Mme Andikot N̄wed Nnyịn Ẹbụp Ẹte . . .

Ndi Iban Mme Ntiense Jehovah Ẹsikwọrọ Ikọ?

▪ Ih, iban Mme Ntiense Jehovah emi ẹkwọrọde eti mbụk Obio Ubọn̄ Abasi ke ofụri ererimbot ẹwak etieti. Psalm 68:11 ọdọhọ ete: “Jehovah ọnọ uyo; iban emi ẹtan̄ade eti mbụk ẹdi akwa udịm.”

Edi iban Mme Ntiense Jehovah isikwọrọke ikọ nte iban ido ukpono en̄wen ẹsikwọrọde. Ntak idọhọde ntre?

Iban emi ẹsikwọrọde ikọ ke mme ido ukpono en̄wen ẹsida ke n̄kpoto ufọkabasi mmọ ẹkwọrọ ikọ ẹnọ ufọkabasi. Edi iban Mme Ntiense Jehovah ẹsisan̄a ke ufọk ke ufọk ye ke mme ebiet en̄wen ẹkwọrọ ikọ ẹnọ mme owo, ikpepke ufọkabasi n̄kpọ.

Usụn̄ en̄wen emi ukwọrọikọ iban Mme Ntiense Jehovah mîtiehe nte eke iban emi ẹsikwọrọde ikọ ke mme ufọkabasi en̄wen edi ke iban Mme Ntiense Jehovah isikpepke ufọkabasi n̄kpọ ke ebiet emi irenowo emi ẹnade baptism ẹdude. Irenowo emi ẹmekde nte mme andikpep kpọt ẹsinam emi.—1 Timothy 3:2; James 3:1.

Irenowo kpọt ke Bible ọdọhọ ẹda usụn̄ ke ufọkabasi. Se nte Paul eketịn̄de aban̄a emi ke leta emi enye ekewetde Titus emi ekedide kiet ke otu mbiowo ufọkabasi. Enye ọkọdọhọ Titus ete: “N̄kọkpọn̄ fi ke Crete ke ntak emi, man afo . . . emek mbiowo ke obio ke obio.” Paul ama adian do ete ke erenowo oro edide ebiowo ekpenyene ndidi owo “eke owo mînyeneke se ẹtịn̄de ẹdian . . . , ebe n̄wan kiet.” (Titus 1:5, 6) Paul ama ewet Timothy ukem leta emi ete: “Edieke owo ekededi anyanarede ebịne itieutom esenyịn, enye oyom eti utom. Ntre esenyịn ekpenyene ndidi owo emi owo mîkemeke ndidori ikọ, ebe n̄wan kiet, . . . odot ndikpep owo n̄kpọ.”—1 Timothy 3:1, 2.

Ntak emi edikpep n̄kpọ ke esịt ufọkabasi edide utom irenowo kpọt? Paul ọbọrọ ete: “Nyomke n̄wan ọnọ ukpep, m̀mê akara erenowo, edi odu ke ndopuyo. Koro ẹkebem iso ẹbot Adam, ndien ẹdibot Eve.” (1 Timothy 2:12, 13) Abasi ndikebem iso mbot erenowo owụt ke enye oyom irenowo ẹsikpep n̄kpọ ẹnyụn̄ ẹda usụn̄ ke ufọkabasi.

Mme Ntiense Jehovah ẹtiene uwụtn̄kpọ Jesus Christ emi edide Adausụn̄ mmọ. Luke, kiet ke otu mbet esie ekewet ntem aban̄a nte Jesus ọkọkwọrọde ikọ: “Enye asan̄a to ke obio sịm obio, onyụn̄ oto ke obio-in̄wan̄ esịm obio-in̄wan̄, ọkwọrọ onyụn̄ atan̄a eti mbụk obio ubọn̄ Abasi.” Ekem Jesus osio mme mbet esie ọdọn̄ kpa utom emi. Luke aka iso ete: “Mmọ ẹdaha ẹsan̄a to ke obio-in̄wan̄ sịm obio-in̄wan̄ ke ikpehe oro, ẹtan̄a eti mbụk.”—Luke 8:1; 9:2-6.

Mfịn, Mme Ntiense Jehovah, irenowo ye iban, ke ẹnen̄ede ẹsịn idem ẹnam se Jesus eketịn̄de emi: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—Matthew 24:14.