Kpep N̄kpọ to Ukpụhọde Emi Odude ke N̄kpọ

Ndi emenịm ke Jesus edi akakan Andikpep emi akanam odude ke isọn̄? Ekeme ndidi emesidomo ndikpep mme owo n̄kpọ nte enye ekesikpepde, utọ nte ndibụp mme owo mbụme nnyụn̄ nnọ uwụtn̄kpọ. Edi ndi ama ọfiọk ke enye ama esiwụt ukpụhọde oro odude ke n̄kpọ ke ini enye ekpepde owo n̄kpọ?

Ediwak owo ẹsiwụt nte n̄kpọ kiet okpụhọrede ye en̄wen ke ini ẹnemede nneme. Afo n̄ko emekeme ndinam emi edi udiọn̄ọke. Ekeme ndidi emesidọhọ ete, “N̄kọ ẹkedọhọ ke kpukpru mfri emi ẹdat, edi mbon emi ke ẹsọsọn̄.” Mîdịghe ọdọhọ, “Eyenan̄wan oro ama esikop bụt etieti ke ini ekedide eyenọwọn̄, edi idahaemi esineme nneme ye kpukpru owo.”

Ke ini etịn̄de utọ ikọ emi, emesibem iso etịn̄ se itịbede m̀mê se mme owo ẹnamde, ndien ekem owụt ukpụhọde ke nditịn̄ utọ ikọ nte edi, nte ededi, m̀mê utu ke oro. Omonyụn̄ ekeme ndinam emi ke nditịn̄ n̄kpọ en̄wen ndian man owụt ke se etịn̄de edi akpanikọ. Ke ini etịn̄de ikọ ntem, se etịn̄de ayan̄wan̄a mme owo sia nte ẹsitịn̄de ikọ edi oro.

Idem edieke nte ẹsitịn̄de ikọ ke ndusụk usem mîsiwụtke ukpụhọde ke n̄kpọ, osụk ọfọfọn ifiọk ufọn ediwụt ukpụhọde ke n̄kpọ. Ntak-a? Sia mmọ ẹyọyọhọ Ikọ Abasi emi ẹkedade edisana spirit ẹwet. Jesus ama esiwak ndiwụt ukpụhọde ke n̄kpọ. Ndusụk mmọ ẹdi emi: “Owo isidomoke utuenikan̄ ida aban̄ ifụk, edi ẹsidori ke uwụk utuenikan̄.” “N̄kedịghe ndibabiat [Ibet], edi n̄kedi ndinam enye osu.” “Mbufo ẹma ẹkop ẹte ẹkedọhọ ẹte, ‘Kûsịn efịbe.’ Edi ndọhọ mbufo nte owo ekededi eke owụkde enyịn ese n̄wan . . . ” “Ẹkedọhọ ẹte, ‘Enyịn ke enyịn, edet ke edet.’ Edi, ndọhọ mbufo nte: Ẹkûn̄wana ye idiọkowo; edi owo ekededi ama eyịbi fi mfụk nnasia, wọn̄ọde mfụk eken n̄ko nọ enye.”—Matt. 5:15, 17, 27, 28, 38, 39.

Ẹnam ukem n̄kpọ emi n̄ko ke mme n̄wed en̄wen ke Bible. Ukpụhọde oro odude ke n̄kpọ ekeme ndinam se ẹtịn̄de an̄wan̄a nnyịn, mîdịghe anam ifiọk mfọnn̄kan usụn̄ ndinam n̄kpọ. Edieke edide ete m̀mê eka, se ukpụhọde oro ẹwụtde ke itie N̄wed Abasi emi: “Mbufo mme ete, ẹkûfiomo nditọ mbufo, edi ẹka iso ẹkama mmọ ke ntụnọ ye ke item Jehovah.” (Eph. 6:4) Okpokosụk enenen onyụn̄ esịne ifiọk edieke apostle Paul ọkpọkọdọhọde mme ete (m̀mê eka) ete ẹkama nditọ mmọ ke ntunọ Abasi. Edi enye ndikowụt ukpụhọde ke ndidọhọ, “ẹkûfiomo [mmọ], edi ẹka iso ẹkama mmọ ke ntụnọ ye ke item Jehovah,” anam ikọ esie enen̄ede an̄wan̄a.

