“Ẹtịm Ẹkụt Mme Edu Esie Oro Enyịn Mîkwe”

Ndi afo emenịm ke Abasi do? Edieke enịmde, ndi emekeme nditịn̄ se inamde fi enịm? Nnyịn imokụt ekese n̄kpọ ke ererimbot emi ẹwụtde ke Abasi do. Mme n̄kpọ emi ẹwụt n̄ko ke enye enen̄ede enyene odudu, enyene ima, onyụn̄ enyene ọniọn̄. Nso iwụt emi, ndien didie ke mmọ ẹtụk nnyịn? Leta emi apostle Paul ekewetde ọnọ mme Christian ke Rome ọbọrọ mbụme emi.

Paul ọkọdọhọ ete: “Tọn̄ọ nte ẹkebot ererimbot, ẹtịm ẹkụt mme edu [Abasi] oro enyịn mîkwe, oro edi, nsinsi odudu esie ye idaha esie nte Abasi, koro ẹkụt mmọ ebe ke mme n̄kpọ oro enye anamde, mbak mmọ ẹdinyene n̄kpọ nditịn̄ nnyan̄a idem.” (Rome 1:20) Ikọ Paul owụt ke Abasi ada se enye obotde owụt utọ owo emi imọ idide. Yak itịm ise ikọ Paul emi ise.

Paul ọdọhọ ke ẹtịm ẹkụt mme edu Abasi “tọn̄ọ ẹkebot ererimbot.” Idịghe isọn̄ ke Paul eketịn̄ aban̄a ke itie emi, edi eketịn̄ aban̄a mme owo.a Ntre ikọ esie ọwọrọ ke tọn̄ọ ẹkebot owo, ke se Abasi obotde anam ẹkụt utọ owo emi enye edide.

Ọtọn̄ọde ke ata n̄kpri n̄kpọ emi Abasi okobotde tutu esịm akaka ekondo emi—kpukpru ẹwụt ke Abasi do, ẹnyụn̄ ẹwụt utọ owo emi enye edide. Idụhe owo emi mîkwe. Ndi ata ndiye n̄kpọ emi Abasi obotde iwụtke ke enye enyene ọniọn̄? Ndi akaka ikpaenyọn̄ emi ọyọhọde ye ntantaọfiọn̄ ye inyan̄ibom iwụtke ke Abasi enyene odudu? Ndi nsio nsio orụk udia emi ẹyọhọde ererimbot ye ndiye n̄kpọ eken nte mme frawa, ọfiọn̄ ye mme ntantaọfiọn̄ iwụtke ke Abasi emi okobotde mme n̄kpọ emi ama nnyịn?—Psalm 104:24; Isaiah 40:26.

Ndi odu eke mîkemeke ndikụt kpukpru se Abasi obotde emi? Edieke owo ọdọhọde ke imọ inịmke ke Abasi do sia imọ mîkwe n̄kpọ ndomokiet emi owụtde ke enye do, ọwọrọ enye inyụn̄ iyomke ndikụt. Utọ owo emi inyeneke “n̄kpọ nditịn̄ nnyan̄a idem.” Ataifiọk kiet ọdọhọ ke utọ owo oro onyụn̄ etie nte awat o-moto emi awatde akatuak ada ke ebiet emi ẹwụkde akamba idiọn̄ọ ẹte owo okûtuak uda. Edieke bodisi omụmde enye, ndi enye eyekeme ndidọhọ ke imọ ikekwe idiọn̄ọ oro ke ini mînyeneke se inamde enye enyịn? Bodisi idibọrọke enye sia idiọn̄ọ oro okpon ekem se nnan okpokụtde. Ke adianade do, akpana kpukpru mme awat uwat ẹsise usụn̄ ẹnyụn̄ ẹkop item. Ntre n̄ko ke edi ye se Abasi obotde. Kpukpru se enye obotde ẹwụt ke enye do, ndien idụhe adia udia owo ndomokiet emi ekemede ndidọhọ ke imọ ikwe. Ntre, idụhe se owo ndomokiet ekemede nditịn̄ nnyan̄a idem.

Kpukpru se Abasi obotde ẹnam nnyịn ifiọk utọ owo emi enye edide. Edi odu n̄kpọ en̄wen emi akam anamde nnyịn inen̄ede ifiọk Abasi—oro edi, Bible. Bible anam nnyịn ifiọk se Abasi aduakde ndinam ke isọn̄ emi ye utọ uwem emi enye oyomde nnyịn idu. Ndifiọk emi ayanam nnyịn inen̄ede isan̄a ikpere Abasi emi se enye obotde anamde nnyịn ‘itịm ikụt mme edu esie oro enyịn mîkwe.’