Obufa Owo Otu Ukara

Ke usenubọk Wednesday, September 5, 2012, ẹma ẹtọt ubon Bethel United States ye Canada ke ẹmek obufa owo Otu Ukara Mme Ntiense Jehovah. Mark Sanderson ọkọtọn̄ọ ndinam utom nte owo Otu Ukara ke September 1, 2012.

Ete ye eka Brọda Sanderson emi ẹdide Mme Ntiense ẹkebọk enye ke San Diego ke California ke U.S.A., ndien enye akana baptism ke February 9, 1975. Enye ọkọtọn̄ọ utom usiakusụn̄ ke September 1, 1983, ke Saskatchewan ke Canada. Ke December 1990, enye ama okụre ukpep ke ọyọhọ otu itiaba ke Ufọkn̄wed Unọ Mme Asan̄autom Ukpep (emi ẹkotde idahaemi Ufọkn̄wed Ukpep Bible Eke Nditọete Iren Emi Mîdọhọ Ndọ) ke United States. Ẹma ẹmek Brọda Sanderson akpan asiakusụn̄ ẹnyụn̄ ẹnọ enye akanam utom ke Isuo Newfoundland ke Canada ke April 1991. Ke enye ama akanam utom nte andida itie esenyịn circuit, ẹma ẹkot enye edidi owo ubon Bethel Canada ke February 1997. Ke November 2000, ẹma ẹnọ enye akanam utom ke n̄kọk itieutom United States, ndien enye akanam utom ke Itieutom Utịm Ntọt Ufọkibọk, ekem anam ke Itieutom Utịmutom.

Ke September 2008, Brọda Sanderson ama odụk Ufọkn̄wed Mbon Kọmiti N̄kọk Itieutom, ndien ekem ẹmek enye owo Kọmiti N̄kọk Itieutom Philippines. Ke September 2010, ẹma ẹkot enye afiak edi Bethel United States, ndien ẹkedọhọ enye edi andin̄wam Kọmiti Utom Otu Ukara.