Ekem, Paul ama ewet kpasụk ke ibuot n̄wed oro ete: “Nnyịn imenyene en̄wan ndin̄wana, idịghe ye obụk ye iyịp, edi in̄wana ye . . . ndiọi spirit ke enyọn̄.” (Eph. 6:12) Anaedi ukpụhọde oro anam fi ọfiọk ke emenyene ata akamba en̄wan. Un̄wanake ye mme ata owo, edi an̄wana ye ndiọi spirit.

KPEP N̄KPỌ TO MME UKPỤHỌDE

Kpasụk ke n̄wed Ephesus emi, afo oyokụt ediwak itien̄wed en̄wen emi Paul owụtde mme ukpụhọde. Ndikere mban̄a mme ukpụhọde emi ekeme ndinam se Paul eketịn̄de enen̄ede an̄wan̄a nnyịn onyụn̄ anam inen̄ede ifiọk se ikpanamde.

Imenịm ke ayama chart emi owụtde mme ukpụhọde emi ẹdude ke se ẹnemede ke Ephesus ibuot 4 ye 5 onyụn̄ ekpep n̄kpọ oto mme ukpụhọde oro. Ke ini okotde mme ukpụhọde emi, kere nte odude uwem. Bụp idemfo ete: ‘Ke nditịn̄ akpanikọ, nso idi edu mi? Nsinam n̄kpọ didie ke utọ idaha emi? Mme owo ẹdikere ke ewe edi edu mi?’ Ke ini anamde emi onyụn̄ okụtde ke oyom anam ukpụhọde, mbọk domo ndinam ntre. Yak ukpụhọde emi odude ke n̄kpọ an̄wam fi.

Ẹmekeme ndineme chart emi ke utuakibuot ubon mbufo. Ẹmekeme nditọn̄ọ ntem: Kpukpru owo ke ubon ẹkeme nditie kiet n̄kot chart oro. Ekem, owo kiet ke ubon okot akpa ikpehe ke chart oro, mbon eken ẹtịn̄ se idude ke udiana ikpehe. Emi ayanam mbufo ẹneme nte ẹkemede ndida udiana ikpehe emi nsịn ke edinam. Nditie ọtọkiet nneme mme ukpụhọde emi ekeme ndin̄wam kpukpru owo ke ubon ẹdomo ndidu uwem nte Christian ke ufọk ye ke ebiet en̄wen.

[Ndise ke page 6] — Ndi emeti ọyọhọ ikpehe iba ke mme ukpụhọde oro ẹdude ke itien̄wed oro?

Ama edi edifiọk ufọn mme ukpụhọde, ọyọsọsọp ọfiọk mmọ ke ini okụtde mmọ ke Bible, oyonyụn̄ okụt nte mmọ ẹnyenede ufọn ke utom ukwọrọikọ. Ke uwụtn̄kpọ, emekeme ndidọhọ enyeneufọk ete: “Ediwak owo ẹdọhọ ke ukpọn̄ isikpaha, edi kop mi se Ikọ Abasi ọdọhọde.” Mîdịghe, emekeme ndidọhọ owo emi ekpepde Bible ete: “Ata ediwak owo mi ke edem nnyịn ẹnịm ke Abasi ye Jesus ẹdi kiet; edi, nso ke Bible etịn̄ aban̄a emi? Afo ekere didie?”

Ke akpanikọ, mme ukpụhọde oro ẹdude ke n̄kpọ ẹyọyọhọ N̄wed Abasi, ndien emi ekeme ndin̄wam nnyịn isan̄a ke usụn̄ Abasi. Imonyụn̄ ikeme ndida mme ukpụhọde emi n̄n̄wam mme owo ẹfiọk Bible.

