Se Mme Owo Ẹkerede Ẹban̄a Heaven

Ediwak owo ẹdọhọ ke nnyịn ikemeke ndidiọn̄ọ nte heaven etiede sia idụhe owo emi otode do editịn̄ nte heaven etiede ọnọ nnyịn. Edi se mmọ ẹtịn̄de emi inenke. Jesus Christ ama odu ke heaven mbemiso enye edide isọn̄ emi. Enye ọkọdọhọ mme adaiso ido ukpono mme Jew ke eyo esie ete: “N̄koto heaven nsụhọde ndi, idịghe man ndinam uduak idemmi, edi man ndinam uduak enye emi ọkọdọn̄de mi.” Ke ini Jesus ọkọdọhọde mme apostle esie ete “ke ufọk Ete mi ediwak ebietidụn̄ ẹdu,” enye eketịn̄ se enye okokụtde ke heaven.—John 6:38; 14:2.

Abasi emi ekerede Jehovah edi Ete Jesus, ndien “ufọk” esie odu ke heaven. (Psalm 83:18) Ntre idụhe owo ndomokiet emi ekemede nditịn̄ nte heaven etiede n̄kan Jehovah Abasi ye Jesus Christ. Mmọ ẹma ẹnam mme owo ẹdiọn̄ọ ediwak n̄kpọ ẹban̄a heaven ke n̄kukụt emi ẹkewụtde mmọ.

Ibuotikọ oro etienede eneme mme itie Bible emi ẹtịn̄de se mme owo ẹkekụtde ke n̄kukụt ẹban̄a heaven. Nte osụk okotde se Bible etịn̄de aban̄a mme n̄kukụt emi, ti ete ke idụhe n̄kpọ emi owo ekemede nditụk m̀mê ndida ata enyịn n̄kụt ke heaven. Utu ke Abasi nditịn̄ n̄kpọ mban̄a heaven ke usụn̄ emi edin̄wan̄ade mme angel kpọt, enye ama anam mme asan̄autom esie ẹkụt n̄kukụt emi owụtde nte heaven etiede ẹnyụn̄ ẹwet n̄kukụt emi ke usụn̄ emi edin̄wan̄ade nnyịn mme owo. Mme n̄kukụt emi ayanam ọdiọn̄ọ mbon emi ẹdude ke “ediwak ebietidụn̄” oro odude ke heaven.