Oto Itieutom Ubon N̄kani N̄kpọ Nnyịn
Nditịm N̄kani N̄kpọuto Nnyịn Mbon
IKỌT Jehovah ẹmenam n̄kpọ esie ke ata anyan ini ẹnyụn̄ ẹnyene inem inem mbụk emi aban̄ade oro. Ẹkeme ndifiọk emi ke ndikot mme n̄wed nnyịn ye ke mme ndise, leta, ọkpọkpọ n̄wetnnịm n̄kpọ, ye n̄kani n̄kpọ oro ẹnyenede ebuana ye utuakibuot, utom ukwọrọikọ, ye mbụk nnyịn. Edi nso idi ufọn editịm mme utọ n̄kpọ oro mbon nnyụn̄ ndụn̄ọde se ikebede? Akana mme ibuot ufọk ke Israel eset ẹnam nditọ mmọ ẹfiọk mme ibet ye mme utịbe utom Jehovah man mmọ ẹkpenyụn̄ “ẹbuọt idem ke Abasi.”—Ps. 78:1-7.
Edidụn̄ọde n̄kani n̄kpọ aman̄wam ẹnam uduak Jehovah ke ata anyan ini. Ke uwụtn̄kpọ, ke ini mme asua ẹkedomode nditre utom ke temple ke Jerusalem, ẹma ẹdụn̄ọde mme n̄wetnnịm n̄kpọ ukara ke otu n̄kani n̄kpọ ke Ecbatana, ibuot obio Media, ẹnyụn̄ ẹkụt n̄wed emi Edidem Cyrus ekewetde, emi ọkọnọde odudu ete ẹfiak ẹbọp temple oro. (Ezra 6:1-4, 12) Ntem, ẹma ẹfiak ẹbọp temple oro nte ekemde ye uduak Abasi. Luke, andiwet Gospel, emi ‘ọkọtọn̄ọde ke editọn̄ọ etiene kpukpru n̄kpọ nnennen nnennen,’ ama odụn̄ọde n̄kani n̄kpọ n̄ko.—Luke 1:1-4.
Otu Ukara enen̄ede enyene udọn̄ ke mbụk ukara Abasi nnyịn. Owo Otu Ukara kiet eketịn̄ ntem aban̄a ufọn editịm n̄kpọ nnịm nnyụn̄ nnam mbon emi ẹdidude ke ini iso ẹfiọk mbụk nnyịn, ete: “Ndifiọk se iketịbede inọ nnyịn ke ini edem ọyọnọ nnyịn odudu ye uko ndika iso.” Ke ntak oro, ke ndondo emi, ẹmesiak obufa itieutom oro ẹkotde Itieutom Ubon N̄kani N̄kpọ, ke ibuot itieutom nnyịn ke Brooklyn ke New York, ndien enye esịne ke idak Kọmiti Uwetn̄wed.
SE ITIEDE NTE MME NDISE UBON YE MME N̄KPỌ-AKPA NNYỊN
Nte ini akade, nnyịn imesifre se iketịbede ke ini edem, ndien ediwak nnyịn imesitua n̄kpọfiọk ke ndiketre ndiwet kpukpru se iketịbede ke ubon nnyịn nnịm. Ke ẹnam utom ọkpọsọn̄ ke Itieutom Ubon N̄kani N̄kpọ man ẹtịm mme n̄kpọ ukara Abasi ẹbon ẹnyụn̄ ẹwet n̄kpọ ẹban̄a mmọ. Ẹkeme ndida mme ndise oro ẹtịmde ẹbon ke Itieutom Ubon N̄kani N̄kpọ nte ubak ndise ubon nnyịn. Ẹbon n̄ko mme akpa n̄wed nnyịn, mme inem inem mbụk eyouwem enyene-idem, ye mme ọsọn̄urua n̄kpọ eken ke Itieutom Ubon N̄kani N̄kpọ emi. Ẹda mme utọ n̄kpọ oro nte n̄kpọ-akpa oro ẹn̄wamde nnyịn idiọn̄ọ mme edinam ukara Abasi ini edem ẹnyụn̄ ẹn̄wam nnyịn inyene mbuọtidem nte ke ini iso esop Abasi ọyọfọn.
Nnyịn isịn udọn̄ inọ fi ite esikot obufa ikpehe emi ẹkotde “Oto Itieutom Ubon N̄kani N̄kpọ Nnyịn” man ọfiọk se idude ke Itieutom Ubon N̄kani N̄kpọ. Enye edisidu ke ini ke ini ke nsiondi Enyọn̄-Ukpeme eke ukpepn̄kpọ. Ke uwụtn̄kpọ, ke nsiondi en̄wen, iduak ndiwet ibuotikọ oro enyenede ediwak ndise, emi edibọrọde mme mbụme emi: Nso ikedi Ukpat Dawn? Mmanie ẹkesikama enye? Ini ewe ke ẹkesikama enye, ndien ẹkesida enye ẹnam nso?
