Ndi Ẹkebobot M̀mê N̄kpọ Okofoforo?​—Akpa Ikpehe: Ntak Emi Afo Ekpenịmde ke Abasi Odu?

Ndi ẹkebobot m̀mê n̄kpọ okofoforo?

Ndi emenịm ke Abasi okobot kpukpru n̄kpọ? Ekpedi emenịm, fiọk ete ke idịghe afo ikpọn̄ enịm; ediwak mme uyen nte afo (ye ikpọ owo) ẹtiene ẹnịm. Edi ndusụk owo ẹdọhọ ke ekondo emi ye mme n̄kpọ emi ẹdude ke esịt ẹkefoforo​—ke idịghe Abasi okobot.

Ndi ama ọfiọk? Mbon oro ẹnịmde ke Abasi okobot n̄kpọ ye mbon oro ẹnịmde ke n̄kpo ẹkefoforo, ẹsisọsọp ẹtịn̄ se mmọ ẹnịmde kpa ye oro mmọ mîfiọkke ntak emi mmọ ẹnịmde.

• Ndusụk owo ẹnim ke Abasi okobot kpukpru n̄kpọ sia se ẹkpepde mmọ edi oro ke ufọkabasi.

• Ediwak owo ẹnịm ke n̄kpọ okofoforo sia se ẹkekpepde mmọ edi oro ke ufọkn̄wed.

Se ẹdinemede ke mme ibuotikọ emi ayan̄wam fi enen̄ede enịm ke Abasi okobot kpukpru n̄kpọ onyụn̄ anam fi ekeme nditịn̄ nnọ mbon en̄wen ke Abasi okobot kpukpru n̄kpọ. Akpa kan̄a, ọfọn obụp idemfo mbụme emi edide akpan n̄kpọ akan:

Nso inam nnịm ke Abasi odu?

Ntak emi mbụme oro edide akpan n̄kpọ? Sia Bible ọdọhọ nnyịn ‘isikere n̄kpọ.’ (Rome 12:1) Oro ọwọrọ ke ukpunịmke ke Abasi odu ke ntak

• se ekerede (Nnyụn̄ n̄kere ke akpana odu owo emi enyenede odudu akan)

• se mbon en̄wen ẹkerede (Mbon edem nnyịn ẹsika ufọkabasi)

• se ẹdọhọde fi enịm edi oro (Ete ye eka mi ẹkekpep mi ke Abasi odu​—ntre nnam didie)

Utu ke oro, afo ke idemfo enyene ndikpep mme n̄kpọ oro ẹdinamde fi enịm ke Abasi odu.

Ntre, nso inam fi enịm ke Abasi odu? Ibuotikọ emi “Why Do I Believe in God?” emi odude ke n̄kpọ uwetn̄kpọ ke ikpehe Intanet nnyịn eyenen̄ede an̄wam fi. Ọkpọfọn n̄ko etiene ese nte mme uyen eken ẹbọrọde mbụme oro.

“Ke ini titia nnyịn esikpepde nte idem nnyịn etiede, emi esinam nnen̄ede nnịm ke Abasi odu. Kpukpru ndido idem nnyịn, ọkpọkọm ekpri didie ẹnyene utom. Ediwak ini, mmọ ẹsinam utom mmọ nnyịn idiọn̄ọke. Idem owo enen̄ede enyene ndyọ!”​—Teresa.

“Ke ini n̄kụtde ikpọ ufọkenyọn̄, moto, m̀mê nsụn̄ikan̄, mmesibụp idemmi nte: ‘Anie akanam mme n̄kpọ emi?’ Ke uwụtn̄kpọ, owo emi mîdiọn̄ọke n̄kpọ ikemeke ndinam moto, sia ediwak n̄kpri n̄kpri n̄kpọ ẹdu ke moto emi edide edieke owo mînamke mmọ ọfọn, moto oro idiwatke. Edieke edide owo akanam moto, ọwọrọ enyene owo emi okobotde nnyịn n̄ko.”​—Richard.

“Edieke ọdiọn̄ọde ke esida mbon oro ẹnen̄erede ẹfiọk n̄kpọ ata ediwak isua ndidiọn̄ọ sụk n̄kpọ ifan̄ ke ekondo nnyịn emi, ọwọrọ ọdiọk ebe nde ndikere ke idụhe eke okobotde idem ekondo nnyịn emi awakde n̄kukọhọ ntem!”​—Karen

“Nte n̄kesịnde idem n̄kpep n̄kpọ mban̄a n̄kpọ obot, ntre ke ọkọsọn̄ mi ndinịm ke n̄kpọ okofoforo. Ke uwụtn̄kpọ, mma n̄kere nte ndusụk n̄kpọ ẹsitịbede ke ata nnennen ini ye nte idem owo enyenede nyọ, n̄kere n̄ko nte esidọn̄de nnyịn ndidiọn̄ọ utọ owo emi idide, nte ikasan̄ade ididu ye se iditịbede inọ nnyịn ke ini iso. Mbon emi ẹkpepde ke n̄kpọ okofoforo ẹsisụk ẹtịn̄ ẹban̄a unam ke ini mmọ ẹn̄wanade ndinam kpukpru emi an̄wan̄a, edi mmọ ikemeke nditịn̄ se inamde owo enen̄ede edi isio. Ami n̄kere ke enen̄ede emem utom ndinịm ke Abasi okobot n̄kpọ akan ndinịm ke n̄kpọ okofoforo.”​—Anthony.

