N̄KPARAWA OWO ẸBỤP
Didie ke N̄kpada Ini Mi Nnam N̄kpọ?
Ntak emi akpanade ọdiọn̄ọ nte adade ini fo anam n̄kpọ?
Ini etie nte okụk. Akpatahade ini, ama oyom ini se adade anam n̄kpọ, udûkwe. Edi akpabat ibuot nte adade ini fo anam n̄kpọ, eyenyene ini ada anam mme n̄kpọ emi ẹsinemde fi!
Se Bible etịn̄de: “Itọn̄ ọdọn̄ owo ifu, ukpọn̄ esie inyeneke n̄kpọ ndomokiet. Edi ukpọn̄ mbon nsịnifịk eyesehe.”—Mme N̄ke 13:4.
Ikọ item: Ama ọdiọn̄ọ nte adade ini fo anam n̄kpọ, eyenyene ini anam ediwak n̄kpọ, udûyomke-yom ini se ada anam n̄kpọ.
Afo ndidiọn̄ọ nte adade ini fo anam n̄kpọ ayan̄wam fi etieti ama okpon owo. Akam ekeme ndinam utom ọsọn̄ọ esịne fi ke ubọk mîdịghe anam ẹsio fi ke utom. Kere ise, ekpedi afo ekenyene owo utom emi esiwakde ndidi utom ke idiọk ini, ndi akpayak enye aka iso anam utom?
Se Bible etịn̄de: “Owo eke anamde akpanikọ ke ata ekpri n̄kpọ anam akpanikọ n̄ko ke akamba n̄kpọ.”—Luke 16:10.
Ikọ item: Nte afo adade ini fo anam n̄kpọ owụt utọ owo emi afo edide.
Edi imọdiọn̄ọ ke isimemke ndida ini nnam n̄kpọ ọfọn kpukpru ini. Se n̄kpọ ifan̄ emi ẹsidide mfịna mi.
Akpa Mfịna: Mme ufan
“Mme ufan mi ẹkpedọhọ nsan̄a ye mmọ n̄wọrọ, nsiwakke ndidọhọ ke ndikemeke, ọkpọkọm nnen̄ekede nnyene ini. Nsikere ke mma nnyọn̄ ndi ke nyekeme ndisọsọp n̄kụre utom emi n̄kayakde nnịm. Edi esitọ mi ndusụk ini, n̄kpọ esinyụn̄ enen̄ede ọbọhọ mi abiara.”—Cynthia.
Ọyọhọ Mfịna Iba: Mme n̄kpọ emi ẹsidiade ini
“TV edi ata n̄kpọ idomo. Esisọn̄ ndidaha n̄kpọn̄ ndusụk edinam TV ye fim.”—Ivy.
“Mmekeme ndibiat ediwak hour n̄wụhọ ke tablet mi. N̄kukụre ini emi ndisiode enyịn mfep edi batri ama akpa. Oro esinam esịt amia mi ufen.”—Marie.
Ọyọhọ Mfịna Ita: Ndisịk n̄kpọ nnịm
“Mmesisịk utom ufọkn̄wed ye mme n̄kpọ en̄wen emi anade nnam nnịm. Mmesibiat ini nnam ndisịme ndisịme n̄kpọ tutu esịm ini emi edide mmennamke n̄kpọ oro, n̄kpọ ọmọn̄ abiara. Ata idiọk uwem edi oro.”—Beth.
Ama ọdiọn̄ọ nte adade ini fo anam n̄kpọ, eyenyene ini anam ediwak n̄kpọ, udûyomke-yom ini se adade anam n̄kpọ
Se afo ekemede ndinam
Wet mme n̄kpọ emi anade anam. Ndusụk n̄kpọ emi ekpewetde ẹsịne utom ufọk ye utom ufọkn̄wed. Wet udomo ini emi edidade ikụre n̄kpọ kiet kiet ke urua.
Se Bible etịn̄de: ‘Ẹdụn̄ọde ẹfiọk se idide akpan n̄kpọ ikan.’—Philippi 1:10.
Wet mme n̄kpọ emi akpamade ndinam ama okụre utom fo. Emekeme ndiwet utọ n̄kpọ nte ndise TV ye ndineme nneme ye mme owo ke Intanet nsịn n̄ko. Wet n̄ko ibat hour emi esidade anam mme n̄kpọ emi kiet kiet ke urua.
Se Bible etịn̄de: “Ẹka iso ẹsan̄a ke ọniọn̄ . . . , ẹdedep ifet.”—Colossae 4:5.
Wet nte edinamde se enyenede ndinam. Fiak se n̄kpọ iba emi afo ekewetde enịm. Ndi ini emi ekenịmde ndida nnam mme akpan n̄kpọ eyekem fi? Ndi edi se osiode ini ke mme n̄kpọ emi akpamade ndinam ama okụre utom esịn ada anam mme akpan n̄kpọ?
Nam emi ise: Wewet se edinamde kpukpru usen, nyụn̄ sịn idiọn̄ọ ke enye emi anamde ama.
Se Bible etịn̄de: “N̄kọkibuot owo nsịnifịk itreke ndinyene ufọn.”—Mme N̄ke 21:5.
Nam se ekebierede. Ẹkpekot fi edinam, ekeme ndidi se ọdọhọde ndusụk ini ke imọ idikemeke ndika man enyene ini anam mme akpan n̄kpọ. Ama anam ntre, oyokụt ke eyesinen̄ede enyene ini se adade anam mme n̄kpọ, esịt oyonyụn̄ enen̄ede enem fi.
Se Bible etịn̄de: “Ẹkûsịn ifu ke mbubehe mbufo.”—Rome 12:11.
Nam n̄kpọ nem idem esịt, edi yak edi ke ama okokụre se anade anam. N̄kaiferi kiet emi ekerede Tara ọdọhọ ete: “Ndusụk ini, mma nnam n̄kpọ iba ke otu se n̄kewetde nnịm nte ke nyanam, nyọdọhọ, ‘Yak nse TV minit 15 ekem nyafiak n̄kanam se isụhọde.’ Minit 15 ayakabade 30, minit 30 akabade hour kiet, nte ndiọn̄ọ, mmabiat hour iba nse TV!”
Nso ke akpanam? Ti ke akpanam n̄kpọ ndida nnem idem esịt ama okụre mme akpan n̄kpọ emi anade anam, idịghe ini ekededi emi ọdọn̄de fi.
Se Bible etịn̄de: “Idụhe se ifọnde ye owo ikan . . . [ndikụt] se ifọnde ke ọkpọsọn̄ utom esie.”—Ecclesiastes 2:24.