IBUOTIKỌ IKPAEDEM | NSU ORO MÎYAKKE NDUSỤK OWO ẸMA ABASI
Ntak Ọsọn̄de Ndusụk Owo Ndima Abasi
“‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ.”—Jesus Christ eketịn̄ ikọ emi ke ọyọhọ isua 33.a
Ọsọsọn̄ ndusụk owo ndima Abasi sia mmọ ẹkere ke Abasi edifọp ndiọi owo ke ikan̄. Mmọ n̄ko ẹkere ke usụn̄ esie in̄wan̄ake owo, ntre ke tutu amama mmimọ idikemeke ndisan̄a n̄kpere enye. Kop se ndusụk mmọ ẹtịn̄de mi:
“Mma nsibọn̄ akam nte Abasi an̄wam mi, edi okosụk etie mi nte n̄kemeke ndisan̄a n̄kpere enye. Abasi eketie mi nte n̄kpọ emi ẹkerede-kere, emi n̄kpọ mîsitụkke.”—Marco ke Italy.
“Ama enen̄ede ọdọn̄ mi ndinam n̄kpọ Abasi, edi eketie nte n̄kemeke ndisan̄a n̄kpere enye. N̄kekere ke Abasi ọsọn̄ ido akaha; inamke n̄kpọ en̄wen ikan ndimia owo ufen. N̄kekere ke enye isituaha owo mbọm.”—Rosa ke Guatemala.
“Ke ini eyenọwọn̄, n̄kesikere ke Abasi etetie ebet nnyịn inam idiọkn̄kpọ man amia nnyịn ufen. Ke mma n̄kamana n̄kpon, n̄kekere ke enye idọn̄ke enyịn ke se itịbede inọ nnyịn. N̄kada Abasi nte adaibuot ukara emi mîdọn̄ke enyịn m̀mê n̄kpọ etie didie ye mbon emi enye akarade.”—Raymonde ke Canada.
Afo ada Abasi didie? Ndi emekere ke owo ekeme ndima enye? Ebịghi mme Christian ẹketọn̄ọ ẹbụp mbụme emi. Ke ata eset ko, ediwak mme aka ufọkabasi ikesibọn̄ke akam inọ Abasi. Ntak-a? Mmọ ẹkesifefehe enye. Ewetmbụk oro ekerede Will Durant ọkọdọhọ ete: “Anamidiọk akpasasan̄a didie ọbọn̄ akam ọnọ Abasi emi mîsituaha owo mbọm mînyụn̄ iyomke owo asan̄a ekpere imọ?”
Nso inam mme owo ẹkere ke Abasi ‘isituaha owo mbọm inyụn̄ iyomke ẹsan̄a ẹkpere imọ’? Nso ke Bible ekpep aban̄a Abasi? Edieke ọdiọn̄ọde utọ owo emi Abasi edide, udutreke-tre ndima enye.