Ukem nte mme ndise ubon, se idude ke Itieutom Ubon N̄kani N̄kpọ ẹnen̄ede ẹsian nnyịn n̄kpọ ẹban̄a idem nnyịn ye mbon oro ẹkedude ke esop Abasi mbemiso nnyịn—oro edi, asian nnyịn aban̄a mbuọtidem ye uko mbon oro ẹkedude mbemiso nnyịn, idatesịt ye mme mfịna oro asan̄ade ye edinam n̄kpọ Ete nnyịn eke heaven, ye ndausụn̄ Abasi ye n̄kaiso ibetedem oro Abasi esinọde ikọt esie. (Deut. 33:27) Imenen̄ede inịm ke Jehovah ọyọdiọn̄ n̄kaiso ukeme oro isịnde nditịm mbụk esop Abasi nnyịn nnịm, man ikpaka iso idiana kiet inyụn̄ ikop odudu ndinam uduak esie.
[Ekebe/Ndise ke page 31]
Nditịm Mfiọk Se Ẹsinamde
Ke ini ẹyomde ndinam mme n̄wed nnyịn, DVD, ye mme n̄kpọ eken emi ẹdade se isịnede ke mmọ ẹto Bible, mme ewetn̄wed, mme ewet ndise, mme anam-ndụn̄ọde, ye mbon eken ẹsida n̄kpọ ẹto n̄kani n̄kpọ nnyịn. Ke ntem, Itieutom Ubon N̄kani N̄kpọ enen̄ede etịn̄ enyịn ọbọ mme n̄kọk itieutom, mme itieutom ke Bethel, mme esop, mme owo, ye mme itieutom ererimbot, n̄kani n̄kpọ onyụn̄ etịm mmọ obon. Se nte ẹsinamde oro mi:
Ndibọ Mme N̄kpọ Nnyụn̄ Ndụn̄ọde: Ẹkaka iso ndibọ n̄wọrọnda n̄kani n̄kpọ ndibon ke Itieutom Ubon N̄kani N̄kpọ Nnyịn. Mme owo emi mme ubon mmọ ẹnamde n̄kpọ Jehovah ke ata ediwak isua ẹnọ m̀mê ẹbuọt nnyịn ediwak ke otu n̄kpọ oro. Ndidụn̄ọde nnyụn̄ mmen mme n̄kpọ oro ndomo ye en̄wen anam inen̄ede ifiọk mbụk utom nnyịn ye eke mbon emi ẹkedude ini oro.
Ndiwet Enyịn̄ Mmọ Mbon: Ata ediwak n̄kpọ ẹdu ke Itieutom Ubon N̄kani N̄kpọ, ndien ndusụk mmọ ẹbe isua ikie. Mmọ ẹdi ke utọ ke utọ, ke idaha ke idaha, ye ke uduot ke uduot, ndien ẹnen̄ede ẹtịn̄ enyịn ẹwet enyịn̄ mmọ ẹbon man ẹkpeda mmọ ẹnam n̄kpọ ke ini iso.
Ndifiak Ndiọn̄ Nnyụn̄ Ntịm Mbon: Ẹsida ata usọ ẹfiak ẹdiọn̄ mme n̄wed ye mme n̄kpọ eken oro ẹkemede ndibiara ẹnyụn̄ ẹtịm mmọ ẹbon. Ẹsision̄o mme n̄wed, ndise, mbụk n̄kpọntịbe, fim, ye mme n̄kpọ eken ẹdọn̄ ke kọmputa. Ke ntem, ẹkeme ndision̄o mmọ ke kọmputa nda nnam n̄kpọ mbak ẹditụk mmọ ke ubọk, sia oro akpanam mmọ ẹsọp ẹbiara.
Ndibon Nnyụn̄ Nda Nnam N̄kpọ: Ẹsitịm n̄kani n̄kpọ ẹbon ke nde ke nde mbak ẹdisomo, un̄wana ye mbịtmbịt ẹdinyụn̄ ẹbiat mmọ. Ke ẹnam ndutịm kọmputa emi ẹdisidade idụn̄ọde mme ọsọn̄urua n̄kani n̄kpọ emi n̄kụt nda nnam n̄kpọ.
[Mme Ndise ke page 32]
1. Babru emi ẹkedade ẹtọt “Photo-Drama of Creation.” 2. Babru enyịn̄ mme anditobo n̄wed. 3. Ubomisọn̄ usuanetop. 4. Ikpaedem Enyọn̄-Ukpeme eke April 15, 1912. 5. Babru emi ẹkedade ẹnọ J. F. Rutherford aka n̄kpọkọbi. 6. Ukwak utịn̄ikọ itieutom ekebe utịn̄ikọ WBBR (Watchtower Bible Broadcasting Radio). 7. Ukwak ubre usanikwọ. 8. Ekebe n̄wed emi ẹkamade-kama ẹsan̄a. 9. Ọkpọkpọ n̄wetnnịm n̄kpọ. 10. Telegram mme bodisi.