MME MBỤME BIBLE ORO ẸBỌRỌDE

Nso ikeme ndinam ndọ enem?

Ndinam se Bible ọdọhọde ekeme ndinam ndọ enem sia Jehovah Abasi emi edide Andinyene Bible ọkọtọn̄ọ ndọ. Bible ekpep nnyịn ndidu uwem emi ekemede ndinam ndọ enem owo onyụn̄ ọdọhọ itre n̄kpọ emi ekemede ndibiat ndọ. Bible n̄ko etịn̄ nte ebe ye n̄wan ẹkpesinemede nneme man ndọ mmọ enem.—Kot Colossae 3:8-10, 12-14.

Ebe ekpenyene ndikpono n̄wan esie, n̄wan onyụn̄ okpono ebe. Ke ini mmọ mbiba ẹnamde se Abasi ọdọhọde, ndọ mmọ eyenem.—Kot Colossae 3:18, 19.

Nso ikeme ndinam ndọ ebịghi?

Ebe ye n̄wan idikpọn̄ke kiet eken tutu amama edieke mmọ ẹnen̄erede ẹma kiet eken. Abasi ekpep nnyịn nte ikpamade ima. Enye ye Jesus Eyen esie ẹnen̄ede ẹwụt nnyịn nte ikpamade ima.—Kot 1 John 4:7, 8, 19.

Ebe ye n̄wan emi ẹdiọn̄ọde ke Abasi ọkọtọn̄ọ ndọ idikpọn̄ke kiet eken tutu amama. Nte Abasi okoyomde ndọ etie edi oro. Ndọ ekeme ndibịghi ke nsinsi sia Abasi okobot erenowo ọnọ n̄wan, obot n̄wan ọnọ erenowo. Enye n̄ko okobot mmọ ke mbiet esiemmọ, onyụn̄ anam mmọ ẹkeme ndima kiet eken kpa nte imọ imade mmọ.—Kot Genesis 1:27; 2:18, 24.