyịme.

Nte Ekemede Ndisọn̄ọ Ndọ Fo

KERE ban̄a ufọk emi ama ọkọtọn̄ọ ndibiara. Ndom mbakara ẹtọn̄ọ ndidian̄ade, ọkọm edịt, mbiet onyụn̄ etịbe ke an̄wa. Ke akpanikọ, edịm ọmọbọn̄ ufọk emi ke ediwak isua, ndien ẹma ẹwọn̄ọ ẹkpọn̄ enye. Ndi akpana ẹwụri enye? Baba. Edieke itiat idakisọn̄ ye ibibene esie ẹsọn̄de idem, etie nte ẹkeme ndidiọn̄ ufọk oro.

Ndi idaha ufọk oro eti fi ndọ fo? Ke ediwak isua, ọkpọsọn̄ edịm, yak idọhọ ntre, ọmọbọn̄ ndọ fo. Ekeme ndidi owo kiet ke otu mbufo m̀mê mbufo mbiba ẹmefụmi ndọ mbufo. Ekeme nditie fi ke idem nte eketiede Sandy. Ke ama ọkọdọ ndọ ke isua 15, enye ọkọdọhọ ete: “Ke ẹsiode nnyịn ndidi ebe ye n̄wan ẹfep, nnyịn isinamke n̄kpọ ndomokiet ọtọkiet. Ndien oro ikekemke.”

Idem edieke ndọ fo etiede ntre, kûsọsọp ubiere ke akpana ẹdian̄ade ndọ. Eyedi ẹmekeme ndisọn̄ọ ndọ mbufo. Ekese ẹkọn̄ọ ke adan̄a nte mbufo mbiba ẹnyịmede. Unyịme ekeme ndinam ndọ ọsọn̄ọ ada ke mme ini idomo. Edi nso idi unyịme? Ndien didie ke Bible ekeme ndin̄wam fi ọsọn̄ọ enye?

Unyịme Abuana Mbiomo

Unyịme ọwọrọ n̄kpọ ndibiomo owo m̀mê ntụk ndinụk owo ndinam n̄kpọ. Ndusụk ini, ẹsida ikọ oro ẹtịn̄ ẹban̄a n̄kpọ oro mînyeneke uwem, utọ nte ediomi mbubehe. Ke uwụtn̄kpọ, ọbọpufọk ekeme ndikere ke obiomo imọ ndinam ediomi oro imọ ikodụkde ndibọp ufọk. Ekeme ndidi enye ikam ifiọkke andidọhọ ẹnam utom oro. Kpa ye oro, enye ekere ke obiomo imọ ndinam se imọ ikenyịmede.

Okposụkedi ndọ mîdịghe ikpîkpu edinam mbubehe, unyịme oro asan̄ade ye enye abuana mbiomo. Anaedi afo ye nsan̄a fo ẹma ẹda un̄wọn̄ọ ke iso Abasi ye owo nte ke mmimọ ididụn̄ ọtọkiet, inamke n̄kpọ m̀mê nso itịbe. Jesus ọkọdọhọ ete: “Enye emi okobotde [eren ye n̄wan] obot mmọ eren ye n̄wan toto ke editọn̄ọ. N̄ko, Ke ntak emi owo ọyọkpọn̄ ete ye eka esie akadiana ye n̄wan esie.” Jesus ama adian do ete: “Se Abasi ama akadian, yak owo okûdianade.” (Matthew 19:4-6) Mmọdo, ke ini mme mfịna ẹdemerede, afo ye nsan̄a ndọ fo ẹkpenyene ndinen̄ede mbiere ndinam se mbufo ẹkenyịmede.a N̄wan kiet ọdọhọ ete: “Edi ke ima iketre ndikere mban̄a usiondọ ke n̄kpọ ẹketọn̄ọ ndifọn.”