Ọyọhọ 5
Yụhọ Udọn̄ N̄kpọ eke Spirit Fo
NSO KE BIBLE EKPEP? “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.”—Matthew 5:3.
NSO IDI MFỊNA? Ata ediwak nsio nsio ido ukpono ẹdu, ediwak mmọ ẹnyụn̄ ẹkpep nsio nsio usụn̄ emi afo ekemede ndiyụhọ udọn̄ n̄kpọ eke spirit fo. Didie ke afo ekeme ndidiọn̄ọ enye emi ekpepde akpanikọ onyụn̄ etịmde enem Abasi esịt? Ndusụk mme ewetn̄wed oro ẹwọrọde etop ẹdọhọ ke ndinịm ke Abasi odu nnyụn̄ ntuak ibuot nnọ enye iwụtke ifiọk, inyụn̄ inyeneke ufọn. Magazine oro ẹkotde Maclean’s etịn̄ ibio ibio se ọwọrọetop ete kiet emi mînịmke ke Abasi odu eketịn̄de ete: “Ekikere mme Christian emi nte ke odu n̄kpọ emi akande ifiọk ntaifiọk onyụn̄ akande ukeme owo . . . iyakke idu n̄kukụre uwem emi inyenede mi nte ikpodude onyụn̄ anam nnyịn inen̄ede ima afai.”
NSO KE AKPANAM? Dụn̄ọde mme n̄kpọ oro ẹwụtde ke Abasi odu. (Rome 1:20; Mme Hebrew 3:4) Kûyak baba owo kiet anam fi etre ndiyom ibọrọ mme akpan mbụme nte mbon emi: Ntak emi idude mi-e? Ndi uwem odu ke n̄kpa ebede? Ntak emi mme owo ẹbọde ufen ntem-e? Nso ke Abasi oyom mi nnam? Ndinyene nnennen ibọrọ nnọ mme mbụme emi ayan̄wam fi oyụhọ ye se enyenede.
Nte ededi, kûnịm se mme owo ẹtịn̄de nnan nnan. Ikọ Abasi ọdọhọ fi ada “ukeme ukere n̄kpọ” fo anam n̄kpọ onyụn̄ etịm ọfiọk se inemde Abasi esịt. (Rome 12:1, 2) Ẹyenọ fi utịp ke ukeme oro esịnde. Edieke afo adade ini ekpep Bible onyụn̄ adade nti item esie esịn ke edinam, afo eyefep mfịna, udunen̄ekede utịmede esịt, oyonyụn̄ okop inem uwem. Idịghe ikpîkpu un̄wọn̄ọ edi oro. Ediwak miliọn owo oro ẹtode nsio nsio idaha ke uwem ẹbọ ufọn ke ndikpep akpanikọ aban̄ade Abasi ye uduak esie. Ke uwụtn̄kpọ, kot mbụk uwem oro odude ke page 18 esịm 21 ke magazine emi.
Nte afo ọbọde ufọn ke ndida nti item Bible nsịn ke edinam, eyetetịm abak Abasi. Ntak emi mûnyịmeke Mme Ntiense Jehovah ẹkpep Bible ye afo? Edieke anamde oro, anaedi afo eyenyịme ye ikọ apostle Paul emi nte ke “uten̄e Abasi emi, ọkọrọ ye owo ndiyụhọ ke se enye enyenede, edi usụn̄ akwa udori.”—1 Timothy 6:6.
[Ndise ke page 8]
Tịm fiọk se inemde Abasi esịt