Ke Ẹyoyom Ibọrọ

“Ata ediwak owo ẹnyene se mmọ ẹnịmde ẹban̄a [Jesus]. Edi inamke n̄kpọ m̀mê idi nso utọ owo, imesibụp ite, ‘Owo emi ededi anie?’”—AUTHOR STAN GUTHRIE.

MME owo ẹsima ndifiọk n̄kpọ mban̄a Jesus. N̄wed emi ẹwetde ẹban̄a enye anyama akan. Mme fim emi ẹban̄ade enye ẹwọrọ etop etieti. Kpa ye oro, ndusụk owo ẹsụk ẹnyenyene mbụme ẹban̄a owo emi Jesus ekenen̄erede edi, ke ini mbon eken ẹnyenede nsio nsio ekikere ẹban̄a enye.

Isua ifan̄ ko ke edem, mme ewetmbụk n̄kpọntịbe iba ẹma ẹbụp mme owo ke Intanet m̀mê Jesus ekedi anie. Kop nsio nsio ibọrọ emi mme owo ẹkenọde mi:

● “Etie nte enye ekedi rabbi (andikpep) emi ekesituade mme owo mbọm etieti.”

● “Enye ekedi owo nte nnyịn, edi ama ọfọn uwem etieti.”

● “N̄kpọ idụhe ndiwụt ke Jesus ama odu mi ke isọn̄ emi.”

● “Jesus edi Eyen Abasi emi akamanade, akpade, onyụn̄ esetde man anyan̄a nnyịn osio ke mme idiọkn̄kpọ nnyịn. Mfịn Enye ke ododu uwem, oyonyụn̄ afiak edi isọn̄ emi.”

● “Ami nnịm ke Jesus Christ edi ikpọn̄-ikpọn̄ eyen Abasi, edi owo, onyụn̄ edi abasi.”

● “Jesus edi owo n̄ke emi mme okpon-esehe ẹsikede.”

Idịghe kpukpru ekikere emi ẹnen. Ndi odu ebiet emi ikemede ndikụt nnennen ibọrọ nnọ mme mbụme emi ẹban̄ade Jesus? Mme andisio magazine emi ẹnịm ke akpanikọ nte ke Bible edi Ikọ Abasi ye nte ke Bible ikpọn̄-ikpọn̄ ekeme nditịn̄ akpanikọ nnọ nnyịn mban̄a Jesus.a—2 Timothy 3:16.

Imọn̄ ida ibuotikọ oro etienede ineme nte Bible ọbọrọde mme mbụme emi ẹsiwakde ndibụp mban̄a Jesus. Enye Jesus ke idemesie ọkọdọhọ ete ke ẹyenyan̄a “owo ekededi oro ọbuọtde idem” ye imọ. (John 3:16) Imoyom fi okot mme ibọrọ emi onyụn̄ ebiere m̀mê afo ayama ndika iso n̄kpep n̄kpọ mban̄a Jesus nnyụn̄ mbuọt idem ye enye.

[Ikọ Idakisọn̄]