Mma Nsisịn Jehovah ke Kpukpru Se Mmekde Ndinam

N̄kamana ke May 19, 1940, ke obio Amioûn ke Lebanon. Ke isua ifan̄ ama ekebe, ima iwọrọ ikodụn̄ ke Tripoli. Ima ama odu ke ubon nnyịn, ubon nnyịn ama onyụn̄ enem, ndien ima ima Jehovah Abasi. Ikedi nditọ ition; iban ita, irenowo iba. Ami n̄kedi ekperedem. Idịghe ndin̄wana okụk ekedi ata akpan n̄kpọ ọnọ ete ye eka mi. Ndikpep Bible, ndụk mbono esop, nnyụn̄ n̄n̄wam mme owo ẹdiọn̄ọ Abasi ekedi ata akpan n̄kpọ ọnọ nnyịn.

Ndusụk nditọete ke esop nnyịn ẹkedi mbon emi ẹyetde aran. Owo mmọ kiet ekedi Michel Aboud emi ekesinịmde Ukpepn̄kpọ N̄wed Esop. Enye ekekpep akpanikọ ke New York, onyụn̄ emen edikwọrọ ke Lebanon ọtọn̄ọde ke 1921. Mmenen̄ede nti nte enye akanamde n̄kpọ ukpono ukpono ye nditọete iban iba emi ẹkekụrede Ufọkn̄wed Gilead, onyụn̄ an̄wamde mmọ. Nditọete oro ẹkekere Anne ye Gwen Beavor. Mmọ ẹma ẹdidi ata nti ufan nnyịn. Ke ediwak isua ama ekebe, ama enem mi tutu ndifiak n̄kụt Anne ke United States. Aka ko, mma n̄kụt Gwen n̄ko. Enye ama ọdọ Wilfred Gooch, mmọ mbiba ẹkedu ke Bethel ke London ke England.

NTE UKWỌRỌIKỌ EKETIEDE KE LEBANON

Mme Ntiense Jehovah ikawakke ke Lebanon ini n̄kedide uyen. Edi ima isisịn ifịk ikwọrọ se idiọn̄ọde ke Bible inọ mme owo kpa ye emi ndusụk mme adaiso ido ukpono ẹkekọbọde nnyịn. Ke nteti ndusụk se iketịbede.

Usen kiet, ami ye Sana eyeneka emi an̄wan ikọkwọrọ ikọ ke ufọkenyọn̄. Itise, oku ufọkabasi kiet ama ọbiọn̄ọde. Etie nte owo okokot enye edi. Enye ama ọtọn̄ọ ndisọn̄ọ eyeneka mi enyịn, ekem ọtọn̄ọ ntịme, onụk enye enye ọduọ ewere ke itie emi ẹsisan̄ade ẹdọk ufọkenyọn̄ oro ada unan. Owo ama okot mme bodisi, ndien mmọ ẹma ẹdinam yak ẹsọbọ Sana idem. Mmọ ẹma ẹmụm oku ufọkabasi oro ẹka itieutom mmọ. Do ke ẹkekekụt ke enye akasan̄a ye ikan̄. Akamba owo bodisi ama obụp enye ete: “Afo ededi nso n̄kpọ? Ndi edi adaiso ido ukpono m̀mê edi adaiso n̄ka ntịme?”

N̄kpọ en̄wen emi nnen̄erede nti edi se iketịbede usen emi esop nnyịn ẹmende bọs ke ukpeokụk yak ika ndikwọrọ ikọ ke obio kiet emi mîkekpereke akwa obio emi ikodụn̄de. Ukwọrọikọ ama enem do etieti. Edi n̄kpọ ama ọwọn̄ọde obono ini oku ufọkabasi ke obio oro okokopde ke nnyịn ke ikwọrọ ikọ. Enye ama ada ediwak owo adian idem, mmọ ẹditọn̄ọ ntịme ye nnyịn, ẹtọn̄ọ nnyịn ke itiat, ẹnyụn̄ ẹnọ ete mi unan ke ibuot. Ke nteti nte iyịp ọkọyọhọde ete mi iso. Eka mi ama asan̄a ye enye aka itie moto, nnyịn eken iyịre udịm itiene, idem ke enyek nnyịn. Edi ndifreke se eka mi eketịn̄de ini enye osụk ọkwọhọrede ete mi iyịp ke iso. Enye ọkọdọhọ ete: “Jehovah, mbọk fen nọ mmọ. Koro mmọ idiọn̄ọke se mmọ ẹnamde.”

