Ubịnikọt Oro Ẹketịmde Ẹdiomi On̄wụm Mfri

María Isabel edi ifịk ifịk ekpri asuanetop ke San Bernardo ke idụt emi ẹkotde Chile ke Edem Usụk America. Mmọ ẹdi mbon Mapuche. Ofụri ubon mmọ ẹma ẹnen̄ede ẹsịn ifịk ẹyom ẹtọn̄ọ esop usem Mapuche, emi ẹkotde n̄ko Mapudungun.

Ke ini ẹketọtde ke ẹyetiene ẹnịm Editi n̄kpa Christ ke usem Mapudungun ye nte ke ẹma ẹmịn̄ n̄wedikot Editi 2,000 ke usem oro man ẹkpesuan, emi ama esịn María Isabel n̄kpọ ke ekikere. Enye ama ekere m̀mê nso ke ikpanam man in̄wam. Enye ama eti ifiọkutom mme uyen Ntiense emi ẹkekwọrọde ikọ uforo uforo ẹnọ nditọ ufọkn̄wed ye mme andikpep mmọ. Enye ama eneme n̄kpọ emi ye ete ye eka esie. Ndien mmọ ẹma ẹbiere ẹte María Isabel ekere nte enye aduakde ndisuan n̄wedikot oro ke ufọkn̄wed. Didie ke enye akaduak ndinam n̄kpọ emi?

Akpa, María Isabel ama eben̄e mme akamautom ufọkn̄wed ete ẹyak imọ idian n̄wedikot ke inuaotop ufọkn̄wed. Mmọ ẹma ẹnyịme ẹnyụn̄ ẹtoro enye ẹban̄a n̄kpọ emi. Ke ini ẹkekotde nditọ ufọkn̄wed enyịn̄ usenubọk kiet, etubom ama ada ukwak utịn̄ikọ ọnọ ntọt aban̄a n̄wedikot emi.

Ekem María Isabel ama eben̄e ete ẹyak imọ isan̄a ke kpukpru ubet ukpepn̄kpọ ideme n̄wedikot emi. Ke enye ama ọkọbọ unyịme oto andikpep ubet ukpepn̄kpọ kiet kiet, enye ama obụp nditọ ufọkn̄wed ke kpukpru ubet ukpepn̄kpọ m̀mê odu nditọ ufọkn̄wed emi ẹdide mbon Mapuche. Enye ọdọhọ ete, “N̄kekere ke n̄kpọ nte mbon Mapuche 10 m̀mê 15 ẹdidu ke ofụri ufọkn̄wed nnyịn, edi ẹma ẹnen̄ede ẹwak ẹkan oro—ke akpatre n̄kọnọ n̄wedikot 150!

“ENYE EKEKERE KE EDIDI AKWA OWO”

N̄wan kiet emi okokụtde n̄wedikot oro ke inuaotop ufọkn̄wed nnyịn ama obụp m̀mê anie ke imọ idibụp n̄kpọ iban̄a edinam oro. Kere nte idem akakpade enye ke ini ẹkedade enye ẹkewụt eyenan̄wan isua duop! María Isabel etịn̄ ye inua imam ete, “Enye ekekere ke edidi akwa owo.” Ke ama ọkọnọ mma oro n̄wedikot onyụn̄ etịn̄ se aban̄ade ọnọ enye ibio ibio, María Isabel ama obụp mma oro ebiet emi enye odụn̄de man enye ye ete ye eka esie ẹkpeka ẹketịn̄ n̄kpọ efen ẹnọ enye ẹban̄a Obio Ubọn̄ Abasi. Esịt akadat asuanetop 20 oro ẹnamde utom ke efakutom usem Mapudungun didie ntem ndikụt mma oro ye mbon Mapuche 26 en̄wen ẹdụkde Editi! Ekpri otu oro edidi akamba esop idahaemi!

Inamke n̄kpọ m̀mê edi isua ifan̄, afo n̄ko emekeme ndika ke idemfo n̄kokot nditọ ufọkn̄wed mbufo m̀mê mbon itieutom mbufo ẹdidụk Editi, utịn̄ikọ an̄wa, m̀mê mbono district. Nam ndụn̄ọde ke n̄wed nnyịn man okụt mme ifiọkutom oro ẹkemede ndiwụt fi nte akpanamde emi uforo uforo. N̄ko-n̄ko, bọn̄ akam nọ Jehovah ben̄e edisana spirit man an̄wam fi enyene uko nditịn̄ ikọ nnọ mme owo mban̄a enye. (Luke 11:13) Edieke anamde ntre, afo n̄ko emekeme ndinyene mme ifiọkutom oro mûkorike enyịn, ndien oyonyụn̄ ọbọ utịp utom emi eketịmde odiomi.