Kpep N̄kpọ to Mme Ukpụhọde Emi Ẹdude ke Se Ẹnemede ke Ephesus Ibuot 4 ye 5

Ẹneme se idude ke chart emi ke ini Utuakibuot Ubon mbufo!

“[Ẹyak] nnyịn ikûdi aba nditọwọn̄, emi kpukpru ofụm ukpepn̄kpọ ye abian̄a owo ye nsu emi ẹdade n̄kari ẹtịbi, ẹberide nte oyobio ẹnyụn̄ ẹmende ẹyo.”—4:14.

“Edi ẹyak nnyịn itịn̄ akpanikọ inyụn̄ ida ima ikọri ke kpukpru n̄kpọ ke idak enye emi edide ibuot, kpa Christ.”—4:15.

“[Mme idụt ẹdu] ke ekịm ke ekikere . . . ke ntak isọn̄esịt mmọ.”—4:18, 19.

“Edi idịghe ntre ke mbufo ẹkekpep ẹto Christ, n̄kọm mbufo ẹma ẹkop se enye eketịn̄de, ẹma ẹnyụn̄ ẹkpep n̄kpọ ẹto enye.”—4:20, 21.

“Ẹsio akani owo ẹduọk, emi ekemde ye ido uwem mbufo eke eyo oko.”—4:22.

“Edi . . . ẹkabade ẹdi obufa ke odudu oro anamde utom ke ekikere mbufo, ẹnyụn̄ ẹmen obufa owo ẹsịne.”—4:23, 24.

“Yak owo emi esiyịpde inọ okûyịp aba.”—4:28.

“Edi yak enye anam ọkpọsọn̄ utom, ada ubọk esie anam eti utom.”—4:28.

“Ẹkûyak mbumbu ikọ ọwọrọ mbufo ke inua.”4:29.

“Edi ẹtịn̄ se ededi oro ọfọnde ndida mbọp owo.”4:29.

“Ẹsion̄o kpukpru idiọk udu ye iyatesịt ye ifụtesịt ye mfiori ye ikọ isụn̄i ẹfep ke idem mbufo ọkọrọ ye kpukpru idiọkn̄kpọ.”—4:31.

“Edi ẹfọn ido ye kiet eken, ẹtua owo mbọm, ẹfen kiet eken ke ofụri esịt.”—4:32.

“Ẹkûdedei ẹtịn̄ ẹban̄a use ye orụk mbubiam ido ekededi m̀mê idiọkitọn̄ ke otu mbufo.”—5:3.

“Edi utu ke oro ẹnọ ekọm.”—5:4.

“Mbufo ẹkedi ekịm ini kiet ko.”—5:8.

“Edi idahaemi mbufo ẹdi un̄wana ke Ọbọn̄.”—5:8.

“Ẹtre ndibuana ye mmọ ke mme utom eke mîn̄wụmke mfri emi ẹnyenede ebuana ye ekịm.”—5:11.

“Edi, utu ke oro, ẹka iso ẹsua ẹnọ mmọ.”—5:11.

“Ntre ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme.”—5:15.

“Edi ẹsan̄a nte mbon ọniọn̄, ẹdedep ifet ẹnọ idem mbufo.”—5:15, 16.

“Mmọdo, ẹtre ndidi mme anana-ibuot owo.”—5:17.

“Edi ẹka iso ẹfiọk se uduak Jehovah edide.”—5:17.

“Ẹkûkpa mmịn, koro emi esidade esịm etịme etịme ido.”—5:18.

“Edi ẹka iso ẹyọhọ ye spirit.”—5:18.

“Man [Christ] akpada enye ọnọ idemesie nte esop emi ọyọhọde ye ubọn̄, mînyeneke ntọi mînyụn̄ in̄wịneke m̀mê ndinyene n̄kpọ ekededi eke etiede ntre.”—5:27.

“Edi man enye asana onyụn̄ anana ndo.”—5:27.

“Akananam baba owo kiet isuaha obụkidem esie.”—5:29.

“Edi ọbọbọk onyụn̄ ama enye, kpa nte Christ n̄ko anamde ye esop.”—5:29.