N̄kpọ en̄wen emi nsụk ntide tutu emi edi se iketịbede ini ikade ndise mbon nnyịn ke obio nnyịn. Ima ikụt ọwọrọetop a-bishop kiet ke ufọk ete ete mi. Bishop oro ama ọdiọn̄ọ ke ete ye eka emi ẹdi Mme Ntiense Jehovah. Kpa ye emi n̄kedide isua itiokiet kpọt, enye ama obụp mi m̀mê nso inam mmennaha baptism. Enye okobụp mi mbụme oro man esuene mi. Mma ndọhọ enye ke nsụk ndi eyenọwọn̄, n̄ko ke ana nnen̄ede n̄kpep Bible nnyụn̄ nnen̄ede mbuọt idem ye Abasi mbemiso nnade baptism. Se n̄kọbọrọde oro ama ayat enye, enye onyụn̄ ọdọhọ ete ete mi ke mmọsọn̄ọ imọ enyịn.

Mme n̄kpọ ntem ikesiwakke nditịbe. Ediwak mbon Lebanon idịghe mbon mfịna, ẹsinyụn̄ ẹma isenowo. Ntre ima isikwọrọ ikọ inọ ediwak owo inyụn̄ ikpep mmọ Bible.

IMA IWỌRỌ IKA IDỤT EN̄WEN

Ini nsụk ndude ke ufọkn̄wed, brọda kiet ama oto Venezuela edi Lebanon. Enye ama edidụk mbono esop ke esop nnyịn onyụn̄ ọtọn̄ọ ufan ye Wafa eyeneka mi. Nte ini akade, mmọ ẹma ẹnam ndọ ẹnyụn̄ ẹwọrọ ẹkedụn̄ ke Venezuela. Wafa ama esiwet leta ọdọhọ ete mi yak anam nnyịn iwọrọ ididụn̄ ke Venezuela sia itọn̄ nnyịn ama ọdọn̄ enye etieti. Aka ko, ima iwọrọ ikodụn̄ do!

Ini ikesịmde Venezuela ke 1953, ikodụn̄ ke Caracas, ke n̄kpere ufọk adaibuot ukara idụt oro. Sia n̄kosụk ndide eyenọwọn̄, ama esinem mi tutu ndikụt ẹwatde adaibuot ukara ẹbe. Edi ikememke inọ ete ye eka mi ndidụn̄ ke obufa idụt oro, sia usem, nte ẹsinamde n̄kpọ, udia, ye nte eyo n̄kan̄ oro etiede ama okpụhọde ye eke n̄kan̄ nnyịn. Ekedi uwem n̄kan̄ oro ọtọn̄ọ ndimehe mmọ, n̄kpọ mmọn̄eyet etịbe.

N̄KPỌ MMỌN̄EYET ETỊBE

Idem ama ọtọn̄ọ nditie ete mi udọn̄ọ udọn̄ọ. Idem ama akpa nnyịn sia ete mi ama okop idem etieti. Nnyịn itịghi nte enye ọkọdọn̄ọde akananam. Edi ke mme dọkta ẹma ẹkese enye idem, ẹma ẹdọhọ ke enye enyene kansa, ẹnyụn̄ ẹsiak enye idem. Edi enye ama akpa ke urua kiet ebede.

Ọsọsọn̄ nditịn̄ nte n̄kpa esie akafịnade nnyịn eketre. N̄kedi isua 13 kpọt. N̄kpa ete mi ekemen nnyịn ke unana idotenyịn, nnyịn ikonyụn̄ ikereke ke esịt ayafiak enem nnyịn aba. Ama ada ini mbemiso edin̄wan̄a eka mi ke ebe imọ idụhe aba. Edi, ima idikụt ke ufọn idụhe nditie mfịna idem, Jehovah ama onyụn̄ an̄wam nnyịn iyọ. N̄kokụre ufọkn̄wed sekọndri ke Caracas ini ndide isua 16. Ama enen̄ede ọdọn̄ mi ndin̄wam ubon nnyịn.

Ini oro ke Sana eyeneka mi ọkọdọ Rubén Araujo. Ekedi Rubén okụre Ufọkn̄wed Gilead, enye afiak ọnyọn̄ edi Venezuela. Edi mmọ ẹma ẹwọrọ ẹkedụn̄ ke New York. Ini ubon nnyịn ẹkedọhọde n̄ka ufọkn̄wed ntaifiọk, ẹkedọhọ n̄kodụn̄ ye mmọ n̄ka. Eyeneka mi ye ebe esie ẹma ẹnen̄ede ẹn̄wam mi n̄kpere Jehovah ini n̄kodụn̄de ye mmọ. Ediwak nditọete emi ẹsọn̄de idem ke esop ẹma ẹdu n̄ko ke esop nnyịn. Ama enem mi ndidian idem ye owo iba ke otu mmọ, Milton Henschel ye Frederick Franz emi ẹkedude ke Bethel ke Brooklyn.