Nte n̄kpanamde mme owo ẹdiọn̄ọ se nnịmde ke akpanikọ

Akpanam didie edieke nditọ klas fo ẹsakde fi ke enịm n̄kpọ emi mûkemeke ndikụt ke enyịn? Nso edieke mmọ ẹdọhọde ke ntaifiọk ẹwụt ke n̄kpọ okofoforo?

Akpa, nen̄ede nyene uko tịn̄ se enịmde ke akpanikọ. Kûyak but anam fi, kûnyụn̄ uyak ẹsịn fi ndịk ke idem. (Rome 1:16) Kûfre ke:

1. Idịghe afo ikpọn̄ ke edi, ediwak owo ẹnịm ke Abasi odu. Emi esịne mbon ẹnen̄erede ẹka n̄wed ẹnyụn̄ ẹnen̄erede ẹdiọn̄ọ n̄kpọ. Ke uwụtn̄kpọ, odu mme ntaifiọk oro ẹnịmde ke Abasi do.

2. Ke ini mme owo ẹdọhọde ke mmimọ inịmke ke Abasi odu, ndusụk ini ikọ mmọ esiwọrọ ke mmọ idiọn̄ọke Abasi. Utu ke mmọ nditịn̄ mme n̄kpọ emi akpanamde owo enịm se mmọ ẹtịn̄de, mmọ ẹsibụp utọ mbụme nte, “Edieke edide Abasi odu, nso inam Enye ayak mme owo ẹbọ ufen?” Mfịna mmọ esidi ufen emi mme owo ẹbọde idịghe m̀mê Abasi odu.

3. Esidọdọn̄ mme owo ndiyom Abasi. (Matthew 5:3) Emi esịne ndinịm ke Abasi odu. Ntre owo ọkpọdọhọ fi ke Abasi idụhe, ọwọrọ ana owo oro etịn̄ se inamde enye ekere n̄kpọ ntre.​—Rome 1:18-20.

4. Enen̄ede owụt ifiọk ndinịm ke Abasi odu. Mme n̄kpọ mme n̄kpọ ẹdu ndiwụt ke n̄kpọ ikoforoke-foro. Idụhe n̄kpọ emi akpanamde owo enịm ke mme odu uwem n̄kpọ ẹkewọrọ ntre ke mbuari ẹto mme n̄kpọ oro mînyeneke uwem.

Nso ndien ke editịn̄, edieke owo ọdọhọde fi m̀mê nso inam enịm ke Abasi odu? Se n̄kpọ ifan̄ ekpetịn̄de mi.

Edieke owo ọdọhọde: “Sụk mbon oro mîkaha n̄wed ẹnịm ke Abasi odu.”

Emekeme ndidọhọ enye: “Ndi emenen̄ede enịm se ẹtịn̄de oro? Ami nnịmke. Ke nditịn̄ akpanikọ, ke ndụn̄ọde kiet emi ẹkenamde ye nsio nsio prọfesọ 1,600 emi ẹdide ntaifiọk ẹnyụn̄ ẹkpepde n̄kpọ ke nsio nsio ikpọ University, se iwakde ibe prọfesọ 500 ẹma ẹnịm ke Abasi odu.a Ndi ọkpọdọhọ ke mme prọfesọ oro idiọn̄ọke n̄kpọ ke ntak mmọ ẹnịmde ke Abasi odu?”

Edieke owo ọdọhọde: “Edieke edide Abasi odu, ntak emi mme owo ẹbọde ufen ntem ke ererimbot?”

Emekeme ndidọhọ enye: “Etie nte ikọ fo ọwọrọ ke udiọn̄ọke nte Abasi esinamde n̄kpọ​—mîdịghe ke afo udiọn̄ọke se inamde Abasi mînamke n̄kpọ iban̄a ufen emi mme owo ẹbọde idahaemi. N̄kọ ntre? [Bet ibọrọ.] Mma n̄kụt ibọrọ oro akan̄wamde mi ndiọn̄ọ se inamde mme owo ẹbọ ufen ntem. Edi ana ekpep Bible man ibọrọ mbụme emi an̄wan̄a fi. Ndi akpama ndidiọn̄ọ n̄kpọ en̄wen en̄wen?”

Ke ibuotikọ en̄wen, iyeneme ntak emi idọhọde ke n̄kpọ ndifoforo inamke ikụt nte owo akasan̄ade edidu.