“Enye An̄wam Mi Nsịm Esịt Mme Owo”
INI kiet ko, ata ediwak owo ẹma ẹto idụt 135 ẹkesobo ke Porto Alegre, emi odude ke usụk usụk Brazil, man ẹneme mbubehe obio. Ke ini nduọkodudu, Mme Ntiense Jehovah ke Porto Alegre ẹma ẹsan̄a ẹbịne ediwak mbon oro ẹkedụkde edinam emi ẹkekwọrọ ikọ ẹnọ mmọ. Mmọ ẹkesan̄a didie ẹkwọrọ ikọ ẹnọ mbon oro ẹsemde nsio nsio usem do?
Asiakusụn̄ kiet emi ekerede Elizabete ọbọrọ ete: “Ikada ekpri n̄wed Good News for People of All Nations. Ediwak mbon oro ẹkedụkde edinam oro ikopke eti mbụk Obio Ubọn̄ akananam, edi mmọ ẹma ẹnen̄ede ẹkpan̄ utọn̄. Ima inyene nneme ye mbon Bolivia, China, France, India, Israel, ye Nigeria. Ima inyụn̄ ikama mme n̄wed nnyịn ke usem ediwak mbon oro ẹkedụkde edinam oro, ndien mmọ ẹma ẹbọ ye idatesịt.
Asiakusụn̄ emi ekerede Raúl ama okụt unen ke ndida ekpri n̄wed emi n̄kwọrọ ikọ ke Mexico. Enye ama osobo akanieren Arabia emi edide isua 80, ndien ikebịghike n̄wan esie akakpa. Ke ete oro ama okokot page emi ẹwetde etop Obio Ubọn̄ ke usem Arabic, mmọn̄eyet idatesịt ama asiaha enye. Ntak-a? Un̄wọn̄ọ oro Abasi ọn̄wọn̄ọde ke Ediyarade 21:3, 4 ke n̄kpa ididụhe aba, ama enen̄ede otụk enye ke ini enye okokotde ke usem mmọ. Isan̄ en̄wen, Raúl ama osobo ye ete kiet emi esemde usem Portuguese ke ini enye ọkọnọde ikọ ntiense ido nneme. Eyen esie ama akpa. Raúl ama anam enye okot page oro ẹwetde ke usem Portuguese. Ke ama okokot, ete oro ama owụt ke imoyom ndifiọk ekese mban̄a Bible, onyụn̄ enyịme ẹdikpep imọ Bible.
Raúl akama ekpri n̄wed Good News for People of All Nations ọkwọrọ ikọ ọnọ mbon oro ẹsemde usem Armenian, Chinese, French, German, Hindi, Ikọmbakara, Korean, Mixe, Persian, Russian, ye Zapotec. Enye ọdọhọ ete: “Mmokụt nte ọfọnde ndikama n̄wed emi n̄ka ukwọrọikọ. Enye an̄wam mi nsịm esịt mme owo, idem ọkpọkọm n̄kopke usem mmọ.”
Nte ediwak owo ẹwọrọde ẹkedụn̄ ke esenidụt, ntre ke inyene ediwak ifet ndikụt mbon oro ẹsemde nsio nsio usem. Edieke ikamade ekpri n̄wed Good News for People of All Nations, nnyịn iyekeme ndikwọrọ ikọ nnọ mmọ. Ndi emesikama n̄wed emi?
[Mme Ndise ke page 32]
Raúl ye ekpri n̄wed emi an̄wamde enye esịm esịt mme owo