Ini n̄wed okoyomde nditre akpa isua emi ndude ke ufọkn̄wed ntaifiọk, mma ntọn̄ọ ndikere m̀mê nnennen n̄kpọ ke nnam emi ke uwem mi. Mma n̄kot nsio nsio ibuotikọ ke Enyọn̄-Ukpeme emi aban̄ade nditọete emi ẹkemekde ndinam n̄kpọ Jehovah, nnyụn̄ nnen̄ede n̄kere mban̄a se n̄kotde oro. Mma n̄kụt nte esịt ekenemde mme asiakusụn̄ ofụri ini ye mbon Bethel emi ẹkedude ke esop nnyịn, ama ọdọn̄ mi nditie nte mmọ. Edi n̄kanaha baptism kan̄a. Mma ndiọn̄ọ ke ana nyak idemmi nnọ Jehovah. Mma nnam ntre, ekem nna baptism ke 1957 ke March 30.

MME AKPAN N̄KPỌ EMI N̄KEMEKDE

Ke mma n̄kana baptism, mma ntọn̄ọ ndikere nte n̄kpedide asiakusụn̄. Ama enen̄ede ọdọn̄ mi ndidi asiakusụn̄, edi mma n̄kụt ke idimemke. Mma n̄kere m̀mê ndinam didie ndi asiakusụn̄ mfiak n̄ka ufọkn̄wed. Mma n̄wet ediwak leta ndọhọ eka mi ye nditọeka mi ke mmọn̄ n̄kpọn̄ ufọkn̄wed mfiak nnyọn̄ Venezuela n̄kedi asiakusụn̄, mmọ ẹma ẹnyụn̄ ẹwet mi.

Mma mfiak nnyọn̄ Caracas ke June 1957. Edi, mma n̄kokụt ke n̄kpọ ọsọn̄ ye ubon nnyịn. Akana owo efen anam utom man etiene ese aban̄a mmọ. Mma n̄kere nte ndisan̄ade n̄n̄wam. Ẹma ẹnọ mi utom ke ban̄k, edi ama enen̄ede ọdọn̄ mi ndidi asiakusụn̄. Idem n̄kpọ, n̄kọ oro akanam mfiak nnyọn̄ Caracas. Mma mbiere ke mmọn̄ nnam mbiba. Ke ediwak isua, ekedi nnam utom ban̄k, nnam utom usiakusụn̄. Idụhe ini emi n̄kpọ akawakde mi ke ubọk ntre, inyụn̄ idụhe ini emi esịt ekenemde mi ntre!

N̄kpọ en̄wen emi ekenen̄erede anam esịt enem mi ekedi ini ndọde ediye n̄kaiferi kiet emi ekerede Sylvia. Sylvia okoto Germany, ama onyụn̄ ama Jehovah etieti. Ubon mmọ ẹma ẹwọrọ ẹdidụn̄ ke Venezuela. Ekem ko, ima inyene akpan nnyịn, Michel (emi isikotde n̄ko Mike), ye adiaha nnyịn, Samira. Mma ntọn̄ọ ndise mban̄a eka mi, enye ama ọwọrọ edidụn̄ ye nnyịn. Mma ntre utom usiakusụn̄ man n̄keme ndise mban̄a ubon mi. Kpa ye oro, n̄kosụk nsesịn idem n̄kwọrọ ikọ nte asiakusụn̄. Ke ini nduọkodudu, ami ye Sylvia ima isinam utom usiakusụn̄ unọ un̄wam ini ekededi emi ikekemede.

AKPAN N̄KPỌ EN̄WEN EMI N̄KEMEKDE

Se n̄ketịn̄de ke ntọn̄ọ mbụk emi eketịbe ini nditọ mi ẹsụk ẹdude ke ufọkn̄wed. Okụk ikedịghe mfịna mi, mbon en̄wen emi ẹnamde utom ke ban̄k ẹkenyụn̄ ẹkpokpono mi. Kpa ye oro, n̄kenen̄ede nyom ẹdiọn̄ọ mi nte asan̄autom Jehovah. Mma n̄kere tutu se n̄kpanamde man mme owo ẹda mi ntre. Ntre ami ye n̄wan mi ima itịm itie ise okụk emi inyenede ye mme n̄kpọ emi inyenede ndinam. Mma n̄kụt n̄ko ke edieke n̄kpọn̄de utom ban̄k, ke okụk ukpọn̄ utom emi ẹdikpede mi ayawak etieti. Sia nnyịn mîkakamake isọn, ima ikụt ke edieke ision̄ode ubọk ikpọn̄ ndusụk n̄kpọ, ke nnyịn idinyeneke mfịna okụk ke anyan ini.

