San̄a Kpere Abasi

“Abasi Kpukpru Ndọn̄esịt”

2 Corinth 1:3, 4

UFEN, edikpu, ndobo, ye ediwak n̄kpọ eken ẹkeme ndinam nnyịn ifụhọ m̀mê iduọk idotenyịn. Mme utọ n̄kpọ emi ẹkeme ndinam fi ekere m̀mê anie ekeme ndidọn̄ imọ esịt. Se apostle Paul ekewetde ke 2 Corinth 1:3, 4 owụt akpan owo oro ekemede ndidọn̄ nnyịn esịt, oro edi, Jehovah Abasi.

Ẹkot Abasi “Ete mbọm” ke ufan̄ikọ 3.a Nso ke emi ọwọrọ? N̄wed kiet oro etịn̄de n̄kpọ aban̄a Bible ọdọhọ ke ẹkeme ndikabade “mbọm” nte “edinen̄ede n̄kere mban̄a owo.” “Mbọm” esinam Abasi anam n̄kpọ. Ndifiọk ke Abasi edi Abasi mbọm esinam nnyịn isan̄a ikpere enye.

Paul ọdọhọ n̄ko ke Jehovah edi “Abasi kpukpru ndọn̄esịt.” Se Paul etịn̄de mi abuana “ndinọ owo oro odude ke mfịna m̀mê ofụhọde ndọn̄esịt; onyụn̄ abuana ndin̄wam m̀mê ndisịn udọn̄ nnọ owo.” The Interpreter’s Bible ọdọhọ ete: “Ke ini in̄wamde owo ọyọ mfịna, ọwọrọ ke imọdọn̄ enye esịt.”

Emekeme ndibụp m̀mê didie ke Abasi esidọn̄ nnyịn esịt onyụn̄ an̄wam nnyịn iyọ mfịna? Akpan n̄kpọ iba oro enye esidade ọdọn̄ nnyịn esịt ẹdi akam ye Ikọ esie, kpa Bible. Paul ọdọhọ ke ima anam Abasi ọnọ nnyịn Ikọ Esie man “nnyịn ikpenyene idotenyịn” ke “ndọn̄esịt eke otode N̄wed Abasi.” Ke adianade do, akam ofụri esịt ekeme ndinam nnyịn inyene “emem Abasi emi akande kpukpru ekikere.”—Rome 15:4; Philippi 4:7.

Adan̄a didie ke Jehovah esidọn̄ ikọt esie esịt? Paul ọdọhọ ke Abasi ‘esidọn̄ nnyịn esịt ke kpukpru ukụt nnyịn.’ (2 Corinth 1:4) Inamke n̄kpọ m̀mê nso afanikọn̄, ukụt, m̀mê ndutụhọ ke isobo, Abasi ekeme ndinọ nnyịn odudu ye ukeme ndiyọ. Ndi emi idọn̄ke fi esịt?

Idịghe owo oro Abasi ọdọn̄de esịt kpọt esibọ ufọn oto ndọn̄esịt oro. Paul aka iso ete ke Abasi ọdọn̄ nnyịn esịt man “nnyịn ikpekeme ndidọn̄ mbon oro ẹdude ke ukụt ekededi esịt ebe ke ndọn̄esịt oro Abasi ọnọde nnyịn.” Ke ini ẹdọn̄de nnyịn esịt ke ukụt nnyịn, emi esinam nnyịn ikop mbon en̄wen mbọm inyụn̄ in̄wam mbon oro ẹdude ke unana.

Jehovah ndidi “Abasi ndọn̄esịt” iwọrọke ke enye ọmọn̄ emen mfịna nnyịn efep inikiet inikiet. Edi nnyịn imọfiọk ke edieke idọhọde enye an̄wam nnyịn, enye ọyọnọ nnyịn odudu ndiyọ se ededi oro isobode ke uwem. Enen̄ede odot ituak ibuot inọ inyụn̄ itoro utọ Abasi mbọm oro.

[Ikọ Idakisọn̄]