5 Abasi Enyenyịme Utuakibuot Ekededi Ama Akam Edi Ẹnam ke Ofụri Esịt—Ndi Emi Edi Akpanikọ?

Ekeme ndidi emesikop ẹdọhọde ẹte: “Kpa nte ẹkemede ndisan̄a nsio nsio usụn̄ n̄ka ebiet kiet, ntre n̄ko ke ẹkeme ndikpono Abasi ke nsio nsio usụn̄. Ana kpukpru owo ẹyom usụn̄ emi mmọ ẹdikponode Abasi.”

Se Bible ekpepde: Akpana ikpono Abasi ke ofụri esịt, ikûdi mbubịk. Jesus ama etịn̄ ọnọ mme adaiso ido ukpono eyo esie se ikanamde Abasi esịn utuakibuot mmọ, ete: “Isaiah ama etịn̄ ntịn̄nnịm ikọ nte odotde aban̄a mbufo mbon mbubịk, nte ẹwetde ẹte, ‘Mbon emi ẹkpono mi ke n̄kpọkinua mmọ, edi esịt mmọ ada nsannsan ye ami.’” (Mark 7:6) Edi owo ndituak ibuot nnọ Abasi nte amama ama akam edi anam ke ofụri esịt inamke Abasi enyịme utuakibuot esie.

Jesus ama owụt se ikanamde Abasi okûnyịme utuakibuot mme adaiso iso ukpono eyo esie ye eke mme anditiene mmọ, ete: “Mmọ ẹtuak ibuot ẹnọ [Abasi] ke ikpîkpu, koro mmọ ẹkpepde mme ewụhọ owo ke ukpepn̄kpọ mmọ.” (Mark 7:7) Omokụt do, ke ndikekpep mme ewụhọ owo utu ke eke Abasi akanam utuakibuot mmọ edi ikpîkpu.

Bible idọhọke ke ediwak usụn̄ ẹdu ndida n̄kpono Abasi, edi akam ọdọhọ ke usụn̄ kiet kpọt odu. Matthew 7:13, 14 ọdọhọ ete: “Ẹbe ke mfafaha inuaotop ẹdụk; koro usụn̄ emi adade esịm nsobo atatara onyụn̄ an̄wan̄a, mme andibe ke enye ndụk ẹnyụn̄ ẹwak; edi inuaotop emi adade esịm uwem afafaha usụn̄ onyụn̄ esịre, ndien mme andikụt enye iwakke.”

Nte ndifiọk akpanikọ an̄wamde nnyịn: Kere nte ekpetiede fi ke idem edieke akpadade ediwak ọfiọn̄ etịm idem ọnọ mbuba itọk. Ekem afo efehe itọk oro emen akpa, edi ẹdọhọ ke ama abiat kiet ke otu ibet mbuba oro ke unana ifiọk, ke ntre ke idịghe afo emen akpa. Kpukpru se akanamde oro ọkpọwọrọ ikpîkpu. Ndi ukem n̄kpọ emi ekeme nditịbe ke nte ituakde ibuot inọ Abasi?

Apostle Paul ekemen utuakibuot nnyịn odomo ye mbuba. Enye ọkọdọhọ ete: “Edieke owo odomode ndikan ke mbre mbuba, owo idiyarake enye anyanya ibọhọke enye asan̄a nte ekemde ye ibet.” (2 Timothy 2:5) Jehovah idinyịmeke utuakibuot nnyịn ibọhọke nnyịn ituak ibuot inọ enye “nte ekemde ye ibet” esie. Nnyịn ikemeke ndimek nte ikpatuakde ibuot inọ Abasi ukem nte efehe-mbuba mîkemeke ndimek ebiet emi enye ekpefehede aka ndien ekere ke iyosụk imen akpa.

Edieke iyomde Abasi enem esịt ye nnyịn, inaha idụk ido ukpono emi ẹsude nsu ẹdori enye. Jesus ọkọdọhọ ete: “Ata mme andituak ibuot [ẹdituak] ibuot ẹnọ Ete ke spirit ye ke akpanikọ.” (John 4:23) Bible etịn̄ nnennen usụn̄ emi ikpatuakde ibuot inọ Abasi.—John 17:17.a

[Ikọ Idakisọn̄]

[Se ẹwetde ke ikpọ abisi ke page 8]

Ndi kpukpru ido ukpono ẹkpep mme owo ndikpono Abasi nte enye oyomde?