Ikememke ndinam se ntịn̄de emi-o, edi edima an̄wan mi ye eka mi ẹma ẹnen̄ede ẹbere ye ami. Ọwọrọ mmọn̄ mfiak ntọn̄ọ utom usiakusụn̄. Ẹkpesiak mi esịt, ẹkpekesio ndom! Eketie nte inyeneke se idikpande mi. Edi ẹtise, ima ibọ etop emi akakpade nnyịn idem.

N̄KPỌ EMI AKAKPADE NNYỊN IDEM ONYỤN̄ ENEMDE NNYỊN!

Usen kiet, dọkta nnyịn ama ọdọhọ ke Sylvia oyomo. Idem ama akpa nnyịn! Ekedi n̄kpọ idatesịt; edi mma n̄kere m̀mê ndinam didie ye usiakusụn̄ emi n̄kaduakde ndifiak ntọn̄ọ. Ndi nyosụk n̄keme? Ima itọn̄ọ ndiben̄e idem mbet obufa eyen nnyịn. Edi n̄kosụk n̄kekere m̀mê nyekeme ndifiak ntọn̄ọ usiakusụn̄.

Ke ima iketie ineme kpukpru n̄kpọ ise, ima ibiere yak nsụk nnam usiakusụn̄. Ke April 1985, Gabriel ama amana. Edi mma nsụk n̄kpọn̄ utom ban̄k nnyụn̄ ntọn̄ọ utom usiakusụn̄ ke June 1985. Nte ini akade, ẹma ẹmek mi ẹsịn ke Kọmiti N̄kọk Itieutom. Edi n̄kọk itieutom ikodụhe ke Caracas. Ntre akana nsitoto n̄ka do usen iba m̀mê ita ke urua. To ke Caracas sịm itie emi n̄kọk itieutom adade ekedi n̄kpọ nte itiat 50.

IMA IWỌRỌ IKA LA VICTORIA

N̄kọk itieutom okodu ke La Victoria, ntre ima ibiere ndiwọrọ n̄ka do man ikodụn̄ ikpere Bethel. Oro ama okpụhọde n̄kpọ ọnọ kpukpru nnyịn. Mmama ubon mi etieti nnyụn̄ nnen̄ede n̄kọm mmọ nte mmọ ẹkeberede ye ami. Se mmọ ẹkenamde oro ama enen̄ede an̄wam mi. Baha eyeneka mi ama enyịme ndise mban̄a eka mi. Mike ama ọdọ n̄wan, edi Samira ye Gabriel ẹkesụk ẹdodụn̄ ye nnyịn. Ndikokodụn̄ ke La Victoria ọkọwọrọ ke mmọ ẹyekpọn̄ mme ufan mmọ ke Caracas. Okonyụn̄ ana edima an̄wan mi emi ama ekemehe ndidụn̄ ke akwa obio ekekpep ndidụn̄ ke ekpri obio. Akana kpukpru nnyịn ikpekpep n̄ko ndidụn̄ ke ekpri ufọk. Ndiwọrọ n̄ka La Victoria ikememke.

Edi n̄kpọ ama afiak okpụhọde. Gabriel ama ọdọ n̄wan, Samira ama onyụn̄ ọwọrọ okodụn̄ ke idemesie. Ẹma ẹkot ami ye Sylvia ika Bethel ke 2007. Do ke isụk idu tutu emi. Mike akpan nnyịn edi ebiowo, enye ye Monica an̄wan esie ẹnyụn̄ ẹdi mme asiakusụn̄. Gabriel edi ebiowo n̄ko, enye ye Ambra an̄wan esie ẹdụn̄ ke Italy. Samira edi asiakusụn̄ ofụri ini, esinyụn̄ etie ke ufọk an̄wam anam utom Bethel.

N̄KPOSỤK MMEK SE NNAMDE EMI

Mmokpụhọde ediwak n̄kpọ ke uwem mi, edi ntuaha n̄kpọfiọk. Ẹkpedọhọ mfiak mmek se ndinamde, mme n̄kpọ emi n̄kemekde ke n̄kposụk mmek. Mmenen̄ede n̄kọm Jehovah ke kpukpru se n̄kemede ndinam nnọ enye. Mmedikụt ke edi ata akpan n̄kpọ nnyịn ndinam mme n̄kpọ emi ẹdiyakde nnyịn inen̄ede ikpere Jehovah. Inamke n̄kpọ m̀mê mme n̄kpọ emi anade ikpụhọde ke uwem nnyịn ẹdi n̄kpri n̄kpri m̀mê ikpọ ikpọ, Jehovah ekeme ndinọ nnyịn emem emi “akande kpukpru ekikere.” (Phil. 4:6, 7) Utom Bethel enem ami ye Sylvia etieti, imonyụn̄ ikụt ke Jehovah ọdiọn̄ se ikemekde ndinam sia ima isisịn Jehovah ke kpukpru se ikemekde.