Mme Mbụme Bible Oro Ẹbọrọde

Ndi Abasi esikop kpukpru akam?

Abasi esikop akam mme owo ke kpukpru idụt. (Psalm 145:18, 19) Bible ọdọhọ itịn̄ se ededi oro iyomde inọ enye ke akam. (Philippi 4:6, 7) Edi odu ndusụk akam emi mîsinemke Abasi esịt. Ke uwụtn̄kpọ, Abasi isimaha akam emi owo okomụmde-mụm ọdọn̄ ke ibuot.—Kot Matthew 6:7.

Jehovah isikopke akam mbon oro mîkopke item esie. (Mme N̄ke 28:9) Ke eyo Bible, Abasi ikokopke akam nditọ Israel emi ẹkewotde owo. Emi owụt ke enyene se ikpanamde man Abasi okop akam nnyịn.—Kot Isaiah 1:15.

Nso ke ikpanam man Abasi okop akam nnyịn?

Ana inyene mbuọtidem ke Abasi mbemiso enye okop akam nnyịn. (James 1:5, 6) Ana inịm ke Abasi do ye nte ke enye ama nnyịn. Se idinamde inen̄ede inyene mbuọtidem edi ndikpep Bible, sia mme un̄wọn̄ọ akpanikọ oro ẹdude ke Bible ẹnam owo enyene mbuọtidem.—Kot Mme Hebrew 11:1, 6.

Nnyịn inyene ndibọn̄ akam ke ofụri esịt nnyụn̄ nsụhọde idem. Idem Jesus Eyen Abasi ama osụhọde idem ke ini enye ọkọbọn̄de akam. (Luke 22:41, 42) Ntre, utu ke nditeme Abasi se enye akpanamde, nnyịn ikpakam isụhọde idem ikpep Bible man ifiọk se enye oyomde nnyịn inam. Ima inam oro, nnyịn iyekeme ndibọn̄ akam nte ekemde ye uduak esie.—Kot 1 John 5:14.